Donostiako klubak aulki mugikorreko txapelketetan

Atzo jokatu zen Legution aulki mugikorreko 8+ kategoriako Euskadiko Txapelketa. Joan den asteburuan Gipuzkoako Txapelketa jokatu zen Orion. Donostiako bi klubetako zortzikoak izan ditugu bi txapelketa horietan.

Hona hemen emaitzak:

EUSKADIKO TXAPELKETA
1. Hondarribia A 05:49,11
2. Orio  05:56,41
3. Hondarribia B 06:02,11
4. Ur-Kirolak 06:07,23
(Donostia Arraun Lagunak sailkapen-estropadan kanporatuta geratu zen)

GIPUZKOAKO TXAPELKETA
1 Hondarribia A 04:10,27
2 Orio 04:16,11
3 Hondarribia B 04:24,55
4 Donostia Arraun Lagunak 04:28,14
(Ur-Kirolak sailkapen-estropadan kanporatuta geratu zen)

(Argazkia: Luis Lizarralde)

Head of The River Race

Hilabete honetan Head of the River Race estropada ospetsua jokatzen ari da Londresen. Atzo, seniorren txanda izan zen: hona hemen emaitzak.
Ikus dezakezuenez, postu hauetan geratu dira donostiarrak:

• Ur-Kirolak (86.): 19:15,50
• Donostia Arraun Lagunak (89.): 19:16,60

Joan den astean, emakumeen estropada jokatu zen: Ur-Kirolak 113. postuan iritsi zen, 22:43,44

Beteranoen estropadan, berriz, Donostia Arraun Lagunak 6. postuan iritsi zen (2, bere kategorian), eta Ur-Kirolakek eramandako bi zortzikoek 40. eta 120. postua lortu zuten.

Hedabideetan izan du oihartzuna estropada honek:

• Unai Elizasuk BERRIAn egindako kontakizun ederra 
• Noticias de Gipuzkoa Donostia Arraun Lagunakeko talde beteranoaz ari da artikulu honetan, Canal aita-alabak haritzat hartuta (aita arraunlari, alaba lemazain).
• Irutxuloko HITZAn hainbat protagonistari egindako elkarrizketa.

Head of the River estropadari begira

Aurten ere, urtero bezala, Londresen “Head of the River Race” aulki mugikorreko estropada antolatuko da Londresen, 8+ ontzientzat.

Aurreko urteetan bezala talde donostiarrak bertan izango dira. Ur-Kirolak klubak jakinarazi duenez, aurtengoan zortziko hauek bidaliko ditu Londresera:

Martxoaren 3an, nesken zortzikoa izango da bertan.
Martxoaren 17an, senior mutilen ontzia.

Martxoaren 18an, beteranoz osatutako bi zortziko.

Estropaden partaide-zerrendan ikusten denez, zortziko seniorra bidaliko du Donostia Arraun Lagunak-ek ere, eta pentsatzekoa da beteranoak ere bertan izango direla, azken urteetan izan diren bezala, emaitza onekin gainera. Zorte on denei!

URUMEAKO I. BINAKAKO JAITSIERA

Atzo, igandean, abenduaren 4an, Urumeako I. Binakako Jaitsiera jokatu zen, Ur-Kirolak taldeak antolatuta. 2x eta 2- modalitateak aritu ziren Donostiako ibaian behera, eta lau talde hauetako ontziek hartu zuten parte: Donostia-Arraun Lagunak, Santiagotarrak, San Juan eta Ur-Kirolak. Guztira, 24 ontzik.

Helbide honetako pdf fitxategian aurkituko dituzue jaitsiera horretako emaitzak eta denborak. Eta, Ur-Kirolaken eskutik, jaitsierako hainbat irudi ikus ditzakezue argazki-sail honetan.

I. ANTXON BEITIA JAITSIERAKO EMAITZAK

Ur-Kirolak taldearen webguneko orrialde honