Tornozulotik

Luis Karrilek ez du kalerik Donostian

2012-01-19T00:47:00.000+04:00

Aurreko idazki honetan, plazaratu nuen Luis Karrilek ez zuela bere izeneko ez plazarik ez kalerik gure hiri santu honetan. Eta kritika hori ez nuen egin nire ustez guztiz merezia lukeelako bakarrik. Aipatu nuen, gainera, alderdi politiko batek (EAJk, hain zuzen) 2006an eskatua ziola kalea udalari. Antza, proposamen ofiziala eginagatik ere, ez du patroi handi hark horrenbeste merezi.

Hona hemen eskaera horren testua (*). Erdaraz dago; ez dakit eskaera euskaraz ere egin ote zen, nik behintzat ez dut aurkitu. Bertatik ateratakoa da eskaeraren pasarte konkretu hau:

Egia esan, amorratu ere egiten nau batzuetan gure kale eta plazen izenak ikusteak: ergelkeria galantak eta ganorabako totalak dauzkagu, mordoxka bat, eta Donostiari poza edo aintza eman dioten makina bat pertsona daude aitortza publiko horren faltan. Esaterako, Luis Karril.

Askotan susmoa dut ez dela behar bezala apreziatzen leku-izenak ere badirela herriaren ondare, eta ez soilik eraikinak eta ondasun materialak. Izenak ere herriaren ondarea dira, izen horiek izendatzen dituzten pertsona edo gauzak herri-oroimenaren ondarea diren bezalaxe (izenak izana baitu, esaerak dioen bezala).

Donostiako udalak orain dela hilabete gutxi hartu zuen Atotxako futbol-zelaia zegoen plazari izen horixe ematea, Atotxa zelaiarena alegia. Erabaki txalogarria. Hala ere, tamalgarria da duela ia 20 urte Atotxa zaharra bota eta plaza berria eraiki zenean, ez zitzaiela okurritu ere egin izen hura kale-izendegian gordetzea merezi zuenik. Ez izena bera, eta ez, beraz, futbol-zelaiaren oroimena. Ondarea zapuztuta berriro ere. Eskerrak pertsona zentzudunen baten ideia bultzatuz Gure Reala futbolzale-elkarteak udalean proposamena aurkeztu zuen, soka horretatik tiraka etorri baita Atotxa izena berreskuratzeko erabakia.

Tristea da, ordea, gauzak “berez” egin ez izana eta horrelako kontraproposamenak egin beharra. Horixe gertatu zen Amara Zaharrean eraikiko duten plaza berriari Nelson Mandela izena ezarri nahi izan ziotenean. Ez dut dudarik Mandela jaunak merezi duela hori eta gehiago, baina nire ustez egokiagoa da aurrena Donostiako izen-ondarean edo herri-oroimenaren ondarean bilatzea.

Ez zuten horrelakorik egin kai aldetik Paseo Berria hasten den zabalgune edo plaza horrentzako Jacques Cousteau izena hautatu zutenean: zein leku hobea Luis Karrilentzat, urtero-urtero zientoka arraunzalek estropadez gozatzeko erabiltzen duten talaia paregabe hori baino? Baina berandu da jadanik. Aproposa zen leku hura, gainera; kaiaren inguruan ia ez baitago berezko izen zaharrik ez duen beste lekurik. Ze, jakina, zerbaiti Luis Karril izena jartzeko erabakia hartzen badute, arren ez dezatela lehendik dagoen izen zahar bat hankapean hartu. Hau da, ez dezatela egin gaur egun Fermin Calbeton den kalearekin egin zutena: Erdi Arotik zetorren Puiuelo izena, duela bi belaunaldiko donostiarrek ere erabiltzen zuten izen gaskoi eder hori, oraingo eta etorkizuneko donostiarren ondaretik ezabatuta uztea. Aiton-amonei aditua diegun Parte Zaharrekooz aparte, zenbatek, zenbat gaztek ezagutzen du izen hori? Trakeskeria hori egiteko, hobe da ezer ez ukitzea, eser ez aldatzea.

Hor da, beraz, mahai gainean alderdi baten eskaera ofiziala. Baina 6 urte pasatu dira jadanik, eta...ezer ez. En fin, pazientzia, Luis Torrekua, pazientzia.

PD: Ondo pasa San Sebastian egunean !!!!

(*) Ikus dezakezuenez, Xabier Ezeizabarrena zinegotziak egindako eskaeran Luis Karril asturiarra zela dio. Hain zuzen testu hori irakurtzeak piztu zuen patroiaren ondorengo baten harridura, bai baitzekien Karril jaiotzez donostiarra zela, eta horixe frogatzeari ekin zion. Baita lortu ere.

Egutegia aurten ere

2012-01-06T00:59:00.001+04:00

Aurten ere, egutegia atera du Donostiarrak, Urkatx arraindegien lankidetzarekin. Iazkoan bezala, Donostiako auzoetan ospatzen diren jaiak markatuta eskaintzen dira egutegian, eta, nola ez, traineru eta arraunlarien argazki ederrak ikus ditzakegu bertan.

Egia esan, ez klubaren webgunean ez bazkideok Gabonetan jaso dugun gutunean horri buruz ezer esan ez zutenez, adiskide batek jakinarazi didalako enteratu naiz ni.

Arraindegi pare batera joan, eta agortuta dagoela esan didate. Eskerrak lagunak bere alea oparituko didan.

2012-01-11 EDITATUA: Gaur bertan jaso dut etxean klubak postaz bidalitako egutegia. Dirudienez, Urkatxek egutegi sail bat atera du, bere publizitate hutsarekin, eta klubak beste sail bat kaleratu du, gainerako esponsorrekin eta laguntzaile gisa ageri diren taberna eta jatetxe batzuekin. Eta bazkideoi azken honen ale bana bidali digute. Eskerrik asko, bada, eta barkatu klubari egindako "errieta". :)

2012: URTE BERRI ON !!!

2011-12-30T20:33:00.002+04:00

Luis Karril: bere kuadrillako baten testigantza zuzena

2011-12-21T17:24:00.000+04:00

Kosta guziyan sonatutako
estropara da jokatu,
Getaria, Pasai, ta Oriyo,
onera ziran elkartu;
Getariarrak ontzi bikaña
zuben onera agertu,
bañan, Luis Zarra bentzutzeko
modurik izandu eztu.

Zeñek ez daki Luis Karrillen
berri estropara abetan?
aurten ere nagusi jarri da
jokatu duben onetan;
oraindañoko itsas apustu
jokatu diran denetan
beti bandera irabazi du
treñero arraunketan.

Amalau sari irabaziyak
baditu legez ta umill,
aukeraturik treñerorako
beretzat amairu mutill;
juan dan jayian beste sariya
irabazi du txit abill,
kanpotarraren buru eginda
Donostiko Luis Karrill.

Bertso hauek 1890ko Kontxako banderaren ondoren Pepe Artolak jarritako bertsoak dira, huraxe izan baitzen patroi honen garaipen handietako bat. Donostiako patroi handia eta patroi handi ospetsuetan lehena izan zen Luis Karril, Torrekua.

Eta, aizue, hau aprobetxatuz esan nahi nuke, salaketa gisa-edo, alderdi batek 2006an eskatu zuela udaletxean kale bati Karrilen izena ematea; nik dakidala, ez du oraindik kalerik patroi handi honek Donostia batean, bai ordea makina bat artaburuk eta dozenaka txorakeriak.

Luis "Torrekua"ren garaipen sonatu eta ezagunena 1890ean ondarroarren aurka irabazitako desafioa da. Desafio horren kontakizuna leku askotan dago azaldua eta edonoren eskura (adibidez Euskonewseko artikulu honetan edo blog honetako sarrera honetan eta honetan), eta ez da nire asmoa hemen beste bat gehitzea, bai ordea testigantza interesgarri bat eskaintzea: zuzeneko protagonista batena. Roman Etxenike Karrilen kuadrillako arrantzale eta arraunlaria zen, desafio hartan parte hartu zuen, eta handik ia bi urtera patroia eta kuadrillako bederatzi gizon hil zituen istripuan onik irten zen gutxietako bat izan zen.

Etxenikeren kontakizunarekin hasi aurretik, ordea, aipatu nahi nuke hainbat bertso-paperen gai-iturri izan zela desafio hura, garai hartako edozein gertaera handirekin gertatu ohi zen moduan. Antonio Zabalak bost bertso-paper bildu zituen estropada honi buruzkoak, baita beste bi bertso bikote motz ere. Hemen daukazue bertso-paper horietako bat, Bertsolariya aldizkariaren irudi eta guzti. Beste paper edo idazki kurioso bat duzue honako hau, Antonio Arzakek egindako karitate eskaera.

Etxenikeren testigantza Dionisio de Azkue (Dunixi) idazlearen Mi Pueblo, Ayer (1932) liburuan biltzen da. Nik eskueran hirugarren edizioa dut, 1975koa.

Dunixi berak esaten digunez Roman Etxenike (Roman ‘Largo’) gizon handi eta lerdena zen oraindik 1932 hartan (desafioaren garaian 104 kilo omen zituen); arrantzale donostiar petoa zela dio, txapela zertxobait belarri aldera okertua jarrita "a lo donostiarra" eramaten omen zuen, eta bere hizketa gustagarri egiten zitzaion, Donostiako kaiko esamoldeak eta hizkera bizia baitzituen ahoan. Romanez gainera, artean Karrilen kuadrillako beste hiru bakarrik zeuden bizirik: 'Xolomo' (Pedro Galdos), 'Martin-Erri' (Martin Erkizia) eta 'Loko' (Inazio Olaizola), kaiko izengoitiak denak ere.

Goazen, bada, Dunixirekin izandako elkarrizketan Roman Etxenikek ematen digun zuzeneko lekukotasuna ezagutzera:

Hilabeteko prestakuntza egin zuten 1890ko desafio famatu hura prestatzeko, duro bateko ordaina eta afaria ematen zieten. Egunero sei milia egiten zituzten entrenamenduetan, eta, Dunixi harritzen den arren, Romanek dio haiek ohituta zeudela horretara, arrantza jardunean "mandua bejela" aritzen baitziren egunero (horra "bejela" aldaera, kaieko hizkera zaharrekoa). Traineruko zazpi arraunlari Karrilen ohiko kuadrillakoak ziren, eta besteak Donostiako beste patroienak; horra tripulazioa: Pantaleon Isasa (ankekoa, garai hartan bakarra izaten zen-eta), Tomas Agote, Isidro Ibarzabal, Martin Erkizia, Pedro Galdos, Joxe Mari Taberna, Joxe Beobide, Angel Etxezarreta, Roman Etxenike, Anselmo Idiakez, Joakin Landa, Inazio Olaizola eta Pepe Sanchez (aurrekoa). Oker ez banago, Joxe Beobide hura Ur-Kirolakeko eta Donostiarrako lehendakari izandako Iñaki Aranaren birraitona zen.

Romanek dioenez, desafioan Lekeitiotik abiatu eta hasieran arraunean 'sarri' hasi omen ziren, baina berehala ‘luze', erritmo berean estropada osoan. Ondarroarrak parean zituzten lehen minutuetan, eta Saturraran aldera hasi ziren donostiarrak aurrea hartzen. Mutrikun Anbrosiok, ondarroarren patroiak, txalekoa uretara bota eta apullian arraunean hasi zen arraunlariei laguntzeko, baina, pixka bat hurbildu baziren ere, alferrik izan zen. Txikituta iritsi ziren bi tripulazioak, tostak odoletan blai, egurra eskuko hezurretaraino sartuta. "Eta urrengo egunian, ezin pauso bat emanik, danak ipurdiyari elduta". Iritsieran, ordea, batere minik sentitu ere ez, "txoriya bañon pozago". Bi ontzietako arraunlariak adiskide izan omen ziren betiko, baita Ondarroara itzuli ez eta Castrora joan zen Anbrosio patroia ere.

Pozaldi egun horretatik 22 hilabete geroago, Luis Karrilen heriotzaren negarraldi eguna iritsi zen: 1892ko urriak 19. Etxenikek esaten digunez, Karril eta hamabi arrantzale egunsentian irten ziren itsasora, eta goiza arrantzan pasatu ondoren, beste kala baterantz abiatu ziren. Haize zakarra omen zebilen, iparra (NNE). Itsasoa bare, eta, haizea aprobetxatuz, belarekin ari ziren nabigatzen, kostatik 9 milia ingurura. Anboto ikusi orduko (kala ondo enfilatzeko puntua zen mendi hura) Joxe Mari Tabernak ordularia atera eta “ordubata” esan omen zuen. Oraindik gorde ez zuenean, haize-bolada bortitz batek derrepentean bela bete-betean harrapatu zuen, ontzia trabeska jarri eta azkenean irauli egin zuen. Karril une horretan pipa kargatzen ari omen zen, patroi lana istante batez utzita, eta kasualidadea, orduantxe gertatu behar bolada hura.

Luzaro egon ziren ontzi irauliari helduta, eta bere adiskideak nekearen nekez banan-banan amore ematen, ontzitik askatzen eta bere begien aurrean itotzen ikusi behar izan zituen Romanek. Karrilek arropa erantzi egin zuen, ontziari hobeto heltzeko-edo, baina horrek azkartu egin zuen bere patua: ordu eta erdi eskasera, agian hotzak giharrak uzkurrarazita, eskuak gilatik askatu eta hondoratu egin zen betiko.

Ontzi bat pasatu zen handik denbora batera. Garrasi eta seinaleak egin zituzten, baina ontzikoak ez ziren konturatu. Laurak ziren, hiru ordu igaro ziren beraz istriputik, eta desagertuak ziren hamahiru gizonetatik bederatzi: Luis Karril, Jose Joakin Leunda, Joxe Mari Taberna, Joxe Beobide, Joxe Migel Egaña, Luziano San Sebastian, Mariano Blanco, Francisco Agirre eta Manuel Uribe. Biziari gogor eusten zirauten Roman Etxenike, Pedro Galdos, Lorentzo Ituarte eta Ascensio Landabereak. Romanek erabaki bat hartu zuen: lantxa aurkitzen badute, nire gorpua ere aurkituko dute esanez soka batekin bere gorputza traineruari lotuta utzi zuen.

Urrunean atunontzi bat ikusi zuten. Xolomok izan zuen kamiseta bat arraun-puntan jarri eta arrauna gora altxatzeko adina kemen. ‘Avelina’ izeneko kalera zen, eta kasualitatez, Karrilen lagun minena zuen patroi, Francisco Iturriza ‘Polvora’ (hain zuzen, patroi honena zen 1890ko desafioan donostiarrek erabilitako trainerua). ‘Avelina’ bera desafio hartako apustu batean irabazi omen zuen Iturrizak. Laurak eta laurden ziren lau gizonak salbatu zituztenean. Egun batzuk geroago, laurak hankutsik oinez joan ziren Lezoko Santo Kristora, salbazioarengatik eskerrak emateko.

Horra Roman Etxenike "Largo"ren oroitzapenak. Donostiako arraunaren historia oparoaren parte bat besterik ez da, dudarik gabe berebiziko garrantzia duen arren. Arrauna eta Donostia maite baditugu, denon zeregina da historia osatzen duten istorio hauek donostiarren artean ahaztu ez daitezen ahalegintzea.

Argazkiak:
1. Luis Karril
2. Luis Karril, Kontxan 1890an irabazi zuen Cariño traineruan.
3. Karril (pipa eskuan) traineru donostiarreko bere kuadrillarekin.

Gipuzkoako Arraunaren Gala 2011

2011-12-21T12:35:00.003+04:00

Atzo, Gipuzkoako Arraunaren Gala ospatu zen, Gipuzkoako arraunlarien garaipenak eta arraunari laguntzen ari diren hainbat pertsona saritzeko.

Donostiari dagokionez, Donostiarrari KAE-1 ligako lehen talde gipuzkoarra saritzen duen bandera eman zitzaion (bigarren urtez jarraian lortu du sari hori). Era berean, Ur-Kirolakeko Imanol Iradi eta Jon Ander Diez gaztetxoek, Europako Gaztetasun Kopako irabazleek, garaikur bana jaso zuten.

Eta azkenik, Gipuzkoako arrauna bultzatzen jarduten duten boluntarioen lana eskertzeko banatu ziren sarien artean, Ur-Kirolakeko Jose Mari Etxeberria eta Roman Arostegi saritu zituzten.

Zorionak denei.

Argazkia: diariovasco.com

URUMEAKO I. BINAKAKO JAITSIERA

2011-12-05T21:50:00.007+04:00

Atzo, igandean, abenduaren 4an, Urumeako I. Binakako Jaitsiera jokatu zen, Ur-Kirolak taldeak antolatuta. 2x eta 2- modalitateak aritu ziren Donostiako ibaian behera, eta lau talde hauetako ontziek hartu zuten parte: Donostia-Arraun Lagunak, Santiagotarrak, San Juan eta Ur-Kirolak. Guztira, 24 ontzik.

Helbide honetako pdf fitxategian aurkituko dituzue jaitsiera horretako emaitzak eta denborak. Eta, Ur-Kirolaken eskutik, jaitsierako hainbat irudi ikus ditzakezue argazki-sail honetan.

MENDI: "Traineruko postuak garesti egongo dira denboraldi berrian"

2011-11-30T15:30:00.006+04:00

Beti bezala, Donostiako arraunaren jarraipen fina egiten du Irutxuloko HITZAk. Oraingoan, Mendi entrenatzaileari egindako elkarrizketa dakarkigu Donostiako egunkariak, eta denboraldi berriak zer ekarriko digun du hizpide.

Hobe duzue zuzenean elkarrizketa irakurtzea, baina hona hemen ideia nagusiak:

“Lehengo filosofiarekin gehiago haztea ezinezkoa zen”, "Traineruko postuak garesti egongo dira denboraldi berrian", "Azpimarratu nahiko nuke, asko hitz egiten dela arraunlari berrietaz, baina aurretik zeudenei laguntzera datozela. Benetan garrantzitsuak, azken urteetan Donostiarran lanean ari diren arraunlari horiek dira."

Bajak: Iban Viaga eta Patxi Olabe.
Altak: Julen Durandegi, Unai Elizasu, Joseba Etxabe, Loren Jauregi, Aritz Jauregi, Lander Olano, Alain Osanbela eta Gari Tolosa.

(Argazkia: Estitxu Zabala - irutxulo.hitza.info)

I. ANTXON BEITIA JAITSIERAKO EMAITZAK

2011-11-22T00:26:00.007+04:00

Ur-Kirolak taldearen webguneko orrialde honetatik atera dugun informazioa:

"Gaur, azaroaren 20ean, Antxon Beitiaren Omenezko I. Skiff jaitsiera ospatu da Urumea ibaian. Bi taldek hartu dute parte, Donosti-Arraun eta Ur-Kirolak, guztira 21 skiff lehiatu direlarik.

Gizonezkoen arteko garailea Iñaki Burutaran izan da, 19:06,21 denborarekin, bigarren sailkatuari ia 13 ateraz.

Emakumezkoen kategorian berriz parte hartzaile bakarra izan da, Ur-Kirolak-eko Izaskun Arroyo. Bere denbora 23:21,10-koa izan da.
Aurtengoa etorkizunean egingo diren hainbat ekitaldietan lehena izatea espero dugu, Antxon Beitia ezagutzeko zortea izan ez zutenak bere berri izan dezaten.

Datorren urterarte!!"

EDITATUA (2011-11-22): Gaur Irutxuloko HITZAn ematen da jaitsiera honen berri, eta elkarrizketa ere egiten zaio Iñaki Burutaran irabazleari).

(Argazkia: urkirolak.com)

Ollagorrako bazkaria

2011-11-07T19:14:00.011+04:00

Aurreko sarreran esan bezala, Juantxo Aginaga saria eman zion Ollagorra soziedadeak atzo Donostiarrari, aurtengo Kontxan lehen traineru gipuzkoarra izan zelako. Mahai baten inguruan, bazkari eder baten aitzakian elkartu ziren Donostiarrako arraunlari batzuk, zuzendaritzakoak, eta Ollagorrako hainbat kide eta gonbidatu.

Otorduaren amaieran, Juantxo Aginaga zena ekarri zuen gogora soziedadeko bazkide batek, Ollagorran (zuzendaritzako kide ere izan zen) eta Donostiako traineruan izan zuen ibilibideari buruzko datu batzuk aipatuta. Juantxok gobernatutako ontziaren eta Donostiarraren arteko hainbat kointzidentzia ere aipatu zituen: bien arteko lotura edo zubia iradoki nahi izan zuen horrekin (adibidez, traineru hark Luis Carril zuen izena, eta oraingoa Torrekua da; hau da, pertsona berari dedikatuta daude bi ontziak, Torrekua Luis Karrilen goitizena baitzen, hemen lehenago esana dugun moduan).

Jarraian, Carloto Garcíak, Ollagorrako presidenteak, memorial honen zergatia eta izaera laburbildu zituen, eta Donostiarrak irabazi izana behar bezala baloratu zuen. Eta gogorazi zuen Donostiak ez zuela 1950tik lortu lehen gipuzkoarra izatea.

Alberto Goitia Donostiarrako lehendakariak hartu zuen hitza azkenik: klubeko arraunlariek duten meritua azpimarratu zuen, eta zeinen baldintza gogorretan entrenatu behar duten. Saria eskertu zuen eta, Ollagorrak emandako ikurraren ordainetan, Torrekua traineruaren maketa bat eman zion soziedadeari (argazkian, hortxe dituzue une horretan Carloto Garcia ezkerrean, eta Alberto Goitia eskuinean). Amaitzeko, omenaldi xumea egin zitzaion Unai Luzuriaga "Txinpart" arraunlari beteranoari, aurten utzi baitu arrauna.

Donostiako traineruaren eta donostiar herritarren arteko lotura estutzen duen beste ekitaldi bat izan zen, eta ez dadila azkena izan.

Juantxo Aginaga memorialaren saria Donostiarrari

2011-11-03T00:46:00.012+04:00

Igande honetan, Ollagorra soziedadeak Juantxo Aginaga memorialaren saria emango dio Donostiarrari. Aurtengoa bosgarren edizioa du memorial honek, eta Kontxako banderan postu onena lortzen duen traineru gipuzkoarra saritzen du urtero. Azken edizioetan Oriok eraman du saria, baina aurtengoan Donostiako trainerua izan da lehen gipuzkoarra. Aspaldiko partez.

Aurten sarritan aipatu izan denez, 1992tik ez zen ontzi donostiarrik sailkatzen Kontxako ohorezko txandarako, baina uste dut azpimarratu behar dela Juantxo Aginaga memoriala irabazteko lortu beharrekoa, hau da, bandera horretan lehen gipuzkoarra izatea, ez zuela Donostiak lortzen 1950tik. Alegia, Esperanzak Donostiarentzako azken bandera irabazi zuen urte ospetsu hartatik. Bada zeozer... eta bada, beraz, zer ospatua igandean, bai horixe.

Bide batez, jakina, Juantxo Aginaga zena izango da gogoan: Donostiako Luis Carril traineruko patroia, 1980ko hamarkadan Kontxan hainbat aldiz aritutakoa (3. postua lortu zuen 1981ean). Hortxe dituzue ondoko argazkian Luis Carril traineru donostiarra, eta, popan, arrauna eskutan, Juantxo Aginaga patroi handia.

(Argazkia ez da oso kalitate onekoa, baina soziedadeko paretan zintzilik dagoen erretratu bati hala moduz ateratakoa da, eta tira, bego...).

Urumeako I. Skiff jaitsiera - Antxon Beitiaren Oroimenez

2011-10-24T22:22:00.004+04:00

Datorren azaroaren 20an, igandean, goizeko 11:30etan Ur-Kirolak klubak "Urumeako I. Skiff jaitsiera - Antxon Beitiaren Oroimenez" antolatuko du Gipuzkoako Arraun Federakuntzaren laguntzarekin.

Irteera 27. Poligonoko zubian emango da eta helmuga 5 km beherago izango da, Maria Kristina zubiaren parean. Itsaso zakarra izanez gero, helmuga Burdinazko Zubiaren parean jarriko da, proba 4 km-ra murriztuz.

Proba kadete, junior, senior eta beteranoen kategorietara dago irekia.

Ur-Kirolaken webguneko albiste honetan duzue eskura jaitsieraren informazio xehea eskaintzen duen pdf fitxategia.

Istingorra soziedadeko afaria

2011-10-18T19:06:00.009+04:00

Duela egun batzuk Antiguoko Istingorra soziedadean afari-omenaldia egin zioten Donostiarrari. Horren berri ematen zaigu gaur Diario Vascon.

Datu batek harritu nau, ordea. Albistean esaten da 2.000 bazkide dituela Donostiarrak, eta nik uste nuen milara iritsi ezinik zebilela kontua; lepoa egingo nuke ekainean 800 ingurukoa zela kopurua. Baina tira, ondo edo gaizki, hortxe duzue datua... (Ni oker banago, askoz hobe, noski).

(Argazkia: diariovasco.com)

1915: Bejon daizutela, donostiarrak

2011-10-05T19:44:00.011+04:00

Blog honetako beste sarrera batean aipatua dut 1915eko Kontxako bandera berezi hura: gorabehera handiak izan ziren Donostiako eta Orioko zaletuen artean, anekdota kuriosoa izan baitzen hilkutxa batekin, eta hurrengo urtean ziatzen era aritu omen ziren oriotar arraunlariak Kontxan lehian ari zirela.

Gaurkoan, urte hartan jarritako bertso batzuk dakartzat hona. Badirudi Fermin Imaz bertsolari donostiarrak jarritakoak direla. 1915eko bandera hura nola joan zen aipatzen da bertsotan (ezustean San Juan eta Donostia sailkatu ziren, ordena horretan, bigarren iganderako, eta azken jardunaldian Donostia irabazle).

Baina, bereziki, 15. bertsotik aurrera esaten dena hartuko nuke nik kontuan: donostiarrak elkarren artean mokoka aritzea ez zitzaion, antza, batere gustatzen Imazi, eta horren kontra dihardu. Lehenago ere ekarri nuen blog honetara sail horretako bertsoren bat edo beste, eta hortxe dituzue beti begien bistan, blogaren eskuin aldeko goialdean. Horixe baita nire desioa, Donostia "unituta" izatea arraunaren arloan, donostiar guztion artean bil ditzakegun indarrak alferrik gal ez daitezen. Horra bertsoak:

"Bejon daizutela, donostiarrak"

1	2	3
Milla bederatzi egun	Bi Pasaietakuak	Sei milla errial zuten
ta amabost urte,	Donostiyarekiñ,	premiyo onenak,
agorren emeretziyan	Oriyokuak ziran	bigarrenak lau milla,
señaladamente,	laugarrenarekiñ,	bi milla urrenak,
aurtengo estropadak	ta amalauna gizon	eta berrogei duro
diran mediante,	txalupa banarekiñ;	laugarren zubenak;
Donostiko kuadrilla	trabesak jaso dira	alkar artu ezkero
lasaitu da fuerte,	lege onarekiñ,	orduan zeudenak,
bigarren premiyua	eztago kontatzerik	kasturako aiñbeste
irabazi dute.	galdu dan arekiñ.	bazeukaten denak.
4	5	6
Amaikak eta bostian	Bertara zidanian	Bi premiyuak oso
elkarren parian,	jendia seriyo,	seguru zeuzkaten,
Kontxatik ateriak	ogei bat minutuan	saiatu dira baña
denbora berian;	naiko istoriyo;	kosta zaie jaten;
iru milla t' erdi buelta	famarikan geiena	naiagatik eztira
zeukaten urian,	zeukana Oriyo,	danen buru erten,
kolpe alperrik egiñ	len ondo ateria	eztaki iñork neri zer
eztute birian,	nai zuten gora iyo,	poza eman nauten,
iñor ezta ibilli	oraiñguan kukuak	len Oriyon ziranak
galtzeko idian.	alrebes jo diyo.	Donostiyan aurten.
7	8	9
Danai bentaja aundiya	Gizon oiek zebiltzan	Jendiak eragiten
nai ziyoten kendu,	aurrena poztuta,	ziyon diruari,
azañ ori egiñ arte	gerora jarri ziran	makiña bat pertsonak
etziran kontentu;	bastante oztuta;	esan naute neri;
artarako mutillak	oriyen desaidiak	bezperatik an ere
zituzten mantendu,	eztaude aztuta,	trabesa ugari:
bi minutuz eztute	apustubak beñere	berrogei duro bosti
lengo markik ondu,	gauz onik eztu-ta,	ta ogei duro biri;
uste etzun petardua	juanak badira poltsak	konfiantza geiegi
berak eraman duo	ederki ustuta.	artzia da ori.
10	11	12
Arro zabiltzan oiek	Bigarren premiyua	Bi onenaren prueba
gaur daude lotsetan,	Donostirakua,	utzi zan geroko,
manifestatzen zaie	San Juanek eraman du	txalupak trukatuta,
pena biyotzetan;	lendabizikua;	ogei ta seirako;
apanak aundi zeuden	irugarren Oriyo,	denborale gaiztua
lenago itzetan,	kuadrilla pijua,	gertatu zalako,
gero deskuidatu da	itxasoko lanetan	zortzi egun atzerago
San Pedro giltzetan,	maña aundikua,	luzatu da franko,
larri samar ziranak	oraiñgu ontan eman	bandera ta diruba
baziran galtzetan.	diyote naikua.	Donostiyarako.
13	14	15
San Pedro ta Oriyoko	Oriyotarrak beintzat	Donostiñ e badade
arraunkalariyak	Zumaitik bat jana,	ez jende bikaña,
aspaldin zebilzkiten	oso gizon aberats	gaizki esaka ibilli
arrunka aundiyak;	on batek emana;	dutenak mingaña;
orra oien ollasko ta	banderakin juateko	erriyan bertakuak
zekor-aragiyak,	ziran beregana,	kontra, alajaña,
geratu dira oso	bañan gertatu zaie	badira okasiyua
lotsagarri biyak,	eziñ eramana,	ipintzeko aña,
beñere eztu gauz onik	zergatik etorri dan	ortarako obiak
burla geiegiyak.	aurten guregana.	laguntzeko baña.
16	17	18
Gizon prestu oieri	Ez gure anayikan	Len ere Donostiyak
nai'et adierazi:	erosi ta saldu,	bazun merituba,
zertako etziran berak	ori egiten dunak	emen gertatzen zana
or brubetan asi?	juiziyorik al du?	eziñ unituba;
Donostiarren izenik	Askoz e obia da	aurten pasa danakin
eztute merezi,	alkarrena bildu,	nago arrituba,
gustora dijuanai	ta sasoia irixtian	bañan oraiñ jendia
zertan galeazi?	denai gogor eldu,	dago argituba,
Ez al dute bandera	Donostiyako onrik	geonen paltan zegon
ondo irabazi?	eztedilla galdu.	lotan geldituba.
19	20	21
Oraiñ ogei ta bost urte	Orrenbeste desaire	la, donostiarrak,
gure Luis Karrill,	egitia ala,	unitu batera,
asko irabaziyaz	gauz ori bai nik gaizki	urrengorako ondo
prestu eta umill,	billatzen derala;	kontubak atera;
munduko ejenpluan	alakua eziñ izan	berdin gizonetatik
geratu zan abill,	kristau naturala,	badago aukera,
etzan zerura juango	iñork eztu esango	baldin alkarganatzen
ezpaldin bazan ill,	ondo daguala,	ezpaldin bagera,
andik ere lagunak	sinixtu gu're amaren	sartu aziko gaituzte
aiudatzen dabill.	semiak gerala.	betiko oinpera.
22	23	24
Donostiar kaxkariñen	Don Antonio Elosegi,	Agur, oriotarrak
arraunketa azkarrak	gure kontzejala,	da San Pedrokuak,
aterazi dizkate	ori izandu degu	desairosuak eta
abutik aparrak;	danen kabezala;	ajol gabekuak;
usteko zuten oiek	len e bakiñakigun	eztu orla ibilli biar
zirala bakarrak,	gizon ona zala,	kristau legekuak,
azañak egin ditu	gurekin portatu da	estimaziyo gutxi
aben potakarrak,	iñor ez bezela,	dauka alakuak,
bejundaizutela,	naitasun eder ori	izan zaitezte biyotz
Joxe Maritarrak!	kontserba dezala.	obiagokuak.
	25
	Sanjuandarrak nai etzun
	banderik uztia,
	bañan portunatu da
	guk irabaztia;
	alare lotsagarri
	geratu eztia,
	ondo portatu dira
	bat eta bestia,
	biba Donostiyako
	kuadrilla gaztia!

Igande gozoa. Arra, arra, arra !!!!

2011-09-12T20:00:00.012+04:00

Igande gozoa atzokoa. Inoiz baino argiago nabarmendu zen Donostiarrak bat egiten duela donostiar zaletuekin. Inoiz baino bandera gehiago, inoiz baino kamiseta gehiago, inoiz baino pankarta gehiago. Nahiz eta zaletu horietatik espero baino gutxiago animatu ziren 'marea zurira' batzen.

Arra, arra, arra!!! Donostiarra!!!
Pankartetan eta donostiar arraunzaleen ezpainetan atzo nabarmendutako esaldia. Kemena eta gogoa bazuten behintzat gure arraunlariei arnas ematen ibili ziren gazteek. Niretzat hori izan zen atzoko igande gozo horretako albisterik onena: jendeak taldearekiko erakutsitakoa. Pentsatu nahi dut Mendik aipatzen zuen erraldoi hori, azken urteetan lo geratu den erraldoi hori, nolabait esnatzen hasia dela, edo gutxienez begitxo bat irekitzen hastekotan dela.

Kirol arloan, traineruak bere neurria eman duela esango nuke. Urdaibai kenduta, beste taldeek ez zioten minutua atera Donostiarrari: 52 segundo Hondarribiak, 49 Tiranek, 47 Kaikuk, 39 Pedreñak eta 36 San Juanek. Esandakoa, bere neurria, txukuna. Eta, azken batean, lehen igandeko zorte onak emandako 4. postua ziurtatzea zen helburua; baita lortu ere.

Igande gozoa beraz, bai zaletuen aldetik, bai lortutako postuagatik. Eta zer hobeto tarta eder bat baino, horrelako igande gozoa errematatzeko? Tarta ere gozoa zegoen, ba :)

1910: Paseo Berria eraiki gabe, Kontxako Bandera

2011-09-08T00:22:00.009+04:00

Argazki ederra, inondik ere, ez al zaizue iruditzen?. Hortxe dituzue arraunzaleak, Gazteluko (Urgull mendiko) magalean itsasoari begira, Kontxako estropadaz gozatzen, baita itsasertzeko arroketan ere. Argazkia 1910ekoa da, eta oraindik ez da ageri pare bat urte geroago eraiki zen Paseo Berria. Argi eta garbi ikus daiteke 100 urte baino gehiago dituela gure bandera handiak sortzen duen ikusmirak.

Novedades aldizkarian argitaratu zen irudi ikusgarri hori. Aldizkari garrantzitsua izan zen Novedades, Gipuzkoako bizimoduaren lekuko zuzena: gauza gehiago irakurri nahi baduzue aldizkari horri buruz, ikus HITZAko Itzurun gehigarriak 2011ko apirilean eskainitako atala (II-III orriak).

PD: kontu zaharren zalea den arraunzale honi asko gustatuko litzaioke Donostiarraren egoitzan (Salamanca pasealekuan) zintzilik dagoen Luis Karrilen kuadrillaren argazkia digitalizatu eta sarean jarriko balu klubak. Argazki hori inoiz ikusi gabea nintzen (kuadrilla horren beste argazkiren bat bai, baina hori ez), eta izugarri polita, xarma berezikoa, iruditzen zait. Dagokionari...

Marea txuria igandean !!!!

2011-09-06T00:35:00.010+04:00

Marea txuria igandean: gure mutilen aldeko ekimena bultzatu dute. Kaian, Donostiarrak jartzen duen txoznan elkartuko gara donostiar arraunzaleak 10:30 inguruan, kamiseta txuriarekin, eta txaranga eta guzti arranpa aldera joango gara 11:00etan. Kaiarribako arranpa kolore txuriz bete dezagun !!! Egin diezaiegun gure mutilei merezi duten harrera!!!

Eman ekimenaren berri zure lagunei, egin dezagun marea txuri ahalik eta handiena!!!

Haizearen eta itsasoaren laguntzaz izan bada ere, Donostiarra ohorezko txandan izatea gauza handia da. Urteotan egin den lanari zoriak eman dion saritzat har dezakegu, baina egia da lan txukuna egin zuela traineruak, eta urtez urte koska bat egiten ari dela gora.

Irutxuloko HITZAn Jon Sardon arraunlariak eskainitako elkarrizketan dioenez, "hiriarentzat itxaropentsua eta pozgarria da" igandekoa, baina, era berean, "erantzukizuna" da arraunlarientzat.

Edonola ere, susmoa dut inflexio bat ere izan daitekeela Donostiako afizioak traineruarekin duen harremanean. Mediatikoki oihartzun berezia izan du joan den igandekoak, eta agian jendea gehiago animatuko du traineruaren alde egitera. Mendik pasa den astean zioen bezala, "lo dagoen erraldoia" da Donostiako afizioa, eta pixkanaka esnatzen joan daiteke horrelako emaitzekin.

Nire ustez, datorren igandea aukera ederra da Donostiarraren aldeko eta Donostiako arraunaren aldeko oihu bat egiteko, "hemen gaude" ozen bat esateko. Eta aukera ona izan daiteke iganderako antolatu den marea txuria.

Poz handiz ikusten ari naiz inoiz baino Donostiarrako bandera gehiago jarri dituela jendeak zintzilik. Ikusi ezkerrean, zeinen itxura ederra zuen abuztuaren 31 kaleak atzo arratsean. Baina gero eta gehiago izan daitezen lortu behar dugu. Ikus dezatela gure arraunlariek hiri oso bat dutela atzetik eta hiritar guztien ordezkari direla itsasoan.

Beraz, anima zaitezte, demontre... erosi kamisetak eta jarri soinean igandean... erosi banderak eta jarri zuen etxe eta balkoietan. Donostiarrok, altxa burua!! Sortu dezagun gureen aldeko ez marea txuria, baizik eta tsunamia !! Aupa DONOSTIARRA, kontxo!!!!!

Ohorezko txandan!!!

2011-09-05T13:20:00.014+04:00

Itsasoa maite dut. Itsasoan, eta ez ibai-erreketan, jokatzen diren estropadak maite ditut. Kontxan jokatzen direnak maite ditut. Eta ez dakit zer duen aurten Kontxak, baina bertan izan diren hiru estropadetan haserre eta zakar agertu zaigu ura: Gipuzkoako Txapelketa, Donostiarra bandera eta Kontxako Bandera.

Aurreneko bietan maila ona erakutsi zuen Donostiarrak, eta atzo ere nahiko txukun ibili zen, kanporanzko luzean bereziki: bere txandan aritu zen Pedreñak 13 segundu eskas kendu zizkion ziabogan, eta itzulerako luzean ere 11 segundo besterik ez zizkion jan Kaiku ahaltsuak.

Hala ere, bigarren txandan haizea eta itsasoa asko zakartu ziren, eta hor aritu zirenek ezinezkoa izan zuten lehen txandakoen denboretara hurbiltzea ere. Pentsa, Tiranek 24:50,38 (eta 15 minutu paseak ziabogan)... noiz ikusi ote ditugu azken aldiz horrelako denborak!!

Hori dela eta, Donostiarra laugarren sailkatu zen atzo, eta, ondorioz, OHOREZKO TXANDAN izango da datorren igandean. 1992tik ez da traineru donostiar bat txanda horretan aritu. Gainera, badirudi postu hori mantentzeko hortxe-hortxe ibiliko direla, edo gehienez ere postu bat galduko dela. Ez da lorpen makala.

Zorionak bada, eta animo!!!! Eta donostiar zaletuei: zer gehiago nahi duzue zuen etxe eta balkoietan banderak jartzeko, eta arraunlariak animatzera kaira joateko kamiseta soinean duzuela??

(Argazkia: diariovasco.com)

Kontxari buruzko web onenak helbide berria

2011-08-31T18:04:00.004+04:00

Joan den urtean hitz egin nizuen webgune honi buruz: nire iritziz, Kontxako Banderaren inguruko webgunerik onena da.

Kontua da, arrazoi teknikoak direla medio, helbidea aldatu egin duela. Hona hemen helbide berria:
http://www.kontxakoestropadak.eu/kontxako.htm (Webak izan dituen lehenagoko helbideetan zaharkitua dago informazioa).

Blog honetan, eskuineko zerrendan dituzuen esteka edo link horien arteko lehena da, eta hor izango duzue eskura web horretara joan nahi baduzue.

2011 KAE liga ona Donostiarrak

2011-08-31T00:23:00.008+04:00

A		B
Aitor Aranegi	14	Ariel F. Lalosevich	16
Arkaitz Diaz	14	Asier Aizpurua	16
Ibai Sistiaga	14	Elias Arruabarrena	16
Iñaki Andonegi	14	Jon Aitor Krutxaga	16
Jon Sardon	14	Mikel Egaña	16
Miguel Angel Enriquez	14	Nikolas Yurramendi	16
Telmo Yurramendi	13	Oskar Villar	16
Hibai Fuente	13	Xabier De Diego	16
Ekain Iriarte	13	Xabier Goienetxea	16
Patxi Olabe	13	Iñaki Galparsoro	14
Xabier Zabala	12	Xabier Agirre	14
Iban Viaga	11	Julen Emezabal	11
Oskar Artola	11	Julen Gorostiaga	11
Gorka Ibarluzea	8	Ander Jauregi	9
Jon Enbil	8	Ibai Beraza	8
Oier Iurramendi	8	Iñaki Agoues	7
Mikel Kortadi	2	Julen Yarza	5
		Ibon Letamendi	1

Hor goian dituzue arraunlari bakoitzak arraunean egindako estropada kopuruak. Izerdi guzti horren ondorioz, Donostiarrak laugarren postuan amaitu du 2011ko KAE-1 Liga. Iazkoarekin konparatuta postu bat gorago bukatzea lortu dute donostiarrek (nahiz eta kontuan izan behar den aurtengo denboraldian Santurtzik izan dituen gorabehera bereziak).

Gero eta lehiakorragoa den KAE Ligan beste pausotxo bat eman du Donostiarrak, pixkanaka baina sendo aurrera daraman bidean. Eta prozesu horretan azpimarratzekoa iruditzen zaidana: teorikoki iazkoa baino hobea ez zen plantilla batek lortu du hori, iaz B traineruan zebiltzan hiru arraunlari maiz tostetan arituta (posturik onena lortu zen estropadan, Bilbokoan, barruan zeuden hiru gaztetxo horiek).

Horri gehitzen badiogu B traineruak gero eta maila hobea eman duela KAE-2 ligan, bosgarren postu txukunak lortuz azken aldera, esan daiteke sustrai sendoak dituela proiektuak bere hazkundea bermatzeko. Blokea mantentzea izango da garrantzitsuena datorren urterako, eta hortik gora, ahal dena.

Gauza hauetaz eta beste batzuetaz mintzatu da Mendi entrenatzailea gaurko Irutxuloko HITZAn, denboraldiaren balorazioa egiten duen elkarrizketa honetan.

(Argazkia: Maider Celada)

Donostiarrek gozatu egin dute Trophée Teink 2011 zeharkaldian

2011-08-25T15:22:00.010+04:00

Duela bi hilabete, Donostiako arraunlari ohi batzuk Trophée Teink 2011 itsas zeharkaldian arituko zirela kontatu nizuen hemen.

Ezaugarri bereziko (garai bateko arrantzaleen bizimodua eta bidaiatzeko era gogora ekartzea baitu helburu) zeharkaldi hori amaituta, esperientzia benetan zoragarria izan dela diote Andoni Torres, Tomas Aldai eta Gotzon Urtizberea adiskideek, eta datorren urtean berriro ere bertan aritzeko asmoa erakutsi dute.

Donibane Irmako ontzian sei egunez 150 kilometro arraunari tiraka bizi izandakoa guztiokin partekatzeko, Facebook-eko helbide hau erabili dute Portaletas izeneko taldean aritu diren hiru donostiar hauek: bertan aurkituko dituzue etapen informazioa, sailkapenak, argazkiak, bideoak, eta izan dituzten beste hainbat bizipenen testigantza. Haiekin harremanetan jarri nahi duenak ere, hortxe du aukera ezin hobea. Itsas zeharkaldiari buruzko argibide gehiago jakin nahiz gero, hemen duzue zeharkaldiaren blog ofiziala.

Blog xume honetatik zorionik beroenak eman nahi dizkizuet hiruroi, horrelako ekimen erakargarrian parte hartzeagatik eta haren berri donostiarroi emateagatik.

1940: Traineru donostiarraren eta kaiaren arteko lotura

2011-08-21T22:41:00.004+04:00

Koldo Mitxelenak 1940an idatzitako bertso batzuen berri eman nizuen aurreko sarrera batean. Gertaera horri buruzko informazio zehatzagoa bilatzen ari nintzela, gauza jakingarri bat topatu nuen Rafael Agirre Francok Kontxako estropadei buruz idatzitako liburu paregabean(*).

Kontua da garai hartan estropalariek traineruaren herri bertako biztanleak izan behar zutela eta alkateak zuela nolabaiteko erroldatze-agiriak egiteko eskumena. Dirudienez, alkateak ez ziren oso zorrotzak izaten agiri horiek egitean, eta tarteka tranpatxoak egiteko tentazioa izaten zuten (baita tentazioan erori ere). Gero inpugnazioak izan ohi ziren, noski. Inpugnazio horietako bat Donostiako Amaikak-Bat traineruari buruzkoa zen: zerrendako hiru ez omen ziren donostiarrak, eta zerrenda aldatu egin behar izan zuten.

Zerrenda berri eta behin betikoan ikus daiteke oso lotura estua zuela traineru donostiarrak kai inguruarekin. Izan ere, tripulazio ia osoa kaian bertan bizi zen, edo kai ondo-ondoan (Mari kalean, Portu kalean...), edo Abuztuak 31 kalean (Amaikak Bat soziedade koxkeroa bera ere dagoen kalean). Hona hemen Donostiako Udaleko idazkariak aurkeztutako zerrendan ikus daitezkeen bizilekuak:

Eustakio Iraola Gaztelumendi ("Famao") - Kaia, 19
Fausto Arrasate Ituarte - Abuztuaren 31, 29
Jose Arruti Kalonje - Mari, 21
Jesus Megias Olaizola - Kaia, 14
Florentino Urtizberea Emezabal - Kaia, 3
Ricardo Vicuña Etxegoien - Mari, 21
Jose Ibarluzea Iturria - Abuztuak 31, 15
Felix Solabarrieta Balenziaga - Euskal Herria, 6
Juan Ikazategi Kaperotxipi - Portu, 9
Angel Etxabe Berasategi - Txanpoene baserria
Antonio Vaqueriza Balzola - Abuztuak 31, 31
Javier Etxezarreta Landaberea - Kaia, 10
Antonio Zubiaurre Arozena - Mari, 21

Donostiako arraunarekin lotura zuzena duten hainbat abizen ikus daitezke zerrenda horretan, eta, era berean, oso eremu murritzean zuela jatorria 1940ko bigarren jardunaldian garaile irten zen tripulazio hark. Salbuespen bakarra dago: Txanpoene baserriko Angel Etxabe. Txanpoene baserria Amara Zaharreko mendi magalean, San Roke auzuneko goialdean, dagoen baserri bat da, Donostiako erdialdetik bi pausu eskasera. Oraindik ere zutik dirau, nahiz eta, tamalez, luzaroko izango ez dela dirudien (hemen duzue argibide gehiago).

Bitxikeria gisa: 1940ko urte hartan, tripulazioek beren kamiseten kolorea hautatu ahal izan zuten lehen aldiz, eta orain arte iritsi diren koloreak hautatu zituzten; hala nola, Hondarribiak berdea, Oriok horia, Santurtzik morea, eta Donostiak zuria (Donostiako beste tripulazioak, Loiolatarrak, urdina hautatu zuen).

(*) AGUIRRE, R.: Donostiako Estropadak (1879 - 2001) Regatas de la Concha. Kutxa Fundazioa. Donostia, 2002.
Argazkia: CC BY-SA, Gipuzkoako Foru Aldundia, Kultura Ondarearen Zuzendaritza Nagusiaren Argazki Bilduma.

B traineruaren garrantzia

2011-08-05T23:33:00.003+04:00

Askotan, Donostiarrak traineru bakarra duela pentsatzeko joera errazegia izaten dugu. KAE-1 ligako gorabeherak ditugu mintzagai, zer-nolako altak eta bajak izan diren ontzian, Zarautz edo Santurtzirekin zenbateko diferentzia izan dugun, Kontxan ze paper egingo ote dugun, eta abar… Hala ere, 20 bakarrik ez, Donostiarran guztira ia 40 arraunlari ari dira urtero gogor lanean. B trainerua ere hor badagoelako. Eta traineru horren funtzioa oso garrantzitsua da, funtsezkoa, oinarri sendokoa izan nahi duen klub honen etorkizunerako. Garrantzi hori gogorarazi diguten bi albiste izan dira azken egunotan.

Batetik, hain zuzen Donostiarrako B traineruaz aritu zen Mundo Deportivo egunkaria atzoko artikulu batean (ezkerrean duzue argazkia; ezin izan dut Interneten albistea aurkitu). Alberto Goitia presidentearen hitzak zekartzan artikuluak, eta traineru horren hainbat alderdi azpimarratzen zituen Goitiak: jende gaztea dela, denboraldian seguruena gorantz egingo duela, eta, adibidez bidaietan A traineruak baino gastu handiagoak baditu ere, guztiz garrantzizkoa dela Donostiarrarentzat, etorkizuneko arraunlariak zailtzeko.

Bide bertsutik mintzo da Mendi entrenatzailea Donostiarrako webgunean azaldu den elkarrizketa honetan. Beste hainbat konturen artean, B traineruaz dihardu: jendeak ez duela behar bezala baloratzen soilik San Pedrok, Oriok eta Hondarribiak duten B tripulazio bat izatea, A traineruaren emaitzetan besterik ez dela arreta jartzen (badela hor zer hobetu) eta beste gauza asko ondo egiten ari direla, beharrezkoa dela B ontzi hori etorkizunean ere arraunlariak hortik igo beharko direlako, aurten 3 igo diren bezala.

Gogoan izan, beraz, hortxe ditugula gure gaztetxoak gure koloreak defendatzen KAE-2 ligan, eta haietxek direla gure etorkizuna, etorkizunik izango bada.

PD: Donostiarrak kantaldi bat antolatu du abuztuaren 12an, Trinitate plazan. Hona hemen argibideak eta salmenta-puntuak.

Ur-Kirolakeko bi jubenilek urrezko domina Austrian

2011-08-03T00:11:00.012+04:00

Asteburu honetan, Arraunketako Gazteria Koparen 27. edizioa jokatu da Austrian (Linz/Ottesheim).

Igandeko jardunaldian, urrezko domina lortu zuten Ur-Kirolak talde donostarreko bi jubenilek. Jon Ander Diezek eta Imanol Iradik podiumeko postu gorena lortu zuten adin horretako 4- kategorian (JM 4- 2000 m), Jon Aizpeolea eta David Oliverrekin batera. (Eskuineko argazkian dituzue bi arraunlariok).

Hona hemen jardunaldi horretako denborak. Gure txapeldunek irabazitako estropada ikusteko, bilatu orri horretan Event 202: Junior Mens Coxless Four dioen atala.

GERORA EDITATUA: Abuztuaren 26an honako elkarrizketa hau egin zitzaien Mundo Deportivo egunkarian.

Zorionak biei eta animo!!!!

(Argazkia: diariovasco.com)

1940: Koldo Mitxelena donostiarrei burlaka

2011-07-21T20:46:00.013+04:00

1940. urtean, Oriok irabazi zuen Kontxako bandera, bi igandeetako denborak batuta markarik onena egin zuelako. Hala ere, bigarren jardunaldian Donostiako Amaikak Bat taldeko trainerua izan zen nagusi (hona hemen denborak). Garaipen horren harira, anekdota bitxi bat gertatu zen, eta Koldo Mitxelena hizkuntzalari handia izan zen protagonista.

Koldo Mitxelenak berak kontatzen duenez (*), Burgosko espetxean zegoen urte hartan, beste hainbat euskaldunekin batera, gerraosteko kartzela-zigorra betetzen (hortxe duzue eskuineko argazkian Mitxelena, zutik daudenen artetik bigarrena ezkerretik hasita, gerrako fronteko hainbat adiskiderekin).

Mitxelenaren kontakizunaren arabera, urte hartako irailean familiarteko baten bisita jaso zuen Burgosko espetxean preso euskaldun batek, eta donostiarren garaipen horren berri izan zuen. Ziztu bizian zabaldu omen zen albistea euskaldunen artean. Jakina, donostiarrak pozez zoratzen jarri omen ziren, guztiz harrotuta, kartzelako bat baino gehiago dezente gogaitzeraino-edo.

Ez dakigu gogaituta utzi zituzten horietako bat Mitxelena errenteriarra izango zen, baina badakiguna da beheko bertso horiek idatzi zituela, donostiarrei adarra jotzeko intentzioarekin.

Bertsoetan ikus dezakegu nola aipatzen duen behin baino gehiagotan "Patxi" santua (Franco, noski), eta baita "Pamao" ere (Eustakio Iraola, "Famao", garai hartako donostiarren patroi ezaguna). Horra bertsoak:

1.	4.
Zenbait bertsotan azal bear det	"Aufa! Etzegok mundu guzian
azaldu al baldin bada,	gu bezelako mutillik!
gure gañera erori zaigun	Gora Amaikak! Gora Donosti!
eraso gogor zakarra.	Gora Kiriko ta Karril!
Atzo jokatu estropadak ta	Lagundu digun Santu berria
garaile donostiarra…	Jaunak dezala berekin!
Gure oraingo entzun bearra	Gora Pamao! Betor onera
ezta izango makala!	iñon bada galtzadunik!
Goiko Jaun onak emango al digu	Eztator iñor… Ez baitek jaio
eramateko indarra!	donostiarren berdiñik."

2.	5.
Ori da gauza arrigarria…	Gaurko gurenda ospatu bedi
Donostiarrak lenbizi!	Kirikorena bezela:
Patxi Santuak mirariren bat	piztu argiak, jantzi leioak
egin duela dirudi.	Patxiri jarri kandela…
Santu berriak lagundu arren	"Marca Pamao" karameloak
atik eztute merezi.	laister egin ditzatela…
Ta… aspaldi ontan nola eztuten	Amaika urtez egon bagera
olakorikan ikusi,	gure txokoan erreta…
esponja baño arrogo daude…	ara aurtengoa guk irabazi…
Oien ondoan zein bizi!	Danak izorraitezela.

3.	6.
Irten zulotik, donostiarra…	Urte bat laster dijoa eta
mingaña ongi dantzatu;	egin orain lasai parra,
ainbeste urtez ixil bearrak	Datorrenean… ongi dakizu:
ia ia lertu zaitu.	zokoan gorde bearra,
Bota arrunkak zuk oi bezela,	Asterakoan: "Aupa Amaikak!
arro-panparroi agertu:	Aurrera Donostiarra!"
au jakin gabe gipuzkoarrik	Gero itzulera, beti bezela,
ez bedi beintzat gelditu;	larri begian negarra…
oraingoa, ba, zurea da ta	Beste olakorik ikusterako
bazter guziak nazkatu.	luza bear zaizu bizarra!

(*) Koldo Mitxelena: Euskal idazlan guztiak, I, Klasikoak, 21, 1988. Euskal Editoreen Elkartea.
AUSPOA saileko Antonio Zavalaren "Estropadak bertsotan" liburuan jaso dugu anekdota eta bertso hauen berri.

Donostiarrak laugarren Gipuzkoako Txapelketan

2011-07-14T01:58:00.001+04:00

Oso itxura ona eman du Donostiarrak Gipuzkoako Traineru Txapelketan. Itsaso zakarra izan da nagusi estropadan, eta itsaso horretan arraunkera egokian aritzea guztiz garrantzitsua izan da. Beherago duzue jmazkue arraunzale finak ateratako bideoa, itsasoaren egoera ikus dezazuen.

Donostiarrek ondo hartu diete neurria olatuei eta bigarrena izan da bere txandan, Orioren atzetik. Azpimarratzekoa da poparean egin dituzten bi luzeetan denbora jan egin diola Donostiarrak Oriori. Beste txandan ezustekoa eman du San Juanek, ontzian ura hartuta espero baino denbora txarragoa egin baitu.
Horrela, laugarren postua lortu dute Donostiarrek eta Euskadiko Txapelketa jokatzeko txartela eskuratu dute. Hona hemen denborak.

Donostiar more, berde, arrosa eta horiak

2011-07-05T19:35:00.003+04:00

Ez, ez... ez naiz ari estropadetara kamiseta more, berde, arrosa edo horia jantzita joaten diren donostiar arraunzaleei buruz. Horiez igual beste egun batean hitz egingo dut... edo ez, bakoitzak egin dezala nahi duena, aizu.

TKE ligan arraunean ari diren arraunlari donostiarrak aipatzen ditu Irutxuloko HITZAk gaurko alean. Noizbait gure hiriko Donostiarra liga horretara iritsiko dela amesten dugun bitartean, gaur egun Donostiatik kanpo egin behar dute arraunean goi-goi mailan aritu nahi duten kirolariek.

Eta ez dira nolanahikoak, ez; albisteko arraunlari-zerrenda ikustea besterik ez dago: Xabier Etxebeste Kaikun; Haritz Etxebeste, Fernando Balentziaga eta Axier Kolina Orion; Aritz Jauregi, Alain Osanbela, Ion Piñeiro eta David Sainz San Juanen; eta Iker Aranburu, Iñaki Arrieta, Joseba Azurmendi, Egoitz Etxebeste, Iñaki Garmendia, Loren Jauregi, Lander Larrauri, Gabi Larrinaga, Jon Lizarazu eta Joseba Mayoz San Pedron.

Pentsa, horiek denak eta Donostiarran dauden donostiar mordoxka (gehiengo zabala da) batuta, pentsa zeinen tripulazio bikaina atera daitekeen. Gorena.
Amets egiteko bada ere...

(Argazkia: Irutxuloko HITZA)

"JJ Gaztelu" itsasontzia

2011-06-29T19:05:00.015+04:00

Aurreko batean, gure hiriko hainbat txokotan arraunarekin zerikusia duten irudi, argazki eta bestelako detalleak daudela gogoratzearekin batera, horietako batzuk pixkanaka blog honetan aipatzeko asmoa dudala kontatu nizuen. Badakit asko garrantzi txikikoak izango direla, seguruena; baina esanahi eta sinbolismo berezikoak dira, nire ustez behintzat. Lehengo hartan, Aizepe soziedadean dagoen argazki zahar bat ekarri nizuen gogora.

Oraingoan, denok ezagutuko duzuen “klasiko” bat aipatuko dut: kaian, Pixepel izenez ezagutzen den lekuaren inguruan atrakatuta egon ohi den “JJ Gaztelu” arrantza-ontzia. Egurrezko itsasontzi urtetsua da, dotorea, hainbat eta hainbat arrantzalditan parte hartutakoa, eta oraindik ere sasoiko dagoena, itsasorako joan-etorrietan aritzen baita bete-betean.

Nire lagun batek dio, eta ez zaio arrazoirik falta, inoiz ontzi honek arrantzan aritzeari utziko balio, udalak mantendu egin beharko lukeela kaian eta inguruko uretan hara eta hona, metalezko itsasontzi berrien ondoan, garai bateko arrantza-ontzien erakusgai.

Eta zergatik aipatzen dudan JJ Gaztelu? Ba, asmatuko zenuten bezala, branka aldean duen ikurrarengatik: kolore biziz margotuta Ur-Kirolak taldearen ikur gorri-berdea du ontziak aurrealdean (beno, garai batean izango zituen kolore biziak, gaur egun nahiko maskalduta ageri da-eta irudia). Pixepel paretik pasatzen naizen guztietan, JJ Gaztelu hortxe badago, ezinezkoa egiten zait begiratu azkar batean Ur-Kirolakeko bandera eta UK letra horiek ikusi gabe aurrera egitea.

Horrelakoxea naiz ba, nahiko berexia.

Bidal gaitzazue Txindoki puntara!!!

2011-06-20T23:36:00.010+04:00

Bi adiskide, bi arraunzale donostiar, Donostiarraren bi jarraitzaile... tabernako berriketa txepelean.

Denboraldi berriaren aurrean, Donostiarrak egin dezakeena dute hizketagai. Ligako gainerako taldeak ondo prestatuta datoz, gogorra izango da kontua aurten; baina ezer ere ez omen da erraz munduan-eta...

Aurtengoan ere, trainerua animatzeko asmoa dute bi lagunek, eupadaka marru batzuk botata barrena lasaitzeko, eta, arraunlariek zeozer entzuten badute, hobeto... Haien nekea arintzeko balioko ahal du!

Bi adiskide, bi arraunzale donostiar, Donostiarraren bi jarraitzaile... tabernako berriketa txepelean.

Zaila bada ere deskuidoan bandera bat irabaztea zeinen ederra litzatekeen dute hizketagai. Eta Donostiarrak, donostiar guztion traineruak, bere lehen bandera irabaziz gero nola ospatuko luketen hasi dira pentsatzen. Ja ja, polita litzateke. Baina nola ospatu? Parranda xoil bat? Eta hasi dira ideia txoroak botatzen, beste bi Keler eskatuta. Eta hara, halako batean hauxe dio batek "Bazekiat! Donostiarrako kamiseta jantzita Txindoki puntara igoko gaituk, eta Donostiarraren bandera zabalduta argazkia aterako diagu hantxe tontorrean!!". Hasieran, parre ergelekin egin diote ongietorria ideia txatxuari, baina parreak isiltzearekin bat, elkarri begiratu diote, bekainak altxa eta ikusi dute baietz, horixe egingo dutela. Hara! Eta parreari ekin diote berriro.

Beraz, Donostiarrako arraunlariak, badakizue. Tabernako berriketa txepelean aritu ohi diren bi adiskide, bi arraunzale donostiar, Donostiarraren bi jarraitzaile Txindokin gora bidali nahi badituzue, eta blog honetan ikusi nahi baduzue gure bandera Txindoki tontorrean... irabaz ezazue bandera bat. Hori "besterik ez", ja ja ja.

Eta lortzen ez baduzue, ez kezkatu, izango duzue-eta beti baten bat petriletik zuei eupadaka, marru batzuk botata barrena lasaitzeko
Animo!!

(Argazkia: Ketari CC BY-SA)

Teink 2011 zeharkaldian, donostiar arraunlari ohiak

2011-06-17T00:35:00.007+04:00

Ekimen interesgarri baten berri ematen zaigu Irutxuloko HITZAK argitaratzen duen Itzurun gehigarriaren gaurko aleko VII. orrialdean: Teink 2011 zeharkaldia.

Garai bateko arrantzaleen bizimodua eta bidaiatzeko era gogora ekartzeko itsas zeharkaldia da Teink 2011, Donibane Lohizuneko Ur Ikara elkarteak antolatua. Bilbotik irten eta Donibane Lohizunerako ibilbidea egiten dute arraunean, sei eguneko ibilbidea (uztailak 25-30). Guztira 150 kilometro egiten dira arraunari tiraka. Parte-hartzaile gehienak arraunlari nahiko beteranoak izan ohi dira.

Aurtengo edizioan (19.a izango da), Donostiako hiru arraunlari ohi arituko dira zeharkaldi horretan, Arraun Lagunak eta Donostia taldeetan aritu eta gero duela 15-17 urte arrauna egiteari utzi zioten Andoni Torres, Tomas Aldai eta Gotzon Urtizberea adiskideak. Hiru arraunlarirentzako batel batean arituko dira, eta, diotenez, Hegoaldeko partaide bakarrak izango dira.

Elkarrizketa honetan kontatzen digute nola izan zuten abentura honen berri, eta zein izan ziren prestaketa egin bitartean izan dituzten bizipenak eta sentimenduak. Interesgarria oso.

(Argazkia: Itzurun (Irutxuloko Hitza))

Donostiarra: bazkidearen eguna

2011-06-13T16:46:00.000+04:00

Atzo eguerdian Bazkidearen Eguna ospatu zuen Donostiarrak.

Klubak mokadutxo bat hartzera gonbidatu zituen bazkideak, eta, bidebatez, A eta B taldeetako arraunlariak aurkeztu zituen.

Alkate izendatu berriak azpimarratu zuen udala traineruaru laguntza ematen jarraitzeko prest dagoela, eta Donostiarrako presidenteak, eskerrak ematearekin bat, beste kontu batzuetaz ere hitz egin behar zutela erantzun zion (zerbaiten eskean-edo), irribarre artean. Esponsor guztiei eskerrak eman zizkien, eta aurtengoan Urkatx arrandegiaren eta Martin Berasategiren diru-laguntza ere jasoko dutela adierazi zuen. Gero, Ekain Iriarte eta Jon Sardon arraunlariek eskerrak eman zizkieten bertaratutako bazkide eta zale guztiei, eta beren aldetik ahal duten guztia egiten saiatuko direla agindu zuten.

Azkenik, herritarrok taldeari ematen diogun arnasaren erakusgarri modura, Donostiarrako kamisetarekin jantzita joandako guztiak argazki batean atera ginen Torrekua traineruaren atzean, klubeko presidentearekin, entrenatzaile eta arraunlariekin eta Donostiako alkatearekin batera. Kosta zitzaion argazkilariari inolako esponteneorik gabeko argazkiren bat ateratzea, bai kostatu ere. Hona hemen atzoko ekitaldiaren argazki galeria bat.

Arraunlariak pozik ageri ziren, neguko zailtasunak alde batera utzi eta benetako estropadei ekiteko irrikaz; zaleak, berriz, itxaropentsu gaude, ekaineko estropada hauetan emaitza txukunak lortzen ari baita Donostiarra. Ea bada.

(Argazkia: diariovasco.com)

Gorka Ibarluzea eta Alex Domingo

2011-06-08T23:58:00.005+04:00

Donostiako udalaren euskara patronatuak argitaratzen duen MUGI aldizkarian, bi arraunlari donostiarri buruzko erreportaje hau argitaratu dute.

Donostiarra traineruan dabilen Gorka Ibarluzea (32 urte) da bata, eta Arraun Lagunakeko aulki mugikorreko modalitatean dabilen Alex Domingo (17 urte) bestea. Arraunean urteak daramatzan arraunlari esperientziaduna eta kirol honetan gogor ekiteko gogoz datorren gaztetxoa.

Beren nondik-norakoak, asmoak eta esperientziak kontatzen dizkigute elkarrizketa honetan. Eskertzekoa da arraunari bere tartetxoa eskaintzea horrelako argitalpenetan.

Bazkideen eguna, ekainaren 12an

2011-06-01T01:34:00.005+04:00

Donostiarra taldeak honako jakinarazpen hau egin du bere webgunean.

BAZKIDEEN EGUNA, plantillen aurkezpena, hamaiketakoa... denak kolore zuriarekin jantzita Donostiarraren kamisetarekin. Aukera paregabea arraunlarien eta herritarron arteko lotura estutzeko.

Joan gaitezen denok, eta eman diezaiegun arnas gure mutilei!!!!!

Gu gera Donostikooo harrobi berria-aaa...

2011-05-29T23:55:00.009+04:00

Donostiarra traineruaren proiektua sortu zen unetik, Donostiako arraunarentzat eta bere etorkizunarentzat ezinbesteko ekimena zela iruditu zitzaidan. Estrategikoa, gure hiriak kirol honen potentzialidade handienaz, aukera zabalenak aprobetxatuz, jardun nahi bazuen.

Badakit asko ez dagoela nirekin ados (bat baino gehiagorekin eztabaidatua baitut) baina Donostiak oinarrian zituen baliabideak, gorantzakoan, gailur argirik gabeko piramide batean galtzen zirela iruditzen zitzaidan. Izerdi, denbora, diru, buru-hauste eta dedikazio izugarriak kostata (klub historikoetako direktiboen eta entrenatzaileen aldetik, bereziki) ateratzen ziren arraunlariak erreferente zuzenik gabe geratzen zirela. Eta gailur hori traineru bateratua, Donostiako traineru bakarra, zela (edo izan behar zuela) argi ikusten nuen nik.

Donostiak badu harrobia, baina harrobi hori hemen gelditzea lortu behar dugu, eutsi egin behar diogu kemen guzti horri, gure etorkizuna baita. Hori lortzeko bide zuzenena harrobia elementu batekin identifikatzea da, Donostiarekin, Donostiako traineruarekin.

Hau dena etorri zait gogora Auzoka aldizkarian elkarrizketa hau irakurri dudanean. Donostiako arraunlari gaztetxo batek, Gontzal Iraolak, bere kirol-esperientzia kontatzen digu. Arraun Lagunak taldearen zale izanagatik, Ur-Kirolakeko zortzikoan ari da jo eta su. Eta, beste hainbat konturen artean, bere talde gustokoena zein den galdetuta, honako hau dio Gontzalek:

"Ni txikitatik Arraun Lagunak taldekoa izan naiz, baina Ur-Kirolak eta Arraun Lagunak taldeek Donostiarra sortu dutenetik, Donostiarra gustuko dut. Nire ustez, talde gaztea da, eta guztiak Donostiako arraunlariak dira; horrek bereizten du beste talde batzuetatik."

Hor esaten dena eta lerro artean irakur daitekeena, hori bai dela etorkizuna.

Mendiri elkarrizketa Irutxuloko HITZAn

2011-05-27T17:26:00.005+04:00

Gaurko Irutxuloko HITZAn, Donostiarrako entrenatzaile Mendiri egindako elkarrizketa hau ageri da. Aspaldi ez genuen klubeko albisterik -ez komunikabideen eskutik, ez klub beraren eskutik-, eta zinez eskertzen da talde barruko gorabeheren berri izatea.

Bajak eta altak izan diren arren, arraunlari-taldearen jarraipena azpimarratzen du, horrek beste puntu bat ematen baitio talde-kirol honi. Patroia Arkaitz Diaz izango dela berresten du, era berean, eta B taldetik hiru igoko direla. A taldean, guztira, 17 arraunlari eta bi patroi izango dira plantillan.

Portugalete eta Santurtzi sendo indartu diren arren, Donostiarra zerbait lortzeko bide onean ari dela uste du.

Bestalde, klubaren etorkizunerako oso garrantzitsutzat dituen bi alderdi aipatzen ditu: udalaren laguntza eta bazkide-kopuru handia. Eta azkenik, osasun-kontuak tarteko, ez du epe luzerako bere burua taldean ikusten, nahiz eta TKEra igotzeko asmoarekin segi.

Hor duzue, beraz, elkarrizketa.

Ur-Kirolaken argazki zaharrak Gure Gipuzkoan

2011-05-16T21:07:00.005+04:00

Gure Gipuzkoa webgunea ezagutzen al duzu? Gipuzkoako Foru Aldundiak sortutako webgunea da, eta Gipuzkoa gaitzat duten argazkien nolabaiteko bilduma jartzen du guztion eskura. Bertan dauden argazkiak zure ordenagailura jaitsi eta erabil ditzakezu, eta zureak ere igo ditzakezu webgunera beste guztiekin konpartitzeko.

Pixka bat saltseatzen ibili eta gero, Ur-Kirolak taldearen argazki hauek aurkitu ditut. Niri behintzat oso kuriosoak iruditu zaizkit, bizitasun handikoak, eta ea niri bezainbeste gustatzen zaizkizuen. (Bereziki bigarren argazkiko "Ur-Kirolak por Guipuzcoa" horrek harritu nau, Gipuzkoa osoari egindako erreferentziak... Alabaina, gaur egungo begiradarekin bakarrik da hori harrigarria, noski).

Lehen argazki-sail batean, 1946an Ur-Kirolakeko arraunlariei egindako ongietorrian ateratako zortzi argazki hauek ikus ditzakegu: 1, 2, 3, 4, 5, 6, 7 eta 8. Sail honetakoak dira behean ageri diren bi argazkiak.
Bigarren saila, berriz, 1964an Ur-Kirolak Espainiako Txapeldun izan zenekoa da, horra: 1, 2, 3 eta 4.

GureGipuzkoa.net | © CC BY-SA: Vicente Martín

GureGipuzkoa.net | © CC BY-SA: Vicente Martín

Donostiarrak aulki mugikorreko txapelketetan

2011-05-09T17:00:00.000+04:00

Asteburu honetan jokatu da Legution aulki mugikorreko 8+ kategoriako Euskadiko Txapelketa. Joan den asteruan Gipuzkoako Txapelketa jokatu zen Orion. Aspaldiko partez modalitate horretako ontzia atera dute Arraun eta Urkik, eta, beraz, bi klubetako zortzikoak izan ditugu bi txapelketa horietan.

Hona hemen emaitzak:

EUSKADIKO TXAPELKETA
1. Hondarribia 5:45,50
2. Getxo 5:54
3. Santiagotarrak 5:58,20
4. Orio
5. Arraun Lagunak
6. Ur-Kirolak

GIPUZKOAKO TXAPELKETA
1. Hondarribia 4:54,92
2. Orio 4:59,72
3. Ur-Kirolak 5:02,52
4. Santiagotarrak 05:03,13
(Donostia Arraun Lagunak sailkapen-estropadak kanporatuta geratu zen).

estropa.net webguneak Gipuzkoako Txapelketako bideo hau eskaini digu:

Angelus

2011-04-30T03:35:00.005+04:00

Gaurkoan utziko didazue, euskaraz izan ohi den txoko honetan, Pio Barojaren erdarazko testu hau jartzen, omenaldi gisa. Jadanik gure artean ez den batek erakutsi zidan narrazioa, eta haren oroitzapenean izan bedi:

"Eran trece los hombres, trece valientes curtidos en el peligro y avezados a las luchas del mar. Con ellos iba una mujer, la del patrón.

Los trece hombres de la costa tenían el sello característico de la raza vasca: cabeza ancha, perfil aguileño, la pupila muerta por la constante contemplación de la mar, la gran devoradora de hombres.

El Cantábrico los conocía; ellos conocían las olas y el viento.

La trainera, larga, estrecha, pintada de negro, se llamaba Arantza, que en vascuence significa espina. Tenía un palo corto, plantado junto a la proa, con una vela pequeña...

La tarde era de otoño; el viento, flojo; las olas, redondas, mansas, tranquilas. La vela apenas se hinchaba por la brisa, y la trainera se deslizaba suavemente, dejando una estela de plata en el mar verdoso.

Habían salido de Motrico y marchaban a la pesca con las redes preparadas, a reunirse con otras lanchas para el día de Santa Catalina. En aquel momento pasaban por delante de Deva.

El cielo estaba lleno de nubes algodonosas y plomizas. Por entre sus jirones, trozos de un azul pálido. El sol salía en rayos brillantes por la abertura de una nube, cuya boca enrojecida se reflejaba temblando sobre el mar.

Los trece hombres, serios e impasibles, hablaban poco; la mujer, vieja, hacía media con gruesas agujas y un ovillo de lana azul. El patrón, grave y triste, con la boina calada hasta los ojos, la mano derecha en el remo que hacía de timón, miraba impasible al mar. Un perro de aguas, sucio, sentado en un banco de popa, junto al patrón, miraba también al mar, tan indiferente como los hombres.

El sol iba poniéndose... Arriba, rojos de llama, rojos cobrizos, colores cenicientos, nubes de plomo, enormes ballenas; abajo, la piel verde del mar, con tonos rojizos, escarlata y morados. De cuando en cuando el estremecimiento rítmico de las olas...

La trainera se encontraba frente a Iciar. El viento era de tierra, lleno de olores de monte; la costa se dibujaba con todos sus riscos y sus peñas.

De repente, en la agonía de la tarde, sonaron las horas en el reloj de la iglesia de Iciar, y luego las campanadas del ángelus se extendieron por el mar como voces lentas, majestuosas y sublimes.

El patrón se quitó la boina y los demás hicieron lo mismo. La mujer abandonó su trabajo, y todos rezaron, graves, sombríos, mirando al mar tranquilo y de redondas olas.

Cuando empezó a hacerse de noche el viento sopló ya con fuerza, la vela se redondeó con las ráfagas de aire, y la trainera se hundió en la sombra, dejando una estela de plata sobre la negruzca superficie del agua...

Eran trece los hombres, trece valientes, curtidos en el peligro y avezados a las luchas del mar."

1924: Ur-Kirolaken esker ona Aizeperi

2011-04-17T00:49:00.003+04:00

Begiak zertxobait zabaldu eta pixka bat erne egonez gero, erraz ikusi ahal izango dugu Donostian (Parte Zaharrean bereziki) edonon nabari dela arraunaren eta herriaren artean dagoen lotura. Nahikoa da hiriko hainbat bazterretan edo tabernetan edo soziedade gastronomikoetan ageri-agerian ditugun argazki eta irudiei erreparatzea. Nahiago nuke garai bateko lotura hori, arraunaren eta gizartearen artekoa, biziberrituko balitz.

Nahiz eta irudi horietako gehienak ezagunak izango dituzuen seguru asko, beharbada pixkanaka ekarriko ditut blog honetara, aparteko albiste berezirik ez dagoenean, interesgarri direlakoan (edo kuriosoak bai, behintzat).

Gaurkoan ekarri dizuedana Aizepe soziedadean dago. Ur-Kirolakek soziedade horri dedikatutako argazkia da, 1924ko abuztukoa. Oker ez banago, Aizepe urte horretan bertan sortu zen, eta Ur-Kirolak bi urte lehenago. Talde donostiarraren laukoa ageri zaigu, Urkiren lehen urteetako ontzi maitatuena; uste dut Pasaiako badian egina dagoela argazkia, eta garaiko euskaran idatzitako (R gogorra "r kakotxa"rekin dago idatzia adibidez) hitz hauek irakur daitezke:

"Aizepe Bazkunari, bere guganako maitasun-ordezko eskarron-agerbidez. Dagonila 1924. Ur-Kirolak".

Argazkia ez da oso kalitate onekoa baina, tira, soziedade bateko afalondoan ateratakoa izateko, ez dago gaizki.

Inus Etxeberria eta Ahotsak ekimena

2011-04-09T23:07:00.015+04:00

Duela egun pare bat, honako albiste hau irakurri nuen Irutxuloko HITZAn. "Ahotsak" ekimenaren berri ematen zuen: herri-hizkera eta ahozko ondarea gordetzea eta zabaltzea du helburu ekimen honek, eta, horretarako, hainbat eta hainbat herritako edadetuak grabatu dituzte bideoetan. Ondare oso baliotsua biltzen da grabazio horietan, eta ez bakarrik herri-hizkeraren aldetik; egiten dituzten kontakizunetan, era bizi eta zuzenean ematen zaigu garai bateko ohituren, lanbideen eta bizimoduen berri.

Nik banuen lehendik ekimen honen berri, eta ahotsak.com webgunean ikusitako kontu bat apuntatua nuen blog honetan noizbait aipatzeko. Donostian 136 pertsonari egin zaizkio grabazioak, hemen ikus dezakezuenez. Pertsona ezagunak dira horietako asko, eta horien artean Inus Etxeberria. Hortxe duzue argazkian, Aquarium aurreko plazatxoan, anaiarekin eta aitarekin batera uretatik atera zituen bi kanoietako baten ondoan. Webgune horretan Inusi eskainitako orrian esaten zaigu umetatik kaiean bizi izandakoa dela, arrantzan ibilia beti, eta bizitzan zehar gauza latzak pasatutakoa ere bai. Grabazioen indizean ondo laburbiltzen da bere ibilbidea eta bizimodua. Tamalez, oraindik ez daude webgunean eskura berari egindako grabazioak, eta ezin dira online ikusi eta entzun. Pena.

Hala ere, arraunzaleak zaretenok jakingo duzue zergatik ekarri dudan Inus Etxeberria arraunari buruzko blog honetara. Laburpen biografikoan aipatzen da "estropadetan hainbat sari irabazia" dela. Eta, jakina, sari horietako bat bereziki dugu gogoan donostiarrok, izan ere Donostiak eskuratu duen azken Kontxako bandera irabazi zuen tripulazioko kide baitzen.

Eskuineko argazkian ikus ditzakezue, 1950ean Kontxan irabazitako banderaren ondoan, C.D. Esperanza elkarteko arraunlariak eta Olegario Iturralde presidentea. Mundo Deportivok argitaratutako albiste honetan Inus Etxeberriak berak kontatzen du 100.000 pezetako saria jaso zutela, sekulako dirutza garai haieterako, eta prestaketa eta otordu bereziez gozatzeko aukera izan zutela. Zeozer egin beharko Valdecillako markesaren babespean zeuden pedreñarrak mendean hartzeko. Antonio Korta "Pintxan" patroiaren agindupean aritutako tripulazio osoa ere zerrendatua ageri da albiste horretan.

Horra bada, Ahotsak ekimen horrek gogora ekarri didana. Nik behintzat badut asmoa webgune horretan eskaintzen den ondarean pixka bat kuxkuxeatzeko. Ez dago gaizki noizean behin atzera begiradatxo bat egitea, edadetuei eta beren esanari arreta eskaintzea; betiere hobeto jakingo baitugu aurrera nola egin, aurrera egingo badugu.

(Argazkiak: ahotsak.com, elmundodeportivo.es)

Donostiarrak Head of the River-en

2011-04-04T23:43:00.006+04:00

Azkeneko blog-sarreretan aipatu bezala, joan den larunbatean Head of the River Race estropada jokatu zen Londresen. Ehunka ontzi aritu ziren arraunketa olinpikoko estropadarik ospetsuena den honetan, eta horien artean, Ur-Kirolak eta Arraun Lagunak klubetako hainbat ontzi aritu ziren Tamesisko uretan.

Leander irabazlearen atzetik, Arraun Lagunak 61. postuan iritsi zen, eta Ur-Kirolak, berriz, 94.ean (bigarren talde bat izan zuen Urkik 218. postuan). Hona hemen estropadako emaitzak eta denborak. Beteranoen kategorian, berriz, urtengo edizioan Arrauneko beteranoek ezin izan zioten iaz lortutako txapelari eutsi, zazpigarren iritsi baitziren. Urkiko bi ontzi aritu ziren beteranoen kategorian, eta 24. eta 112. postuan heldu ziren.

Youtubeko bideo honetan, Arraun Lagunak agertzen da 3:35 minutuan eta Ur-Kirolak 6:50 mintuan.

Irutxuloko HITZAn, donostiarrek Tamesisen bizi izandako esperientzia zirraragarriaren berri ematen zaigu albiste honetan, Urkiko entrenatzaile Xabier Zabalari egindako elkarrizketa baten bidez. Donostiako ontziek lortutako postu eta denborak ere eskaintzen zaizkigu artikulu horretan:

Seniorrak (393 ontzi).

62. D. Arraun Lagunak: 18:10:39
94. Ur-Kirolak: 18:23:51.
218. Ur-Kirolak (jubenilak): 19:11:66.

Beteranoak (197 ontzi).

7. D. Arraun Lagunak: 19:41.62.
24. Ur-Kirolak I: 20:15:04.
112. Ur-Kirolak II: 22:09.09.

(Argazkia: Ur-Kirolak)

Arraun Lagunak Londresko txapela defendatzera

2011-03-29T23:10:00.004+04:00

Aurreko sarrera batean esaten nizuen donostiarrak arituko direla, aurten ere, Londresko Head of the River Race estropada ospetsuan. Beteranoen kategorian, Donostia Arraun Lagunakeko zortzikoa izan zen txapelduna iaz Tamesisko uretan, eta txapela irabazteko asmoz joango dira aurten ere.

Horren berri ematen digu Diario Vascok gaurko alean kaleratu duen elkarrizketa honetan. Joseba Higos arraunlariak iazko esperientzia kontatzen du, eta aurten dituzten itxaropenen berri ere ematen digu. Eta, diruz laguntzen dituen esponsorrari ere eskerrak ematen dizkio, bide batez.

Beste gai bati helduz, KAE Ligako webgunean aurredenboraldiko plantillak erakusgai jarri dituzte, baina oraingoan arraunlari bakoitzari buruzko fitxa ere eskainiz (adina, klubetako historiala eta abar). Ikusi dut iaz egindako huts batzuk ez dituztela zuzendu, Donostiarrako arraunlari beterano bati 54 urte botatzen baitizkiote, eta, tira, beteranoa bada baina hainbeste ere, ba, ez.

(Argazkia: diariovasco.com)

Donostiarra: 2011 aurredenboraldiko plantillak

2011-03-21T17:22:00.005+03:00

KAE Ligak aurredenboraldiko zerrendak kaleratu ditu: hona hemen Donostiarra taldeko A plantilla eta B plantilla.

Gogoan izan, dena dela, behin-behineko zerrendak direla eta aldaketak izango direla ekainean finkatuko diren zerrenda definitiboetan. Ikusiko dugu zertan diren behin betiko zerrenda horiek, baina badirudi ez-propio gutxiago izango ditugula (36tik 33 propioak dira aurten, 36tik 28 iaz), eta B traineruan izandako batzuk A traineruan izango ditugula aurten.

Bestalde, konfirmatu da Kaskante, Lujanbio, Kintana, Palenzuela, Sistiaga eta Poncek taldea utzi dutela A traineruan eta Zubiri, Iradi, Araujo eta Garcia Molinak B traineruan. Horien ordez Fuente, Viaga, Fidalgo eta Zabala etorri dira A taldera, eta Iñiguez, Galparsoro, Diaz, Villar eta Renteria B taldera.

HITZA: Donostiarrak Londresera begira

2011-03-16T17:35:00.008+03:00

Aurreko blog-sarreran esan nizuen Ur-Kirolak eta Arraun Lagunak Londreseko Head of the River Race estropada ospetsura joango direla. Bi taldeek zortziko seniorra bidaliko dute, eta loiolatarren tripulazio jubenila ere arituko da Tamesisko uretan,

Horri buruzko erreportajea eskaini digu gaurko alean Irutxuloko HITZA egunkariak. Xabier Zabala "Bixkar" da Ur-Kirolakeko entrenatzailea, eta Ekain Iriarte, berriz, Arraunekoa. Bi taldeen esperantzak, helburuak eta zailtasunak izango dituzte mintzagai erreportajean; merezi du irakurtzea.

Hona hemen bi taldeetako arraunlariak:

UR-KIROLAK:		ARRAUN LAGUNAK:
-Xabier Zabala (Entrenatzailea).		-Ekain Iriarte (Entrenatzailea)
-Elias Arruebarrena.		-Xabier Agirre.
-Xabi de Diego.		-Aitor Aranegi.
-Julen Durandegi.		-Alberto Domingo.
-Aritz Etxeberria.		-Ander Paisan.
-Hibai Fuente.		-Ander Iñiguez
-Xabi Goienetxea.		-Ander Iriarte.
-Urko Indaberea.		-Jon Krutxaga.
-Jon Sardon.		-Alex Terrones.
-Mikel Sudupe		-Ander Urtasun.
		-Telmo Yurramendi.
		-Nikolas Yurramendi.
		-Eli Zaballa.

Aulki mugikorreko berriak

2011-03-14T19:27:00.006+03:00

Aulki mugikorreko modalitatean badira albisteak Donostiako klubei dagokienez:

Londresen apirilaren hasieran jokatuko den Head of the River Race estropada ospetsuan Donostia Arraun Lagunak eta Ur-Kirolak taldeko ontziak izango dira, estropada horren webgunean ikus dezakegunez: Arraunek zortziko bat bidaliko du, eta bi zortziko Ur-Kirolakek.

Bestalde, aspaldiko partez 8+ seniorra atera du Loiolako klub gorri-berdeak, eta Gipuzkoako Ligan lehia interesgarria izaten ari da Oriorekin. Ehuneko eskaseko tartean ari dira bata zein bestea estropadak irabazten, emozio handiko estropadetan (hona hemen, adibide gisa azken bi jardunaldietako emaitzak: 5. jardunaldia eta 6. jardunaldia). Kategoria jubenileko zortzikoa ere maila txukuna ematen ari da. Ea bada, animo denei!

(Argazkia: CRO Orio AE)

1948: Franco Kontxako estropadetan

2011-03-09T18:02:00.007+03:00

Blogeko sarrera zaharragoetan, ikusia dugu Franco Kontxako estropadetara etorri zalea zela: horren adibide da 1969ko argazki hau, eta bitxikeria historiko gisa ere aipatu genuen 1948an izan zela diktadorea Kontxan bertan hiltzeko atentatu-saio bat.

Oraingoan ekartzen dizuedan bideoa 1948 urte horretakoa da, hain zuzen, huts egindako atentatuaren urtekoa. Francok hirian izandako harrera ikusten da, Kontxako traineru-estropaden irudiak ere bai, eta, azkenik, Beñardo Elduaien hondarribitarra bandera diktadorearen eskutik hartzen. Atentatuaren artikulu hartan ere gehitu dut bideoa, informazioa osoagoa izan dadin sarrera hartan.

Mendi: pozik baina arduratuta

2011-02-24T18:30:00.010+03:00

Donostiarraren aurredenboraldia zertan doan kontatzen digu Mendik klubaren webgunean argitaratu duten elkarrizketa honetan.

Taldearen prestakuntza ondo doala dio, etapa fisikoak gaindituz, eta taldearekin bat egin nahi izan duten arraunlariak etorri direlako ere gustura dago. Baina, era berean, nabari da buruhauste franko sortzen dizkiotela Donostiarra proiektuak dituen ezaugarri bereziek, hainbat eragozpen eta oztopo sortzen baitituzte eta, horregatik, klubak ezin baitu ahalik eta prestakuntzarik egokiena egin. Tira, nabaritu ez, zuzen-zuzenean esaten du hori Mendik: instalazioak, azpiegitura materialak, beste modalitateek klub historikoekin aritzeak sortzen dituen antolamendu arazoak, eta abar. Horrekin batera, ahalmen ekonomiko eskasa eta sonako arraunlariak erakarri ezina ere aipatzen ditu.

Ea aurreragoko elkarrizketa eta informazioetan berri gehiago jasotzen dugun plantillaren osaerari eta prestakuntzaren aurrerapenen inguruan

2011ko plantilla: alta eta baja batzuk

2011-02-20T23:42:00.002+03:00

Atzo, Oriako XVII. jaitsiera jokatu zen, eta Donostiarrako bi ontzi lehiatu ziren bertan. Aurreko mezuan esan bezala, ez dira estropada hauek udan ikusiko denari benetako neurria hartzeko onenak, baina, egia esan, Ligan lehian izango dituenen atzetik iritsi zen gure A ontzia, eta B ontzia ere hor nonbait; hona hemen emaitzak.

Aztertu behar den puntuetako bat plantillan taldeak izan(go) dituen gorabeherak dira. Eta, horretarako, Orion ikusi genuenarekin batera, KAE Ligako orrian, plantillen datuetan ikus ditzakegun berrikuntza batzuk ditugu argigarri. Dena dela, orri horretan jartzen duena kontuz hartzekoa da, dakigunaren edo uste dugunaren arabera gaizki egon daitekeelako daturen bat.

Orri horren arabera, A taldeko Kaskante, Lujanbio, Palenzuela, Ponce, Kintana eta Sistiaga ez dira Donostiarran izango 2011 urtean (bada zerbait). Luzuriaga (Txinpart) eta Kortadi, ordea, taldean agertzen dira, kontrakorik entzun genuen arren. B taldean, berriz, Iradi, Araujo eta Zubiri ez dira izango.

Datozenen artean, badirudi Jon Fidalgo patroia (Oriakoa bera zen ezta?) eta Hibai Fuente Donostiarrara bueltatu direla, Trintxerpetik Iban Viaga Donostiara itzuli da (aurreko izan zen atzo Orian), Xabier Zabala ("Bixkar" beteranoa) ere itzuli da, eta badirudi Hondarribiatik Oskar Artola etorri dela.

Gainerakoan mantendu egiten da plantillako blokearen zati handiena, eta hori da etorkizuneko bermerik onena. Berriro diot emandako datuok agian ez direla behin betikoak izango,edo akatsen bat izan daitekeela seguruenik, baina hortxe duzue orri horretan ikusi ahal izan dudana.

(Argazkia: CRO Orio AE)

Otsaileko traineru-jaitsierak

2011-02-11T00:02:00.006+03:00

Neguko entrenamendu gogorren monotonia nolabait hausteko-edo, denboraldiko lehen traineru-lehiak datoz, urtero bezala: Bidasoa eta Oriako jaitsierak.

Iaz Donostiarra horietan parte hartu gabe geratu zen, ez baitzen Hondarribikora joan, eta Oriokoa suspenditu egin baitzen, ditxosozko ziklogenesi hori zela eta ez zela.

Aurten berriz, Hondarribira traineru bat (EDITATUA: azkenean badirudi ez dela Donostiarra han izango) eta Oriako jaitsierara bi traineru bidaliko ditu Donostiako klubak. Bidasoakoa igande honetan, otsailaren 13an izango da, 11:00etan hasita; Oriokoa berriz, hurrengo larunbatean, otsailaren 19an, 15:30ean hasita.

Oso berri pozgarria da, era berean, ikustea Donostiako beteranoen bi ontzi izango direla jaitsiera horietan, Ur-Kirolak eta Fortuna klubekoak.

Jakina da oraindik oso goiz dela ondorio seriorik ateratzeko, eta klub bakoitzak bere kasara ekiten diela prestakuntza-estropada hauei, baina, hala ere, gure mutilek ze neurri eman dezaketen sumatzen hasteko aukera izan dezakegu. Eta nola ez, arraun-ikuskizun ederra gozatzeko aukera ere bai.

1928: donostiarrei errieta kazetariak, futbola dela-eta

2011-01-24T23:34:00.011+03:00

1928ko uztailean laugarren aldiz jarraian irabazi zuen Ur-Kirolakeko yolak Espainiako txapelketa, Lakoste, Ituarte, Alvarez eta Bikuña arraunlarien eta Beitia lemazainaren eskutik.

Txapelketa horren euskarazko kronika ederra irakur dezakezue ARGIAko 1928ko uztailaren 29ko alean: lehiaketaren inguruabarrak, sailkapenak, eta abar. Orrialde horretan bertan, aurreraxeago, Kontxako estropaden deialdia eta sariak (12.000 pezeta irabazlearentzat, garai hartan, alajaina) ere ikus ditzakegu.

Hala ere, kronika horretako bigarren zutabean agertzen den zerbait ekarri nahi dizuet hona. Askotan pentsa dezakegu azken urteotako presio mediatikoaren ondorio dela futbolak duen neurri gabeko arrakasta, eta garai batean horrela ez zela uste izateko tentazioa izan dezakegu. Ez da hala, baina. Badakigu Kontxak sekulako ikusmira sortzen zuela, baina hemen ikusiko dugunez, beste arraun modalitateekin ez zen horrela gertatzen. Kontuan izan behar dugu, era berean, 1928 urte horretan sortu zela Futbol Liga, eta, agian horregatik egongo zela kazetaria futbolarekin ("ostiko-jokoarekin") nazkatuta-edo.

Hona hemen zer dioen: "Goragarri, txalogarri dira, bada, Ur-Kirol'dar gazte kementsu auek. Donostiya'ko erriyak orrela ez duala ezagutzen dirudi: batere ajola etzaien bezela agertzen baitira donostiar geienak. Ostiko-jokoa dala ta eztala, erri guztia durduriz eta zalapartaka ikusi oi izan degu, eta orain, ostiko-jokoa baño mila aldiz maitegarriago ta atsegiñago zaigun arraunketa-kirol jatorrean nagusi ta España'ko txapeldun etorri zaizkigun donostiar Ur-Kirolak saillaren alde... ezertxo ere ez; ez txalorik, ez gorapenik mutill gazte kementsu ta jator auei. !Tira esnatu donostiar guztiak, ta eratu zerbait laugarren aldiz España'ko txapeldun azaldu zaizkigun donostiar gazte auen omenez! Gure txalo sutsuenak beretzat dira".

Jarraian, 1925ean ARGIAn bertan argitaratu zituzten bertso hauen bertsio berri osatu bat eskaintzen du. Lasai asko geratuko zen kazetaria! Eta ez zitzaion arrazoirik falta, ze arraio.

(Irudiak: ARGIA aldizkariko hemeroteka)

Angu-Liada, San Sebastian bezperan

2011-01-17T00:38:00.002+03:00

Donostiarraren eta bere babesleen ekimena, San Sebastian bezperan, Sarriegi plazan. Festa eta arraunari laguntza uztartzeko beste aukera bat. Hona hemen argibideak:

http://www.kaiarribadonostiarra.com/Noticias_LeerMas_Eu.aspx?ID=66

Bi ohar

2011-01-06T03:28:00.011+03:00

Urte berri honetan, bestelako albisteen faltan, bi ohar jarri nahi nituzke blog honetan:

A) Entzun dudanez, Donostiako Auzoetako Jai Herrikoien Koordinadorak esker ona adieraziko dio Donostiarra klubari, kaleratu berri duen egutegian hiriko auzoetako datak seinalatzeko ideiarengatik. Entzundakoa egia bada, uste dut oso interesgarria dela klubaren eta hiriko agenteen artean sortzen diren horrelako interakzioak: klubak detalle bat izan du auzoko jaiekin, eta jaien antolatzaileek hori eskertzeko detallea izango dute. Horrela traineruak donostiar herritarrekin duen lotura eta herrian sustraitzeko prozesua egoki sendotzen dela iruditzen zait.

B) Adiskide batek eskatuta, aurreko blog-sarrerako irudi-montajean agertzen diren argazkiak zer erakusten duten jarriko dut. Irudiak zenbakitu ditut, eta hona hemen azalpena:

1) Kontxa 1950ean irabazi zuten Esperanzako arraunlariak. 2) Arraun Lagunakeko trainerua. 3) Kiriko patroi handia. 4) Ur-Kirolakeko trainerua. 5) 1920. hamarkadako Ur-Kirolakeko arraun mugikorreko arraunlariak, aitzindariak euskal arraunketa mugikorrean. 6) Luis Karril handia eta bere kuadrilla. 7) Donostiarrako arraunlari eta entrenatzaileak. 8) Fortunako emakumeak. 9) 1930. hamarkadako Amaikak-Bat elkarteko trainerua, Kontxan.

Azken batean, iraganean, orain eta etorkizunean... donostiarrak arraunean. Gora arrauna, eta gora Donostia!!!

2011 URTE BERRI ON DENOI

2010-12-30T23:32:00.002+03:00

Donostiarraren 2011 egutegia

2010-12-29T00:08:00.011+03:00

Donostiarra taldeak, Radio San Sebastian irratiarekin eta Urkatx arrandegiekin lankidetzan, 2011 urteko egutegia kaleratu berri du.

Iazko estropadetako hainbat argazki ageri dira (A eta B traineruenak), irudi ikusgarri eta dotoreak denak ere, arraunzale donostiarron etxeko edo laneko edozein txoko apaintzeko modukoak. Uste dut detalle polita dela gure taldearen irudiak nonahi agertzea Donostiako etxe eta lantokietan. Eta, gainera, parrandazaleak bazarete, oso egutegi praktikoa irudituko zaizue, Donostiako auzo guztietako festen datak zehaztuta ageri baitira.

Nik txiripaz izan dut egutegi honen berri, eta eskerrik asko abisatu didan adiskideari. Radio San Sebastian irratiko egoitza nagusian (Portuetxe pasealekua, 51) edo Urkatx arrandegietan (Madril hiribidea, 9; Secundino Esnaola, 20; Easo, 63; eta Egia, 6) duzue eskura egutegi hau, musu truk.

Joan, eskatu eta hartu besterik ez duzue egin behar. Nik behintzat hartua dut neronena. Korri zuek, agortu baino lehen!!!

Eguberritan oparitu eta lagundu

2010-12-21T00:41:00.006+03:00

Eguberritan, gogoarekin edo gogorik gabe opariak egin (eta jaso) beharra izan ohi dugu, ondotxo dakizuen bezala. Atseginez oparitzen (eta jasotzen) duzuenak, zorioneko zaudete; aparteko alderdi erakargarririk ikusten ez diogunok, ordea, horrenbestean konformatu beharko: kontra ezer gutxi egin liteke, eta bego beraz ohitura.

Hala ere, opari hauei nolabaiteko toke berezia emateko aukera dugu denok. Alferrikako kolonia, jostailu txepel edo ganora gabeko jantziez gainera, norberarentzat esanguratsua den zeozer oparitzeko aukera dugu (bakoitzak ikusiko du zer den hori). Eta noski, horrekin batera diruz laguntzatxo bat ematen bada, askoz hobeto.

Gure arraun taldeek edozein laguntza pozarren hartuko dute, dudarik gabe. Donostiarraren kasuan, hainbat diseinutako kamisetak, arraunerako "platanoak", estropuak, motxilak eta abar dituzue eskura. Gure-gurea den eta izan nahi duen talde baten opariak egitearekin batera, laguntzatxo bat emango diozue arraun-taldeari.
Horra hor nire proposamena.

PD: Donostiarrako arduradun adiskideak: hurrengo batean hobeto esplika itzazue loteria kontuak eskutitzean, nire familiako eta lagunarteko bazkideetatik bat bera ez baita guztiz aklaratu (ni ere ez). Eskerrak bat egoitzara joan eta han argibideak jaso zituen. ;)

Ricardo Unzueta itzuli da Urkira

2010-12-15T17:42:00.008+03:00

Iñaki Aranak, zazpi urteren ondoren, utzi egin du Ur-Kirolak klubeko lehendakari kargua. Haren ordez, lehenago lan horretan aritutako Ricardo Unzueta itzuliko da.

Irutxuloko HITZAk gaurko alean eskaintzen duen albistean ematen da horren berri. Hona hemen albistea bera, Iñaki Aranaren hitzak, eta Ricardo Unzuetarenak.

Interesgarriak dira klubaren ibilbideari buruz esaten dituztenak, aulki mugikorra berpizteko asmoak (aurten 8+ seniorra uretan izango omen da, eta Londresera joateko intentzioarekin gainera), Donostiarra traineruaren ingurukoak, beren lorpen eta huts-egiteak, eta abar...

Zorte on, Ricardo.

(Argazkia:irutxulo.hitza.info)

Arraunlari donostiar beteranoei omenaldia

2010-12-15T17:28:00.007+03:00

Atzo Gipuzkoako Arraunketaren hamargarren Gala ospatu zen Anoetako Kirol etxean. Urtearen amaieran, arraunaren protagonistei omenaldiak edo gorazarre-aitorpenak egiteko egun berezia izan ohi da.

Aurtengoan, beste sarituen artean, Donostiarrari KAE-1 ligako talde gipuzkoar onenaren bandera eman zioten atzo.

Baina, nire ustez, arraunlari beteranoei eskainitako omenaldia izan zen aipagarriena. Askotan, donostiarrok ez dugu behar bezainbeste baloratzen eta gogoan hartzen Donostian (izan) duguna, eta eskertzekoa da hain justu Donostiatik egindako proposamenen ondorioz izandako atzoko detallea.

Batetik, Benito Elizalde, Eulogio Genoba, Juan Mari Lacoste eta Joxean Jauregi Arraun Lagunakeko beteranoak omendu zituzten. Arraun mugikorrean eta traineruan (Donostiatik kanpo askotan) ibilbide ikusgarriko kirolari handiak.

Eta bestetik, beteranoetan beteranoenak: duela 50 urte 1960ko Erromako Olinpiadetan aritu zen Ur-Kirolakeko zortzikoa (8+): Faustiano Amiano, Trinido Vaqueriza, Santiago Beitia, José Ibarburu, Iñaki Alkorta, J.M. Aristegi, Manolo Ibarburu, J.L. Almandoz, J.A. Almandoz eta Iñaki Egibar (hildako J.M. Leizeaga eta Javier Bela gogoan).

Bejondeiela denei!!

(Argazkia:diariovasco.com)

Antonio Arzaken 1890eko Onentzaroko detallea

2010-12-09T19:23:00.011+03:00

Hemendik gutxira Gabonak ditugu gure artean, eta, horren harira, arraunarekin zerikusia duen pasartetxo hau etorri zait gogora.

Dakizuen bezala, 1890eko abenduaren 2an arraunketaren historiako estropadarik garrantzitsuenetako bat jokatu zen: Luis Karril patroiaren gidaritzapean donostiarrek ondarrutarrei irabazitako desafio ospetsu hura. Pentsatzekoa den moduan, sekulako eupadak, ospakizunak, harrokeriak eta galtzetan pozaren pozez kabitu ezinak bizi izango ziren Donostiako kaleetan.

Hala ere, egoerari beste ikuspegi batetik begiratu zion ezkerrean duzuen Antonio Arzak idazle donostiarrak (1855-1904). Arzak beste donostiar guztien antzera poztu zen estropadaren emaitzarekin, eta gorazarrezko bertsoak ere idatzi zituen Luis Karril eta bere mutilentzat; baina, esan bezala, ikuspegia zabaldu eta galtzaileentzako nolabaiteko kupida ere izan zuen. Horrela, Itz bi Luis Karril eta bere mutillai izeneko idazkitxoa idatzi zuen.

Euskaldunen arteko anaitasuna goraipatu eta gero (Aita Mari ere gogora ekarrita), galtzaileen zoritxarra arintzeko deia egin zien gure arraunlariei eta haien familiartekoei, ikusiz Ondarroan sekulako hondamendia ekarri zuela desafio hark. Eskaera horretan arreta berezia jarri zuen galtzaileen umeengan, etortzear zen Gabon garaian (Onentzaro dio Arzakek) jasan behar izango zuten eskasia are mingarriagoa zela pentsatuta. Merezi du testu guztia irakurtzea, baina nik, adibide gisa, honako hau kopiatuko dut hemen:

"Ez da egiya, Luix, obeto egiñ lekiyokela kontra bendabal eta ekaitzik izugarriyenari, nexka gaxu orren malkuai baño? A!... Nik dakitana da, euskaldun guztiyak nobliak diralarik, ez dala iñor donostiarrari irabaziko diyonik biyotzaren samurtasunian, ez!; eta argatik uste det estropa-festa aundi aben errematerik ederrena izango litzakela zuen aurrak Ondarruako aurrai zerbait siñale egitia, guztiyok anaitzeko Jesus Aurra jaio zan egun artarako! Bai! Bizi gaitian elkar maiterik! Festa t’atsegiñ luzienak laburrak dira, kia bezela dijuaz, gurekiñ batian. Gaur bagera, bigar ez; urak edo lurrak laister iritsiko gaitu, eta utsa litzake emengo estropara guztiyak irabaztia, ango estropara galduko bagenu. Boga, mutillak, boga, zeru aldera!"

Maialen Arrazolari elkarrizketa HITZAn

2010-12-02T17:23:00.006+03:00

Gaurko Irutxuloko HITZAn, Maialen Arrazola arraunlari donostiarrari egindako elkarrizketa ageri da. Arraun Lagunak taldeko harrobian hasitako arraunlari hau Hondarribiako klubean dabil gaur egun, aulki mugikorrean bereziki, eta Espainiako selekzioarekin aritzeko ere hautatu dute. Munduko txapelketan aritua da duela gutxi.

Bere kirol-ibilbidearen hainbat alderdi komentatzen ditu elkarrizketan: nola hasi zen arraunean, nola joan zen Hondarribia aldera, selekzioan izan duen ibilbidea, Munduko Txapelketa, Joko Olinpikoak, eta abar. Aipagarria da emakumeak arraunaren elitean (Kontxan eta Eusko Tren ligan) hasteko moduari egiten dion kritika: "etxea teilatutik egiten hasi garela iruditzen zait".

Pena da horrelako arraunlari bikainak etxean mantentzeko adina baliabide ez izatea Donostian. Bitartean, bere hitzekin konformatu beharko dugu.

Azaroaren 22an hasiko dira entrenamenduak

2010-11-15T23:56:00.002+03:00

Donostiarra klubeko webgunean esaten denez, datorren astelehenean, azaroaren 22an, hasiko dira denboraldi honetako entrenamenduak.

Aspaldiko desioa da udazken garaiko prestaketa-saioak egiteko garaiz hastea, denboraldia behar bezala prestatu ahal izateko. Badirudi aurten izango duela Mendik horretarako aukera.

Plantilla oraindik itxita ez dagoen arren, iazko taldearen gehiengoa konfirmatuta dago, eta hogeitamar arraunlari inguru hasiko dira datorren astean.

Beno, baten bat lehenago hasia da bere kasa entrenatzen, argazkian ikus daitekeen bezala.

(Argazkia: kaiarribadonostiarra.com)

Donostiarraren egoitza olatuek txikitua

2010-11-10T17:51:00.012+03:00

Egun hauetan Euskal Herriko kosta gogor zigortzen ari den ekaitzak ondorio eta triskantza latzak eragin ditu Donostian. Horrelako ekaitzetan kaltetuta gertatzen diren lekuen artean Salamanka pasealekuko eraikinak izan ohi dira. Eta hortxe dago Donostiarrak inauguratu berri duen egoitza berria: Salamanka pasealekua, 13.

Beraz, eta ekaitzak eragindakoa ikusita, espero zitekeen egoitza horrek txikizioak izatea. Eta hala izan da, tamalez. Olatu erraldoiek kristalak eta ate-leihoak puskatu, ura barrura sartu eta barruan zegoena hondatuta geratu da. Webgunean bertan jakinarazi du klubak horren berri, eta hemen jarri ditudan argazki hauek eskaini ditu.

Gertakari tristea izateaz gainera, esan behar da lokal hori handitzeko eta egokitzeko obretan zegoela, eta, horregatik, nolabait bikoitza dela eragindako txikizioa.

Laster konpondu daitezela puskatutakoak, eta animo, bada, klubeko denei.

(Argazkia:kaiarribadonostiarra.com)

Indoor Arrauneko XII. Herri Txapelketa

2010-11-05T00:17:00.004+03:00

Irutxuloko HITZAn jakinarazi denez, datorren azaroaren 20an, Benta Berriko kiroldegian Indoor Arrauneko XII. Herri Txapelketa jokatuko dute, 14:00etan. Lehian parte hartzeko izen ematea zabalik dago dagoeneko eta edonork parte har dezake bertan.

Izen ematea datorren ostegunean itxiko dute, azaroaren 11n, eta web orri honetan egin behar da: www.vermontC2.com/regata2010

Maialen Arrazola donostiarra, 12. Munduko Txapelketan

2010-11-05T00:04:00.007+03:00

Maialen Arrazola 12. sailkatu da, 2X kategorian, Zeelanda Berrian jokatzen ari den Munduko Arraun Txapelketan.

Orain arraunean Hondarribian ari bada ere, Donostia Arraun Lagunak taldeko harrobikoa dugu arraunlari donostiar hau.

Bejondeiola!

Donostiarran estropuak salgai

2010-11-04T23:54:00.000+03:00

Hango eta hemengo arraunzaleen artean ohitura hedatua da estropuak apaingarri edo oroigarri modura erabiltzea. Tipikoa da kotxeen barruko atzerako ispilutik zintzilik ezartzea, klubaren koloreko zintekin apaindua. Haiekin batera eskapularioak zintzilikatzen dituenik ere bada. Eta ez hor bakarrik, joan den astean kostatik kilometro askotara dagoen Nafarroako ostatu batean ikusi berri dut horrelako estropu bat, apaingarri.

Donostiarrak ere ohitura hori indartu nahi du Donostiako arraunzaleon artean, eta argazkian agertzen denaren moduko estropuak jarri ditu salgai. Kolore txuriurdinekoak dira eta bi muturrak elkartzen diren gunean klubaren ikurra du (argazkian ez da ikurra ikusten, buruz behera jarrita zegoelako estropua argazkia egin nuenean).

Kotxean zintzilikatzeko, etxean edo lanean gure traineruaren oroigarria izateko, besterik gabe klubari laguntza adierazteko, edo zer dakit, Gabonetako oparien apaingarri gisa erabiltzeko... nahi duzun bezala erabiltzeko, hortxe dituzu klubaren egoitzan (Salamanca pasealekua, 13, larunbat eguerditan) salgai.

Detalle polita iruditu zait niri behintzat.

Iñaki Arana HITZArekin solasean

2010-11-04T22:37:00.007+03:00

Joan den asteko sarrera honetan esaten zenez, Aldundiak 10 urtez luzatu dio Ur-Kirolaki Loiolako egoitza erabiltzeko baimena. Albiste hori haritzat hartuta, Iñaki Arana presidentearekin solasean aritu da Irutxuloko HITZA gaurko alean.

Egoitzaren kontuaz aparte, Urumea ibaiaren egoera tamalgarria eta bidegorri berriak sortzen dituen eragozpenak aipatu ditu Aranak. Kirol arloan 45 arraunlari dituztela dio, eta berriro ere dei egin die emakumeei: 2 bakarrik batu omen dira arraunera.

Bestalde, Batzar Orokorra egingo du Urkik azaroan, eta presidente berria aukeratuko dute, Iñaki Arana kargua uztekotan omen da-eta.

(Argazkia: irutxulokohitza.info)

HITZAri atxikimendua eta bazkaria Zubigainen

2010-10-28T00:39:00.003+04:00

Hona hemen zer dioen Donostiarraren webgunean argitatutako ohar honek

"Hurrengo larunbatean 11:00etan, Kaiarriba Donostiarraren hainbat zuzendari eta arraunlari batzuk Paseo Berrian egongo dira, konkretuki Oteizaren eskulturaren alboan. Bertan Hitzarekin atxikimendua egin nahi duten guztiak egongo dira. Egunkari euskaldun honek proiektu berri bati ekingo dio, Berriarekin batera, horregatik, argazki bat atera nahi dute euren laguntzaile eta lagun guztiekin.

Hitzak beti eduki du Klubarekiko jokaera bikaina, horregatik Donostiarrak babes hori itzuli nahi dio, etapa garrantzitsu batean euren alboan egonez.

Bestalde, 14:15etan, Kaiarriba Donostiarra Klubak Zubigain soziedadean bazkari bat antolatu du Klubarekin kolaboratu duten pertsona guztientzat. Horrela, pertsona anonimo hauek muxutruk eman duten laguntza hori eskertu nahi da, beraiei esker Kluba hazten ari delako egunetik egunera."

Aspalditik esana dut Irutxuloko HITZAk arraunari, eta bereziki Donostiarrari, eskaintzen dion lekua eta estatusa oso eskertzekoak direla. Pozten naiz klubetik bertatik ere horrela ikusi badute.

Ur-Kirolak beste 10 urte Loiolan

2010-10-28T00:32:00.002+04:00

Gipuzkoako Foru Aldundiko Diputatuen Kontseiluan erabaki denez, Ur-Kirolak arraun-taldeak beste hamar urtez erabili ahal izango ditu Loiolan dituen instalazioak.

Jadanik pasatu dira 40 urte talde gorri-berdea eraikin hori erabiltzen hasi zenetik, 1970 urtean errepide-ingurabidea egin zutenean egoitza zaharra bota eta oraingoa eraiki zutenetik.

Atzoko erabakiaren ondorioz, gutxienez 50 urte bete ahal izango ditu Donostiako arraun-talde historiko honek instalazio horietan arraunaren oraina eta geroa lantzen.

(Argazkia: urkirolak.com)

1891: Donostia Getariaren aurretik, Iparraldekoei mezua

2010-10-17T23:43:00.009+04:00

Guztiz ezaguna da Donostiak eta Ondarroak 1890ean jokatu zuten desafio handia. Luis Karril patroi izanik arraunlari donostiarrek irabazitako estropada hura arraunketaren historian izandako entzutetsuenetako bat da, ospe handienekoa ez bada.

Era horretako norgehiagoken sorburua herri edo kuadrilla batek beste bati botatako erronka izan ohi zen. Ondarroak bere burua garaiezintzat izaki, donostiarrek hori uretan frogatu behar zela bota zieten ondarrutarrei. Horrela eratu zen orain azalduko ez dugun estropada hura (guztiz ezaguna baita).

Kontua da 1890eko garaipen hark sekulako burrundara sortu zuela kosta osoan, eta, noski, donostiarren garailetza zalantzan jarri nahi zutenen desafioak jasotzen hasi ziren kaxkariñak. Desafio horietako asko Iparraldetik ("Frantziatikan") etorri ziren, eta horiei emandako nolabaiteko erantzuna da gaurkoan dakarkigun bertso-paper hau. 1891n Donostiak (Kiriko handia patroi) Getariaren aurretik lortutako Kontxako Banderaren berri ematen da, Iparraldekoei donostiarren ahalmenaren berri emateko; azkenik, erronka onartzen dela adierazten zaie, hitz hutsak albora utzi eta dirua jarri dezatela esanez. Horra bertsoak:

1	7
Estropara bat premiokua	Esan bezela martxatu dira
jokatu da Donostian,	bi treñeruak batian,
jendia franko begira dagola,	kasik bentajan Getariarrak
Agor-illaren zortzian,	bandera ikutu artian;
Kiriko patroi, Pepe aurretik,	jendia franko baziyon begira
biyak mariñell-jantzian;	baztar guziak betian,
bertso berriak jartzera nua	aien dirubak gelditu dira
jakin dezaten Frantzían.	Donostiyako partian.
2	8
Lendabizikua bi txalupetan	Buelta emanda Donostiarrak
Donostiako gaztiak,	aurretik ziraden jarri:
aien pelia bukatu arte	«Ea, mutillak, bentajan gaituk!
egondu ziran bestiak;	-esan zioten alkarri-.
jendia asko kontsolatu du	Lenago ere bazekiagu
gutarrak irabaztiak,	beste oinbesteren berri».
erri ontako semien amak	Aien orduko konsueluak!
eztaude atso tristiak.	Etziran triste etorri.
3	9
Batek gogotik korritu zuben,	Donostiyako kaballeruak
ia ark aña bestiak,	ikustera juan dia,
zein ez giñuen kontsolatuko	gañera berriz eztakit zenbat
aik orrela ikustiak?	Madrid aldeko jendia;
Ogei ta zortzi gizon ondradu	biar bezela kunplitzekotan
amari asko kostiak,	estroparako legia,
oiek dirade Donostiako	Donostiarrak dirade maisu,
Jose-Maritar gaztiak.	artu leizteke fedia.
4	10
Gazte jendia ala jokatzen	Juan dan urtian Ondarroatik
zuten denboran ikusi,	ziran persegiantiak,
Kiriko eta bere lagunak	egun batian egin zituzten
korajez ziraden asi;	aiekiko pakiak;
arraun aundi bat firme arturik	ta aurten berriz Frantziatikan
Pepe jarri zan lenbizi,	arronka asko botiak,
esaten zuben: «ia, mutillak,	obraz ez dira iristen baño
nere juegua ikasi!».	mingañez balientiak.
5	11
Kirikok zorrotz esan zioten:	Frantzi aldeko gizon indartsu
«Jaunak, preparatzen asi;	bizkor intelijentiak,
Getariako gizon oriek	zuen aldian Donostiarrak
bear ditugu ikusi.	daude langille fuertiak;
Azkar gelditzen baldin bagera	aien itestan errenditzeko (sic)
emango degu itxusi,	ez gerade inozentiak,
diru askoko premiyua da,	len egindako zitalkeriyaz
ez degu galtzerik merezi».	gaude bastante betiak.
6	12
Getariako patroia ere	Orra amabi bertso berri ta
etzan aldrebes mintzatu:	bost zentimuan papera,
«Ea, mutillak, denbora da-ta	Frantzian diran bizkorrenairi
oraintxen ondo pentsatu	jarri zaiote aukera:
itxasuari kontra egiñez	diruba berdin depositatu,
arraunak nola dantzatu,	nai dutenian atera,
Donostiako premio ori	Donostiyatik deitzen ditugu
al balegi alkantzatu».	gizonez gizonetara.

Tosta gaineko txintxurra tosta gainean egin behar da

2010-10-05T23:39:00.000+04:00

Liga, Kontxa eta udako bestelako arraun-lehiaketen eguneroko zurrunbiloa dela-eta, ia-ia ahaztuta utzi dut albiste honi buruz zerbait esateko nuen asmoa. Irutxuloko HITZAk ekainean argitaratutako albiste horretan, Untzi Museoak ganbaran antolatutako erakusketa berezi baten berri ematen zen. Untzi Museoaren proposamena gustatu (publikoari, bereziki gaztetxoei, arrauna helaraztea beti da interesgarria, are gehiago era ludikoan egiten bada) eta, ume kurioso batzuk ondoan hartuta, erakusketaz gozatzera joan nintzen duela hilabete pare bat. Urrian, hilabete honetan hain justu, itxiko omen da erakusketa hori, eta horregatik lehenbailehen idazki hau egiteko beharra sentitu dut, egun hartan ikusitakoari buruzko notak nire ordenagailuan ikusi ditudanean.

Erakusketaz 'gozatzera' esan dut, ez baita besterik gabe ikusi (edo entzun) egiten den erakusketa ohikoa. Hemen gauzak ukitu, erabili, sentitu eta bizi egin daitezke, eta, horrela, bisitariek, bereziki haurrek, gauzak hobeto barneratzen dituztela esango nuke. Tresna, gauza, jantzi eta elementu ugari daude eskura (literalki eskura: arraunak, platanito eta bestelako jantziak, palkak, estropuak, kronometroak, ergometroak, megafonoak, jateko barra energetikoak, etab.) eta horrek partaide egiten du bisitaria, ikusle edo ikasle huts baino areago.

Eskertzekoa da klub asko inplikatu izana, bere materiala ekimen honetarako musu truke emanez, gaztetxoei arrauna hurbiltzeak duen garrantziaz ohartuta-edo. Hala ere ohartxo txiki bat egin nahi nioke, dagokionari: kolore guztietako kluben jantziak eta objektuak zeuden (Orio, Trintxerpe, San Pedro, San Juan, Hondarribia, Arkote, Urdaibai, Euskal Selekzioa... eta baita Ur-Kirolak eta Arraunenak ere). Donostiarrarenik, ordea, ezertxo ere ez. Alegia, erakusketa horretatik pasa diren zientoka pertsona etas ume donostiarrek ez dute ikusi Donostiarraren inolako erreferentziarik, tostako arraunketari buruzko Donostiako erakusketa batean. Esan bezala, dagokionari (oharra zeini dagokion ondo ez badakit ere).

Erakusketa nolakoa den? Ea bada. Lehen panel batean nolabait arraun-kirolaren jatorria esplikatzen da, modu bisual eta egoki batean. Arrantza-jardueran duen sustraia azaltzen da, eta gerora kirol bihurtzeko izan dituen urratsak erakusten dira, adibidez, lehiaketa nagusiak nola eratu ziren; eta jakina, lehiaketa guztietan garrantzitsuena da azalpen horien eredu: Kontxako Bandera. Pertsonaia eta tripulazio historikoak, gertakari garrantzitsuenak eta banderaren eboluzioa ikus daitezke, era errazean. Lagungarri gisa garai guztietako argazki, kazeta, agiri eta bestelako testigantzak erabiltzen dira, esate baterako, antzina hain garrantzitsuak ziren bertso-paperak; hona hemen erakusketan azaldutako bat:

Donostiarrak badatoz eta
ikusi zagun sarrera,
benzedoriak nola dakarren
inbenzibleen bandera.

Beste eremu batean kirolarien prestakuntzak izan duen eboluzioa azaltzen da, bai entrenamendu aldetik, bai elikadura aldetik. Ergometroan saio bat egin dezakete haurrek, beste bat erritmoa kontrolatzen duen bitartean paladak zenbatzeko kronometroa eskuan duela. Kirol-jantziak ere hortxe daude eskura, soka batetik zintzilik (bigarren argazkian ikus dezakezuen bezala). Eta dena alderdi ludikoa ez delako, argi uzten da kirol honek sakrifizio dosi handiak dituela eta arraunean ondo aritzeko ba, horixe, aritu egin behar dela (oso deigarria eta egokia iruditu zitzaidan letra lodiz ageri zen esaldi bat, idazki honen izenburu gisa erabili dudana).

Estropaden antolakuntza eta arauak ere lantzen dira erakusketan. Distantziak, kaleak, irteera emateko modua, eta abar. Estropada birtual bat ere hortxe da, maketa modura (ikus lehen argazkia), baliza lana egiten duen buia eta guzti. Kaleen zozketa egiteko kutxa, haga eta bolak ere hortxe dituzte bisitariek, detallerik txikiena ere bazterrean utzi gabe.

Azkenik, arrauneko materiala dago aztergai: traineru, trainerilla eta batelen neurriak, materialak, eraikitzeko teknikak, eta atalen esplikazioak. Trainerugile famatuenen berri ere ematen da. Eta material ukigarri modura, arraunak eta Fontanen palka zahar bat daude... eta estropuak. Tailer gisako bat dago eratuta: gaztetxoei estropuak egiten erakusten zaie eta ondo egiten asmatzen duenak etxera eramango du estropua oroigarri.

Ez dakit oraindik irekita egongo den (urrian baita ixtekoa), baina arrauna maite dugunontzat eta, batez ere, gure haurrek arrauna maitatzea nahi dugunontzat erakusketa oso interesgarria iruditu zitzaidan, eta, nola ez, horren testigantza eman behar nuen nire blog honetan. Zorionak antolatzaileei, eta gure ondarea ezagutarazteko ahaleginean dabiltzan guztiei.

PD: erakusketan esaten da 1879ko Kontxa (lehenengo Kontxako Bandera, alegia) Pasaiako Avantek irabazi zuela. Urte asko eta askotan horrela esan izan den arren, Aguirre Francoren 2002ko liburuan argitu zen hala ez zela izan eta Donostiak irabazi zuela. Dagokionari, ohar hau ere.

Mendiren esaldi bat

2010-10-05T22:27:00.004+04:00

Impulsofijo webgunean, KAE-1 buruzko hainbat komentario eta analisi egin ditu Mendik aurtengo denboraldian zehar. Amaierako ekarpen modura, konkretuki bere lanari buruzko gogoeta egin dezan eskatu diote, eta honako hau erantzun du Donostiarrako entrenatzaileak. Lehendik (aurreko sarreran adibidez) aipatutako ideia batzuk azaltzen dira, eta horiek ez ditut errepikatuko, hobe da Mendiren erantzunak zuzenean irakurtzea.

Alabaina, bere arraunlariei zuzenduriko esaldi hau azpimarratu nahiko nuke, horixe baita, nire ustez, Donostiarrak lehen urte hauetan finkatu beharrekoa:

“Somos los encargados de echar a andar este proyecto con el sacrificio a todos los niveles que ello supone. Nuestra obligación es mejorar la situación heredada y que nuestro legado a generaciones venideras sea igual que con el que nos hubiese gustado iniciar esta andadura”.

Mendi: aurtengo plantilla, etorkizunaren oinarri

2010-10-01T00:01:00.000+04:00

Zinez eskertzekoa da Donostiarrak webgune estatikoa egin ez izana. Alegia, eskertzen dela maiz berrikuntzak aurkitzea bertan, eta konturatzea klubarentzat garrantzitsua dela bazkide eta zale guztiei aldiro-aldiro albisteak eta bestelako informazioa ematea. Bi norabideko zirkuitua (zaleak, bazkideak <-> arraunlariak, kluba) izan ezean, batere bizirik eta etokizunik gabekoa izango baita talde sendo egiteko asmoa.

Joan den astean, presidentearen hitzak jasotzen ziren webgunean; gaurkoan, berriz, entrenatzailearen gogoeta ageri zaigu. Hainbat gauza interesgarri esaten dira bertan, eta hona hemen Mendiren ideia nagusiak:

Proiektua heldutasunera iritsi da, ia atzera bueltarik gabeko egoera batera. Horretan, adierazgarria da donostiar herritarrek aurten taldearekin izan duten inplikazioa. Taldearen eta zaleen arteko lotura hau izango da etorkizuneko bermea, beste helburu handiago batzuk lortzeko. Udalaren eta alkatearen laguntasuna ere eskertzekoa da.
Akats nagusia: neguko lana ondo egin ahal ez izana, hainbat arrazoirengatik. Eta ez da lehen aldia. Horregatik, hobetzeko bide nagusia aurten lan hori behar bezala egitea izango da.
Taldea: Donostian azken 15 urteotan izan den arazorik handiena izan da urtero talde ia berriak zirela, eta horrela oso zaila da epe ertainera ezer eraikitzea. Taldeari jarraitasuna emanez gero, emaitzak etorriko dira. Aurtengo plantilla mantentzea izango da, beraz, etorkizunaren oinarri.
Baja askorik ez da espero, eta, diru gutxi dagoenez eskura (ezin du Donostiarrak arlo horretan lehiatu beste hainbat talderekin, eta TKE liga sortzean Donostiako klubek olatu hori harrapatu ez izana da arrazoietako bat), ilusioa, giro ona eta proiektuaren erakargarritasuna izango dira argumentu nagusiak arraunlariak ekartzeko. Lanean ari gara aurtengo oinarria sendotzeko arraunlariren bat ekartzeko.
B taldean sei edo zazpi arraunlari daude etorkizun ederrekoak, eta goiko taldera igotzea azkenean eratuko den plantillaren araberakoa izango da; alabaina, oro har, nahiago datorren denboraldian B traineruan bere formazioa biribiltzea.

Goitia presidentearen gogoeta

2010-09-21T18:49:00.003+04:00

Donostiarraren webgunean argitaratu berri duten elkarrizketa honetan Alberto Goitiak, klubeko presidenteak, aurtengo denboraldiari eta etorkizunari buruzko gogoeta egiten du.

Taldeak aurten urrats bat eman duela dio, azpiegiturak sendotu direla, eta guztiz eskertzekoa eta garrantzitsua dela instituzionalki bakea lortzeko Donostiako klub historikoek egindako ahalegina, baita udalak emandako laguntza ere.

Horrekin batera, etorkizunari begira Mendi izango da proiektuaren euskarri nagusi; aurten ondo ibili den taldea mantentzea izango da oinarria, lanari jarraipena emateko, eta hortik aurrera proiektuaren erakarmenaz baliatuz (diru askorik ez baitago fitxaketeterako) taldera batu nahi dutenen ekarpena ongi etorria izango da betiere. Eta funtsezkoa, taldea lehenbailehen eratzea, denboraldi honetan udazken-neguetako lanak behar bezala egin ahal ditzan behingoz entrenatzaileak.

Donostiarra 2010eko Kontxako bigarren jardunaldian

2010-09-14T00:07:00.006+04:00

Aurreko igandean esan nuen bezala, berriro ere esan behar dut aipagarria izan zela donostiar arraunzaleek Donostiarrari emandako babesa, bai leiho-balkoietan banderak zintzilikatuz, bai soinean kamisetak jarrita.

Zinez uste dut Kontxako Banderaren aurtengo edizioa inflexio-puntu bat izan dela klubaren eta Donostiako traineru bateratuaren sendotze-prozesuan. Iruditzen zait aurten lehen aldiz ikusi dela argi eta garbi donostiarrek bere egin dituztela traineru hau eta talde hau. Donostiako arrauna maite dutenen traineru bihurtzen ari da Donostiarra. Horixe zen helburua, eta ematen du lortzen ari dela; aurten horixe iruditu zait behintzat. Alde horretatik, urrats garrantzitsua.

Kirol-emaitzen aldetik (hona hemen edizio honetako denborak eta bestelako datuak), bigarren jardunaldian itxura bikaina erakutsi zuen Donostiarrak. Estropadaren lehen herena Pedreñaren pare ibili zen, eta besteengandik ez oso urruti. Hala zebiltzala ikusita, azkeneraino dena ematen jardun zuten gure mutilek eta, nire iritziz, oso emaitza ona lortu zuten: Pedreña 26 segundo eskasera izan zuten, Astillero eta Hondarribia 40 segundora, eta ez San Juanek eta ez Kaiku indartsuak ez zioten minutua atera Donostiarrari (20:46,40). Beste kontu bat izan zen Oriorena, horiek arraunean baino gehiago surfean ibili zirela zirudien-eta, itzulerako luze eder horretan.

Pentsa liteke Kontxa honetan erakutsi duela Donostiarrak baduela nahikoa oinarri etorkizunari behar bezala aurre egiteko. Orain, ea blokea mantentzen den eta ea behingoz udazken eta neguko lana behar bezala egiten den, aparteko arazo eta eragozpenik gabe. Eta geroak esan beza gerokoa...

Neskei deia Ur-Kirolakek, HITZAn

2010-09-10T00:17:00.001+04:00

Iaz emakumezkoen trainerua uretaratu zuen Ur-Kirolakek Kontxako banderan, lehen aldiz. Donostiako emakumeek Kontxan eduki duten lehen ordezkaritza izan zen iazkoa. Hala ere, aurtengoan ezin izan dute taldea osatu, eta, tamalez, ez da Donostiako ontzirik izango bandera garrantzitsuenaren lehian.

Horregatik, Donostiako neska kirolzaleei Ur-Kirolakera joan eta arraunean aritzeko proba egin dezatela dei egin die Iñaki Arana presidenteak, ez baitute aurtengo 'hutsune donostiar' hau hurrengo urtean ere gerta dadin.

Irutxuloko HITZAk Kontxako Banderari eskainitako gehigarri berezian ikus dezakegu hori. Gehigarri horretan, Ur-Kirolaki buruzko albiste horrez gain, Unai Luzuriaga "Txinpart" arraunlariari egindako elkarrizketa mamitsua (agur usaina ere igarri diot, tamalez) eta Kontxako Banderaren historian izandako garaipen-boladak jorratzen dituen artikulua ere baditugu, besteak beste.

Berriro ere, arraunari tarte bikaina eskaintzen dio gure hiriko egunkari honek. Eta, badakizue, neskak, anima zaitezte!

Donostiarrak egoitza berria izango du

2010-09-07T22:17:00.007+04:00

Donostiarra klubak, sortu zenean, Ur-Kirolak eta Arraun Lagunak taldeek Kaiarriban zituzten sotoetan ezarri zuen bere helbide soziala. Besterik ezean egin behar izan zuen hautu hori, nonbaitetik hasi beharra zegoela-eta. Dena dela, ez zirudien lekurik egokiena gauzak kudeatzeko egoitza modura, traineruak eta arraunak gordetzeko sotoak besterik ez baitziren azken batean. Baina ez zen aparteko baliabiderik klubean behar horri aurre egiteko, eta pentsatzen dut izango zituztela buruhauste handiagoak garai hartan, egoitza itxuroso bat lortzekoaren aurretik.

Gerora, goiko argazkian duzuen Bretxako denda ireki zen, antzinako Arrandegiko eraikin zaharrean, zinema-aretoen aurrez aurre. Bereziki ikuspegi komertzialarekin irekitako lokala izan zela iruditzen zait: kamisetak, banderak eta bestelako produktuak saltzeko leku gisa eratu zen, bazkide izateko orriak jasotzeko eta beste zeregin batzuetarako behin-behineko egoitza bezala ere erabili izan den arren.

Hala ere, pentsatzekoa zen egoitza formal baten beharra bazuela klubak. Eta hara, klubaren webgunean gaur adierazi denez, datorren ostegunean inauguratuko da klubaren egoitza berria. Ez nolanahikoa gainera. Alboko bi argazki hauetan agertzen dena duzue.

Salamanka Pasealekuko 13. zenbakian dago, Miramar eraikinean, klubaren izaeraren funtsa den Kantauri itsasoari begira. Gure traineru eta arraunlariei bezalaxe, ez zaio kresalari aurre egin beharra faltako egoitza berriari. Gaur bertan izan naiz bertan bistadizo bat ematen eta kanpotik behintzat itxura txukuna du; jantziz, argazki zaharrez eta garaikurrez dotore apainduta ere ageri da erakusleihoa. Kanpoko itxuraren partez, barruan taldearen arduradunek egingo dutenak izango du, ordea, garrantzia.

Beste urrats bat kluba sendotzeko bidean. Ni behintzat bidelagun izango naute. Ea asko biltzen garen.

Donostiarra 2010ko Kontxako lehen jardunaldian

2010-09-06T22:54:00.011+04:00

Traineruak zer egin duen komentatu aurretik, zeozer esan nahiko nuke kolore zuri donostiarraren inguruan. Pozgarria izan zen ikustea kaian Donostiarraren bandera ugari zeudela zintzilik, eta, era berean, aipagarria iruditu zitzaidan zale asko eta asko zeudela gure klubaren kamisetarekin jantzita. Uste dut ezin ukatuzkoa dela urtez urte goraka doala klubaren kolorez jantzeko animatzen den pertsona kopurua. Proiektua hein batean sustraitzen ari den seinale.

Alabaina, pentsatzen dut, eta zinez triste esan behar dut hau, animo eta arnas eskasa ematen diegula gure traineruari eta arraunlariei. Egia da Kaiarribako sototik arranplara bidean gure mutilek txaloak jaso zituztela donostiar arraunzaleen eskutik, beste guztiek bezalaxe, baina arranplako ur-ertzean, trainerua uretaratzen ari zirenean, beste taldeek samalda koloretsua ondoan izaten duten unean, oso lagun gutxi zeuden bertan, Donostiarrako kamiseta jantzita, beren animoak emateko. Eta berdin lehorreratzean.

Badakit bakoitzak nahi duena animatzeko eta nahi duen klubeko zale izateko eskubidea duela, nola ez, baina Donostiako pertsona asko ikusi nituen atzo beste taldeetako kolorez jantzita, baita donostiar 'ospetsu' zenbait ere... Klub hau (eta bere proiektua) gure sentitzen ez badugu donostiarrok, eta sentitzen dugunok ez badiogu horren berri ematen taldeari, arraunlariak zuzenean animatuz adibidez, jai izango dugu, eta alferrik izango dira gero traineruaren errendimendua hobea izateko desioak (burlak eta gusto txarreko komentarioak ez direnean).
Bestalde, nire txalorik beroenak Donostiarrak kaian jarri zuen "tabernatxoan", dendan eta hegaluxe-mokaduen salmentan eguzkipean aritu ziren direktibo, arraunlari eta bestelako laguntzaileei. Denak estropadaz gozatzen eta haiek hor lanean. Ederra hegaluzea, egia esan behar bada!!!

Kirol arloari dagokionean, zer esan. Aurrena, esan behar da, azken jardunaldietan ikusitakoa berretsiz, Lugañene zaharrarekin aritu zirela donostiarrak. Iazko denbora bertsuak egin zituzten, bai irabazleak (Kaikuk, 19:12,66) eta bai Donostiarrak, 20:20,52. Denboraldiaren berri izan duenak, eta talde gisa funtzionatzeko izan dituzten arazoak ezagutzen dituenak bazekien gutxi gorabehera denbora horretan ibiliko zirela (1:07 atzetik, iaz baino 5 hobeto), nahiz eta minututik jaisteko grina hori hor dagoen. Dena dela, ez da berri txarra Orio, Pedreña, Astillero eta Hondarribia 50 segundo baino gutxiagora edukitzea. Gainera, itzulerako luzea oso ona egin zuten denek (Hondarribiak adibidez 3 segundo eskas galdu zituen Kaikurekin luze horretan), eta hor ere gehiago urrundu ziren tarte txikiagoa lortzeko gure aukerak.

Ea datorren astean gutxienez atzokoa egiten duten, eta hobetzerik balego, primeran. Iaz zertxobait behera egin zuten gurrek bigarren igandean. Animo bada, arraunlariak, eutsi goiari.
Eta zuek, arraunzaleak, jarri banderak balkoietan, jantzi kamisetak, eta joan arraunlariak zuzenean animatzera, kontxo!!!

(Argazkia: diariovasco.com)

Kontxari buruzko webgune onena

2010-09-03T00:14:00.010+04:00

Kontxako banderaren lehen ekitaldia (sailkatzeko estropada) izan genuen atzo, ezusteko nabarmenak eta itsasoko arraunketa-erakustaldi ederrak gozatzeko aukera emanez gainera.

Datozen bi igandeetan, "benetako" bi estropadak izango ditugu, eta historiara pasatuko diren datu ugari ikusi, entzun eta biziko ditugu. Urtero halaxe geratzen baita.

Urtez urte metatuz joan diren datu horiek kontsultatzeko gogoa ere izan ohi du askotan arraunzaleak: zer gertatu zen 1983ko edizio hartan? zein urtetan irabazi zion Oriok Lasarte-Michelini? zein izan zen lehen edizioaren irabazlea? Horiei eta beste galdera gehiagori erantzuna emateko ezagutzen dudan webgune onena aurkeztu nahi dizuet gaurkoan, nahiz eta askok ezaguna izango duzuen honezkero. Blog honen eskuinaldean, Arraunaren Inguruko Webguneak atalean agertzen den lehen estekan daukazue: Kontxako Banderaren historiala. Aspaldiko datu okerrak baztertuz, Rafael Aguirre Francok plazaratu zituen datu zuzenak biltzen dira bertan (bai baita oraindik 1879ko lehen edizioan Pasaiako Avantek irabazi zuela dioen datu-bilduma edo irabazle-zerrendarik).

Hainbat informazio aurkituko duzue bertan: urteak aukeratzeko orri nagusia, herri bakoitzak irabazitako banderen kopurua, urte guztietako irabazleen zerrenda, eta, nola ez, urte bakoitzeko datuak. Hona hemen, adibide gisa, 1896, 1922, 1939, 1956 edo 1989ri buruzko orriak. Sarrera honen irudian ikusiko duzuen moduan, bideoak ere eskaintzen dira urte askotan; berde argiz markatuta dituzue urte horiek orri nagusian.

Besterik ez, bada, hortxe dago datu-festa, horrekin gozatu nahi duenarentzat. Eta zorte on zortzi traineruei Kontxan!!!

2010ko KAE Liga amaitu da

2010-08-31T00:02:00.012+04:00

Horixe ba, amaitu dela aurtengo KAE Liga. Aurrera pauso bat egitea zen asmoa, eta halaxe egin da: 5. postua lortu du A taldeak, 114 puntu batuta (8,14 batez beste). Gogoan izan iaz 7. postua lortu zuela, 88 puntu eskuratuta (5,87 batez beste).

Ia sinbolikoa bada ere, aurten bere lehen garaikurra eskuratu du Donostiarrak: KAE-1eko Gipuzkoako Liga. Esan bezala, klubaren historian lehen garaipena izateak ematen dion garrantzi ia sinbolikoa da bere baliorik handiena; baina bada zerbait, eta izan dadila etorkizunean lortuko diren garaipen garrantzitsuen atari.

Taldea arraunlari beterano eta indartsuz sendotu da, baina badirudi ez dela udazken-neguetako lan egokirik egin ahal izan talde horren arraunketa bateratzeko. Ea datorren denboraldian lortzen dugun behingoz hori, denboraldi dezente baitaramatzagu kontrako urratsez hasita.

B taldeak ere dezente egin du aurrera, eta ez nolanahi. Guztiz etxeko taldea osatu du, bertako arraunlari mordoxka bat elkartuta. Oso gazteak horietako asko. Gure etorkizuna. 8. postua lortu du: 158 punturekin (9,29 batez beste); bada nahikoa jauzi iazko 11. postu, 42 puntu eta 2,9 batez bestekoarekin konparatuta.
Hona hemen, A eta B taldeetan aritu diren arraunlariak, eta bakoitzak jokatutako estropaden kopurua:

A		B
Unai Luzuriaga	14	Xabier Goienetxea (Pat.)	17
Iñaki Andonegi	14	Xabier Agirre	17
Miguel A. Enriquez	14	Oier Iurramendi	17
Ibai Sistiaga	14	Nikolas Yurramendi	17
David Iglesias	14	Ibon Letamendi	17
Jon Sardon	13	Ariel F. Lalosevich	17
Mikel Kortadi	13	Elias Arruabarrena	16
Aitor Aranegi	12	Jon Enbil	16
Imanol Cascante	12	Telmo Yurramendi	16
Juan Mari Lujanbio (Pat.)	12	Julen Yarza	15
Ekain Iriarte	11	Jon Aitor Krutxaga	14
Jon Quintana	11	Alberto Domingo	13
Patxi Olabe	11	Mikel Iradi	12
Igor Palenzuela	10	Luis Garcia Molina	11
Ricardo Ponce	10	Xabier Zubiri	9
Gorka Ibarluzea	5	Xabier De Diego	6
Iker Iturralde	4	Mikel Egaña	4
Ander Iriarte (Pat.)	2	Roman Araujo	3
Telmo Yurramendi	1	Ricardo Ponce	1

(Argazkia: deustuarrauntaldea.com)

Donostiarrak Kontxan zuzenean, bai edo ez?

2010-08-26T13:01:00.023+04:00

Data hauetan, urtero-urtero sortzen da eztabaida: donostiarrek zuzenean Kontxako Banderan parte hartu behar duten edo ez... Bakoitzak bere iritzia izango du honi buruz, baina askotan beldurtu ere egiten da bat jendea zeinen kategorikoa den ikusita.

Tira, hasteko, betiko debekatuko nuke Arraunketaren Olinpiada izendapen hortera eta ezin absurdoago hori. Ezin dut eraman. Olinpiada olinpiada da, eta Kontxako Bandera Kontxako Bandera da. Ez da zertan konparatu, eta Donostiarra klubetik bertatik izen hori erabili izanak halako mutur-okertze bat eragin dit. Hala ere, ni horrelakoa naiz, ez egin kaso handirik.

Jarraitzeko, onartzen dut ez dela atsegina hasiera-hasieratik atze-atzean geratzen den traineru bat ikustea (azken 8-10 urteotan pasa den bezala), are gutxiago zuk maite duzun trainerua denean, eta nolabait kalte egiten diola estropadaren ikuskizunari (bai eta Donostiako klubei berei ere).

Hori alde batetik. Baina, bestalde, donostiarrek besterik gabe lekurik izan beharko ez luketela diotenek ere, gauza asko izan beharko lituzkete kontuan. Postura hau defendatzen dutenen artean bereizi nahiko nituzke arraun-munduan dabiltzanak eta kaleko zaletu 'xume' batzuk. Arraun munduan dabiltzanek badakite Donostiaren berri, eta besterik gabe "onenak irabaz (edo parte har) dezala" defendatzen dute. Eztabaida sakona eta kontsentsua behar da auzia konpontzeko; lehen esan bezala, hau ez baita olinpiada, Kontxako Bandera baizik, eta udal batek era pribatuan antolatzen duen bandera. Eztabaida dadila eta auzia konpondu. Horretan ez dut askorik esateko.
Kaleko zaletu askoren ahotik, ordea (Donostiaz kanpokoez ari naiz), goitik-beherako begiradak, topiko aspergarriak, eta errespetu falta handiak ere jasan behar izan ditu pertsonalki donostiar honek, ezjakintasunaren ahotik, gehienetan. Horiei bizpahiru gauza esan nahi nieke.

Askorentzat Donostia hutsaren hurrengoa da kirol honetan, ez da arraun herri "autentikoa," (berena bai, noski) eta “betidanik” erridikuloa egin du Kontxan. Alabaina, Donostia historikoki erreferentea izan da arraun munduan, hasiera-hasieratik, onenetakoa baitzen traineruak arrantza kuadrillek osatzen zituzten garaian (XX. mendeko lehen hamarkadetara arte). Hala ere, ez da hain atzera joan behar, azken 8-10 urtera arte donostiarrek maila oso duina eman dute: 1980-90 hamarkadetan oso ohikoa zen bi donostiar izatea Kontxako banderan lehian, sailkapen estropadan bere lekua irabazi zuelako bigarrenak (behin hirugarren bat ere sailkatu zen). Eta bestalde, ez da ahaztu behar arraunketa olinpikoaren aitzindari ere izan dela Donostia, 1920ko hamarkadatik bertatik. Bada zeozer Donostia arraunketan, beraz.

Ahaztu gabe, jakina, Donostiak antolatzen duela Banderarik garrantzitsuena, duela 130 baino lehenagotik. Beste batzuen ustez, Kontxako Banderaren fama horretaz “aprobetxatu” nahi du Donostiak. Fama hori airetik edo zerutik etorri izan balitz bezala. Eta ez, ez da zerutik etorri, baizik eta arraunaren herri "ez-autentiko" honek ehun urte baino gehiagoz lan egin duelako estropada hau orain dena izan dadin lortzeko. Kirol honek bizi izan zituen urte latzenetan ere, 1950eko hamarkadan adibidez, estropada-jarduna guztiz ahulduta zegoen urte horietan, beste hainbat herri (denok dakigun salbuespen onrosoez aparte) arraunaz batere arduratzen ez ziren garai horietan, Donostiak herriz herri egindako lana (kuadrillak bildu eta Kontxara etor zitezen konbentzitzeko, sari itxurosoak proposatzeko, Kontxako bandera eta, ondorioz, arraunketa bera bizirik mantentzeko, azken batean) badirudi ez dela aitortu ere egin behar.

Egia da lan hori dena Donostiari komeni zitzaiolako, hiriari sona ematen ziolako, egin zela, baina baita ere kirol hau maite zuten agintari askok lana latz egin zutelako ere. Zenbat bandera jokatzen ziren garai haietan? Zenbat herrik egiten zuen lan arrauna aurrera ateratzeko? Zenbat herrik hartzen zuen kirol honi bultzadatxo bat emateko eta sos batzuk emateko buruhauste arina? Orain oso grazioso geratzen da Odon eta Denisi egurra ematea (ni lehena, aizue, itxurakeriak salatzeko), baina Kontxa bezalako gauza eder bat lortu izana ere ez al zaio aitortu behar Donostiari, meritutxo hori eta meritu horrek dakartzan eskubidetxoak ere ez al zaizkio aitortu behar?

Eta, hala ere, halako goitik-beherako begirada batzuk ere jasan behar dira, baita kirol honetara atzo goizean iritsitako batzuen eskutik ere. Ken daitezela orain donostiarrak paretik, traba egiten dute eta! Ba ez, Kontxako banderaren historiak bere nondik-norakoa izan du, bere izaera propioa eta bakarra du, eta donostiarrei aitortu behar zaie bertan zer egin erabakitzeko eskumena. Azken batean ez delako arbitrariedade askorik egiten, 8 ordez 7 sailkatzeko araua besterik ez dute jartzen. Jakin nahiko nuke askoren iritzia Bandera hau eta bere historia osoa beren herrian kokatua balitz. Eta noski, kritikatzen den gauza bakarra da donostiarren parte hartzea; antza, inork ez du arazorik gipuzkoar guztiek, maila apalenekoek ere, sailkapen-estropadan aritzearekin, nahiz eta bizkaitar, kantabriar edo galiziar 'hobeak' alboan geratu.

Beste kontu bat da zergatik ez duen Donostiak neurri egokia eman traineruan azken urteotan. Kritikoa naiz klub donostiarrek izan dituzten hainbat jokabiderekin, uste baitut ez direla Donostiako arraunaren onerako izan. Baina esan behar da, era berean, adibidez Donostiako trainerilla oso bat blokean beste talde batek fitxatuko balu, oso bitxia izango litzatekeela gero talde horrek Donostiari Kontxan parte hartzeko eskubidea ukatu nahi izatea maila ematen ez duelako aitzakian. Ez dut esan bidezkoa ez litzatekeenik, esan dut bitxia irudituko litzaidakeela. Badakit arrauna aldatu egin dela, eta beste kirol-irizpide batzuk, eta kirola gainditzen dutenak, bereziki, direla nagusi gaur egun (kupoei buruzko eztabaida ere hor dago -ni kupoen aldekoa naiz, askok 'onenak irabaz dezala' ideiaren kontrakoa dela uste badute ere; eta, kuriosoa da, 'onenak irabaz dezala' ideia hutsa matizatu egin behar dela-eta kupoen alde dauden askok 'onenek parte har dezatela' ideia hutsa defendatuko dute agian Kontxan-). Baina bego hor esana esan behar nuena.

Donostiarrek pribilegio guztiak galtzearen kontra EZ dagoen arraunzale batek esaten dizue: edozer gauza defendatzen dela ere, topiko txoroak utzi alde batean, arren; errespetu bat Donostiari.

Presidentearen adierazpenak

2010-08-25T19:51:00.005+04:00

Alberto Goitia, Donostiarrako presidentea, bi aldiz plazaratu zaigu azken egunotan, nolabait denboraldiaren orain arteko balantzea egiteko eta etorkizunerako espero eta nahi duena adierazteko.

Lehenik, klubaren webgunean bertan agertu zaigu, eta ondoren Noticias de Gipuzkoa egunkarian eskainitako elkarrizketa honetan.

Ideia nagusiak: hainbat zirkunstantzia direla-eta, udazken-neguetako hainbat hilabetetan ezin izan da lana behar bezala egin, eta horren isla da aurten ez dela bete-beteko errendimendua eman ahal izan, nahiz eta helburuak bete diren gutxi gorabehera; laneko ildo honi jarraipena emanez gero datozen hilabeteetan eta lan-taldea mantenduz gero, datorren urtean jauzi kualitatiboa emateko esperantza dago, eta 2011n igoerari aurre egiteko moduan izango omen da kluba. Nola ez, Donostiako gizarte osoari dei egiten dio, bai alde sozialetik bai ekonomikotik arnas eman diezaion ekimenari. Donostiarrak Kontxan zuzenean parte hartzeari buruz ere zeozer badio.

Xehetasun gehiago, noski, aipatutako bi elkarrizketa horietan.

(Argazkia: noticiasdegipuzkoa.com)

10.000 alajaina !!!

2010-08-20T00:10:00.005+04:00

Oporretan nabil egun hauetan, eta, zertaz idatzi apuntatzen ari banaiz ere, ez dut ez astirik eta (bereziki) ez gogorik txolarte bat hartu eta idazki bat egiteko. Ondo merezitako oporren alferrean ere ondo bizi baita bat, zer arraio. Hemendik oso egun gutxira hasiko naiz, ostera, zeozer berria idazten.

Hala ere, bistadizo azkar bat eman diot blogari eta, zer ikusiko eta.. 10.000 bisitaren muga gainditu duela, alajaina!!! Ez nuen inondik ere espero, duela urte eta erdi nire gogoetak eta handik eta hemendik bildutakoak hemen idaztea pentsatu nuenean, horrelako oihartzuna izan zakeenik blog honek: 18-20 bisita inguru egunean batez beste.

Beraz, ez dut askoz gehiago esateko, hauxe ez bada: eskerrik asko zuri irakurle, baita zuri ere, zuri ere bai, eta zuri ere bai... eta horrela 18-20 horiei 10.000 aldiz... eskerrik asko. (Hamar) mila esker.

PD: egunak pasa badira ere, ez dut aipatu gabe utzi nahi Joxan Jauregik Donostiarraren webgunean B traineruari buruz esandako hau.

Loiolatarraren San Inazioko estropaden historiala

2010-08-07T00:59:00.007+04:00

Duela aste batzuetako blog-sarrera honetan, Loiolatarra elkarteak San Inazio egunean egin ohi dituen batel-estropadak aipatu nituen. 1983an jokatu zen estropada hori aldiz. Ordundik hona, urtero jokatu da estropada hori, eta ezin da aipatu gabe utzi elkarte horrek ibai-arraunketa sustatzeko eginiko ahalegina.

Foro bateko mezu batean jakinarazi denez, Gipuzkoako Aldundiko web orri honetan Loiolatarrak antolatutako estropada honen edizio guztien berri ematen da: emaitzak, denborak, eta baita urte batzuetako irabazleen tripulazioak ere. Aipatzekoa da 1986 eta 1987an Loiolatarra bera izan zela irabazlea.

Datu interesgarriak, inondik ere. Honen bidez, elkarte horrek duen meritua aitortu nahi nuke.

On-line denda webgunean, eta bazkide-kanpaina berria

2010-08-04T00:06:00.006+04:00

Etengabeko berrikuntzak egiten ari da kluba bere webgunean, eta berri pozgarria da hori, niretzat behintzat. Lehengoan, bideoteka gehitu zuten. Oraingoan, bi ekimen berri jakinarazi dituzte baliabide horren bitartez:

1) On-line denda: jakinik Bretxako denda dotoreak ordutegi murritza duela, edo jendeari agian deserosoa gertatuko zaiola Parte Zaharrera ordu jakin batzuetan etorri beharra, baliabide ezin praktikoagoa da horrelako denda bat jartzea Interneten. Ea ohiko apalkeria bazterrean utzi eta Donostian bandera eta kamiseta gehiago ikusteko bidea ematen duen ekimen honek.

2) Bazkide-kanpaina berria: 1.000 bazkide izatetik 2.000 izatera iristea da helburua. Masa soziala eta oinarri ekonomikoa sendotzea ezinbestekoa baita. Bazkideok ere mugitu behar dugu, proiektuaren zabalkundean transmisio-uhal lana egiteko.

Zorionak klubeko arduradunei, eta segi horrela.

B trainerua bikain

2010-08-02T00:02:00.014+04:00

Askotan, gehiegitan, goi mailako gauzei bakarrik erreparatzen diegu, kontuan izan gabe normalean gauza xumeetan dagoela benetako gauzen autentikotasuna. Donostiarra traineruan ere, zaleon artean behintzat (pentsatzen dut klubean ezetz), sarritan iruditzen zait ez diogula benetako garrantzia ematen atzetik datozen gaztetxoek egiten duten lan isilari. Lan isil baina ezin garrantzitsuagoari, esango nuke. Etorkizuna ondo asentatu nahi bada, oinarri egokia ezarri behar zaio Donostiako arraunari, eta dudarik ez dago B traineruan tiraka ari diren horiek direla etorkizuna.

Zer-nolako etorkizuna dugu ba, ontzi horretan? Ikus dezagun: adibide modura, asteburu honetako bi estropadei begiratuta, ikusiko dugu 16 arraunlari aritu direla Lugañeneko tostetan bi egun horietan, eta azpimarratu behar da 16 arraunlari horiek, guztiak, etxekoak direla, propioak, Donostian arraunean hasitakoak, eta, bakarra salbu, denak donostiarrak. Eta, batez besteko adina, 21 urtekoa da. Kontuan izanda 16 kirolari horietatik 12k ez dituztela 22 urte baino gehiago, eta haietatik 7 ez direla iristen 20 urtera oraindik, gauza nabarmena eta pozgarria da oso ontzi gaztea dugula.

Plantilla horrekin, B trainerua maila txukuna ematen ari da KAE-2 Ligan: 4 txanda daude (16 talde daudenez) liga horretan, eta hirugarren txandan (hau da, bigarren onenean) sartzea lortu dute, 8. postuan baitaude gaur egun.

Uste dut Joxan Jauregiren lana oso ona izaten ari dela, eta A trainerukoak eliterako bidearen bila ari diren bitartean, B trainerua egiten ari den lana dela benetan Donostiako arraunaren etorkizuna asentatuko duena. Aitor diezaiogun, bada, talde horri bere meritua, eta jaso ditzatela arraunlari horiek behar eta merezi bezainbeste animo. Etxean luzaro egingo ahal dute beren ibilbidea!!!

Unai Luzuriaga "Txinpart" Donostiarraren webgunean

2010-07-28T23:20:00.008+04:00

Donostiarra klubaren webguneak eskaintzen duen informazioaren artean, Unai Luzuriaga "Txinpart" arraunlari beteranoari egiten zaion elkarrizketa hau gehitu dute gaur.

Kirol-ibilbide luzeko arraunlari donostiar honek hainbat gauza komentatzen ditu, eta irakurtzea gomendatzen dizuet. Hona ideia nagusiak: pixka bat goraxeago egotea espero zuten; maila oneko arraunlariak daude klubean, baina oraindik talde modura guztiz bateratu gabe daude, eta plantillari eutsiz gero (garrantzitsua da hori), datorren urtean pauso nabarmena emango luke traineruak arlo horretan. Bere kirol-bizitzako azken urratsak etxean emateko asmoz itzuli da Donostiara, traineru bateratuaren proiektuan beti sinetsi izan duelako, eta esperientzia zabalarekin eskain dezakeen laguntza emateko prest.

Oso arraunlari kuttuna izan dut Unai Luzuriaga betidanik; adiskide ez banaiz ere, txikitatik ezagutzen dut, eta pertsona ezin jatorragoa izateaz gainera, arraunlari izugarria eta langilea iruditu izan zait beti. Edozein giza talderentzako funtsezkoa. Traineru bateratuaren proiektua gauzatu zenean, ezinbesteko pieza izan behar zuela pentsatu nuen, dudarik gabe gainera, eta guztiz poztu nintzen aurten itzuli zela jakitean. Urtero denboraldia amaitzen denean trasteak utzi eta erretiratzeko gogoa zinez ulertzen badut ere, espero dut oraindik ere puska batean arituko dela tostan jo ta fuego, Donostiako arraunaren etorkizunari arnas ematen.

PD: Norbaitek esan diezaiola KAE Ligari Unairen fitxan agertzen den adina ez dela zuzena. Mirari bat litzateke 53 urterekin duen sasoia izatea. :)

TKE Ligako ordezkari donostiarrak

2010-07-23T00:13:00.002+04:00

TKE Ligara igotzeko asmoa eta helburua du Donostiako ordezkari zuzena den Donostiarra traineruak. Hala ere, hori noiz gertatuko zain, sutsuki zain, gauden bitartean, ezin dugu ahaztu badirela arraunlari donostiarrak TKE Ligan dabiltzan beste ontzietako tostetan. Hamabi dira arraunlari horiek, eta ez nolanahiko arraunlariak gainera.

Horra: Gabi Larrinaga, Iñaki Arrieta, Loren Jauregi, Iker Aranburu eta Lander Larrauri, San Pedron; Axier Kolina, Haritz Etxebeste eta Fernando Balentziaga, Orion; David Sainz, Alain Osanbela eta Ion Piñeiro, San Juanen; eta Asier Etxebeste, Castron.

Gai horixe jorratu du Irutxuloko HITZA egunkariko Itzurun gehigarriak bere gaurko alean. Elkarrizketa egiten zaie arraunlari horiei, eta aurtengo denboraldian egindakoari eta egitea espero dutenari buruz mintzo zaizkigu.

Guztiz artikulu interesgarria; eta, beste behin ere, aipagarria eta eskertzekoa da Irutxuloko HITZAk arraunari eskaintzen dion tarte mamitsua.

Donostiarra zazpigarren Gipuzkoako txapelketan

2010-07-21T22:02:00.002+04:00

Donostiarrak zazpigarren postua lortu du, gaur etxean, Kontxan, jokatu den Gipuzkoako Traineru Txapelketan. Badirudi Donostiarrari asko gustatzen zaiola postu hori, orain arte jokatu dituen lau txapelketetan (hiru Gipuzkoakoak, eta bat Euskadikoa) postu berbera lortu baitu. Eta ez da ahaztu behar KAE Ligako aurreko bi denboraldietan ere zazpigarren geratu dela.

Espero dezagun laster hautsiko dela joera hori, postu hobeagoak lortuz. Hona hemen gaurko denborak:

1	HONDARRIBIA	20:05,68
2	SAN JUAN	20:09,00
3	ORIO	20:26,40
4	ZUMAIA	20:54,12
5	SAN PEDRO	20:59,88
6	ZARAUTZ	21:07,74
7	DONOSTIARRA	21:28,46
8	GETARIA	21:48,82
9	TRINTXERPE	21:51,00
10	HIBAIKA	22:30,54

Felix Erdozia hil da

2010-07-21T16:32:00.003+04:00

Gipuzkoako Arraun Federakuntzak bidalitako ohar baten bidez jakinarazi da Felix Erdozia Martiarena hil berri dela, 95 urte zituela.

Urtetan Ur-Kirolak taldeko arraunlari izandakoa, gero talde horretako entrenatzaile izan zen, baita klubeko presidentea ere 1949 eta 1971 bitartean. Gerora, 1971 eta 1984 bitartean, Espainiako Arraun Federazioaren presidente ere izan zen. Seguruenik, bera izan zen arraunketa olinpikoa indartzen ahalegin handiena egin zutenetako bat.

Besarkada bat arraun munduko pertsona garrantzitsu honen senitarteko eta adiskide guztiei.

(Argazkia: Felix Erdozia, berari egindako omenaldi batean, Lasurtegi eta Climent arraunlarien artean: diariovasco.com).

Martin Berasategik Donostiarraren propaganda ETBn

2010-07-18T00:19:00.001+04:00

Aspalditik ezaguna da Martin Berasategi sukaldari handia xaltxa guztietan ibili zalea dela. Lan isil asko egina da Martin, dudarik gabe, baina jendaurreko plaza zaratatsuetan agertzea oso gustukoa duela ere ezin uka.

Kontua da uztailaren 15ean berriro ere telebistan agertu zela, beste sukaldari famatu baten programan, hain zuzen: David de Jorgek aurkezten duen Robin Food programan.

Eta hara non agertu zitzaigun Donostiarra traineruko bandera atzean zuela, lepoan zapia jarrita, eta mahai gainean zapia eta txanoa, denak ere klubaren ikurrarekin. David de Jorgek ere lepoan du zapia. Traineruari arnas ematera deitu zituen arraun zaletuak, eta txiki-txikitatik ezagunak dituen klubeko arduradunak goraipatu zituen (Joserra Mendizabal, Mendi, eta Joxan Jauregi bereziki, Parte Zaharrekoak izaki, Martin bezalaxe).

Kuriosoa egin zait horrelako programa batera joatean Berasategik izan duen okurrentzia edo detallea; baina traineruaren oihartzun mediatikoa eta taldearen sozializazioa indartzeko balio badu, bejondeiola Martini.

Programa osoa ikusi nahi duenak, hemen du aukera (1:20 - 2:50 minutuan egiten du "propaganda"), eta mendrezka ezin goxoagoa egiteko jarraibideak ere ikasiko ditu, bide batez. On egin!

Mendiren gogoeta Donostiarraren webgunean

2010-07-15T00:06:00.006+04:00

Badira aste batzuk Donostiarra klubaren webgunea martxan dabilela. Informazio interesgarri asko eskaintzen du, eta albiste eta gogoeta eguneratuak ere bai. Oraintsu, bideoak eskaintzen dituen atala gehitu dutela ikusi dut. Hobetzeko alderdi batzuk ere badituen arren, hori komentatzea agian beste egun baterako utziko dugu.

Oraingoan, Jose Ramon Mendizabal, Mendi, Donostiarrako entrenatzaileak egindako analisi bat eskaintzen digu webguneak. Lehen bost jardunaldi hauen ondoren gertatutakoaz eta denboraldi honetan traineru donostiarrarekin espero dezakegunaz mintzo da Mendi. Uste dut interesgarria dela eta esperantzarako bidea ere ematen digula donostiar arraunzaleoi, banderak lortzeko aukera ere ez baitu baztertzen. Ligarako, ideia nagusi bat du Mendik: erregulartasuna da gakoa eta Elantxobeko hankasartzea ezin da errepikatu. Hala bedi.

Beste webgune batean ere kolaboratzaile moduan artikuluak idazten ditu Mendik. Impulsofijo izeneko webgunean KAE-1 ligari buruzko iritziak plazaratzen ditu bere atal berezian. Arraun munduko kirolari, entrenatzaile eta kazetari interesgarrien lankidetza lortu dute Impulsofijoko arduradunek; zorionak haiei.

Donostiarrako arraunlariak Kaiko jaietako txupinazoan

2010-07-14T00:02:00.005+04:00

Asteburu honetan, Donostiako Kaiko Karmengo jaiak (eskuineko Karramarro sinpatiko hori ikurtzat duten jaiak) ospatuko dira.

Osteguna, uztailaren 15a, izango da jaien lehenengo eguna. Hasiera-ekitaldi nagusia, egun horretako iluntzean, 20:30ean, botako den txupinazoa izango da. Eta Donostiarra traineruko arraunlariek izango dute txupinazo horretako etxafuegoa pizteko ardura eta ohorea.

Ondo pasa Kaieko jaietan!!

Xabier Zabala "Bixkar"

2010-07-04T12:55:00.009+04:00

Irutxuloko HITZAk ostiraletan kaleratu ohi duen ITZURUN gehigarriko aste honetako alean, Xabier Zabala Bixkar arraunlari eta entrenatzaile donostiarrari egin diote elkarrizketa.

Xabier Zabala (hona hemen KAE Ligan duen fitxa) Ur-Kirolakeko arraunlari eta entrenatzaile izandakoa da ("Nire bihotzeko kluba Urki da" dio elkarrizketan), eta hainbat talde eta klubetan egin du arraun bere kirol-ibilbidean. Azken urteetan Hernanin dabil, gaztetxoekin lanean bereziki, hango arraun-tradizioa berreskuratu eta sendotu nahian. Kirol arloan dituen buruhausteez gainera, AHTko obrek egoitzarik gabe utziko dituen kezkari ere egin beharko dio aurre. Arraunlari gisa, berriz, San Pedron arituko da aurten, gero erretiratzeko asmoa badu ere.

Artikulu mamitsua da, eta guztiz gomendagarria, hango eta hemengo arraunari buruzko gauzak jakin nahi dituenarentzat. Donostian arraunak duen egoerari buruz (harrobiaren inguruan batez ere) esaten duena ere aipagarria iruditzen zait: "Bai Urkin eta bai Arraunen dominak lortzera iritsi ginen talde asko egon ginen. Orain, ordea, badira urte batzuk beheko mailetan emaitza onik lortzen ez dutela. Kategoria txikietako lana nahiko utzia dagoela iruditzen zait".

Banyoles: Arrauneko beteranoek beste urre bat

2010-06-28T00:02:00.002+04:00

Asteburu honetan, aulki mugikorreko modalitateko Espainiako txapelketak jokatu dira Banyolesen. Eta, donostiarrei buruz esan behar da bai Arraunek bai Urkik hainbat kategoriatan parte hartu dutela.

Aipamen berezia egin behar zaio Arraun Lagunakeko beteranoen 8+ ontziari. Urrezko domina lortu dute, eta, horrela, beste garaipen bat metatu du ibilbide ezin dotoreagoa daraman beterano talde honek.

Banyoleseko Espainiako txapelketen emaitzak aurkituko dituzue hemen, eta beteranoen emaitzak, berriz, hemen.

Aurkezpena Irutxuloko HITZAn

2010-06-24T00:10:00.010+04:00

Irutxuloko HITZAren gaurko alean, Donostiarrak larunbatean egindako aurkezpenaren berri ematen da. Blogaren aurreko sarreraren osagarri izan daitezkeen hainbat datu eta Mendiren adierazpenak biltzen dira. Ez ditugu lehen esandakoak errepikatuko, eta albistera joan dadila gehiago jakin nahi duenak. Hala ere, datu esanguratsu batzuk azpimarratu nahi ditut:

Dirudienez, Igor Palenzuela zalantza da oraindik: amaitzear du Irungo Santiagotarrak taldearekin aulki mugikorreko denboraldia, eta jaso dezakeen lan-eskaintza baten zain omen dago.

Zuzendaritzaren garrantzia azpimarratzen du Mendik, "behar bezalako zuzendaritza daukagu, bere pentsamolde propioarekin, eta hainbat arlotan proiektua sendotzea lortzen ari dira".

Horretarako urrats bat, webguneaz gainera, lokal komertzial berria da. Bretxako arrandegiaren eraikinean dago, zinemen aurrean. Biltegi moduan erabiltzen dute eta Donostiarrako arropak ere salgai dituzte bertan. Larunbat eguerditan irekitzen dute.

Etzi, beraz, lehen saioa. Hantxe izango gara, mutilei arnas emateko.

Gaurko aurkezpena: Torrekua abian da

2010-06-19T22:33:00.008+04:00

Ikusten duzue argazkian: Donostiarraren traineruak Torrekua izena izango du. Horixe jakinarazi da gaur kaiean izan den aurkezpenean.

Pertsonalki, esan behar dut asko gustatu zaidala traineruarentzat aukeratu duten izena, kaiaren eta, oro har, Donostiako arraunaren historian guztiz errotuta dagoen izena baita. Luis Karril handia Torrekua izengoitiaz ezaguna zen (blog honetan duela urtebete azaldu nuen moduan), Torrean bizi baitzen, antzinako Itsas Kontsuletxean (gaur egungo Untzi Museoan), hau da, Donostiarra klubaren ikurrean agertzen den eraikinean. Lehenagoko traineruan Kiriko handiari egindako omenaren ondoren, ezin egokiagoa iruditu zait izena.

Bestalde, esan behar da aurten babesleak (Toyota, Bretxa, Druck, Egun On, Casino Kursaal) azalduko direla Torrekuaren kroskoan.

Traineruaren eta Donostiarrako plantillaren aurkezpena egin da gaur eguerdian. Entrenatzaileak eta presidenteak hitz batzuk esan dituzte, hastear dagoen denboraldiaren inguruan. Gero, hamaiketako xume bat eskaini zaie bertaratu diren bazkide eta zale guztiei. Era berean, bazkideak biltzeko ekimenean aurrera jarraitzen dutela plazaratu da, helburu berria jarriz: 2.000 bazkide. Ez dakit 1.000ra iritsi garen, baina ez dago gaizki asmoz behintzat oso gora jo nahi izatea.

Tira, bihar bertan hasiko da B traineruaren denboraldia, eta datorren asteburuan traineru nagusiarena; ea zer nola ekiten dioten lehiari: aurrera bada, Torrekua, eta aurrera Lugañene!!

PD: eskerrik asko aurkezpenean gertatutakoaren berri eta bertako argazki hauek eman dizkidan adiskideari. Aurreko sarrera batean esan nuen moduan, horren berandu abisatu zutenez beste hitzordu bat nuen gaurko, eta ezin izan naiz aurkezpenean azaldu. Mila esker, adiskide.

Hona hemen plantillak

2010-06-18T00:10:00.009+04:00

Hona hemen Donostiarra taldeak 2010 denboraldirako KAE Ligan izango dituen plantillak. Ezkerrean A trainerukoak (Mendiren gidaritzapean), eskuinean B trainerukoak (Joxan Jauregi izanik entrenatzailea). 22 arraunlari ditu zerrenda bakoitzak; hori bai, izenaren ondoren "*" ikurra duten arraunlariak bi zerrenetan, A eta B trainerukoetan, ageri dira:

A	B
Aitor Aranegi	Alberto Domingo
Ander Iriarte*	Alberto Rebollo
Asier Lopez	Ander Iriarte*
David Iglesias	Ander Paisan
Ekain Iriarte	Ariel F. Lalosevich
Gorka Ibarluzea	Elias Arruabarrena
Ibai Sistiaga	Ibon Letamendi
Igor Palenzuela	Jon Aitor Krutxaga
Iker Iturralde	Jon Enbil
Imanol Cascante	Julen Yarza
Iñaki Andonegi	Luis Garcia Molina
Jon Quintana	Mikel Egaña
Jon Sardon	Mikel Iradi*
Juan Mari Lujanbio	Nikolas Yurramendi*
Miguel Angel Enriquez	Oier Iurramendi
Mikel Iradi*	Ricardo Ponce*
Mikel Kortadi	Roman Araujo
Nikolas Yurramendi*	Telmo Yurramendi*
Patxi Olabe	Xabier Agirre
Ricardo Ponce*	Xabier De Diego
Telmo Yurramendi*	Xabier Goienetxea
Unai Luzuriaga	Xabier Zubiri

Bazkideeen eguna eta plantillen aurkezpena

2010-06-17T00:17:00.001+04:00

Hona hemen Donostiarraren webgunean argitaratu duten oharra (post-data bat dut amaieran klubekoentzat):

Bazkideen egunaren ospakizuna, hamaiketakoa eta taldeen aurkezpenarekin

Larunbat honetan, ekainak 19, Donostiarra-Kaiarriba Arraun Elkartearen bazkideen eguna ospatuko da Donostiako portuan dagoen Arrantzaleen Kofradian, eguerdiko 12:00etan. KAE-1 eta KAE-2ko denboraldiak hastear daudenean, Klubak bazkideei eskerrak eman nahi dizkie beraien babesagatik, beraiek gabe Donostiarraren proiektua ezinezkoa izango litzatekeelako.

Horregatik, deialdia egiten zaie bazkideei, jarraitzaileei eta komunikabideei festa honetan parte hartzeko. Bertan, “A” eta “B” taldeko arraunlariak banan bana aurkezteaz gain, Alberto Goitia lehendakariak eta “A” taldeko entrenatzaileak, Jose Ramon Mendizabalek, hitz batzuk esango dituzte.

Hamaiketakoa dohainik egongo da denontzat, taldeko armarria duen kristalezko edalontzi bat erosi ezkero. Fruitu lehorrak, txistorra eta tortila pintxoak, sagardoa, garagardoa eta ura egongo dira nahi adina.

Animatu eta hurbildu!

PD: lehenago abisatu izan balute, bertan izango nintzen... baina bi eguneko aurrerapen eskasez abisatuta, ba ezin izango dut, beste zerbaiterako hitzordua baitut. Ez dakit beste norbaiti ere pasatuko zaion, baina, horrelako gauzak antolatzea gauza arazotsua izan daitekeela onartuta ere, eskertzekoa litzateke aurrerapen handiagoz egitea horrelako deialdiak hurrengoetan. Ondo pasa, zoaztenak.

Ekaineko denboraldi-aurreko estropadak

2010-06-12T23:25:00.009+04:00

Azken bi asteburu hauetan, traineru-ligak hasi aurreko bi estropada ohikoak jokatu dira Lekeitio eta Mutrikun (emaitzak ikusteko egin klik hemen eta hemen).

Oso ondo ez dakit entrenamenduaren progresioa nola daraman edo eraman nahi duen Mendik, eta bestalde, bereizi egin behar dira prestakuntzako estropada hauek eta benetako lehiaketetako estropadak. Hala ere, emaitzak ikusi besterik ez dago ondorio pare bat ateratzeko.

Santurtzi, Isuntza eta Zierbena aurretik ditugu, eta Kantabria aldean Camargo ematen ari den neurri egokiarekin (ikus Caja Cantabria banderako gaurko emaitzak), pentsa liteke ohorezko txandan sartzea gauza borrokatua izango dela. Bi estropada hauetan 20 - 30 segundo atzetik ibili dira donostiarrak.

Ziabogen denborak ikusita, iruditzen zait bi estropadetako lehen hiru luzeetan nolabaiteko maila txukuna eman duela traineruak eta azken luzean beherakada izan duela.

Tira, ekainaren 26an eta etxean (Donostian) hasiko du benetako lehia Donostiarrak, eta ikusiko dugu non kokatzen diren lehen postuak lortzeko norgehiagoka horretan. Animo, bada.

(Argazkia: destuarrauntaldea.net)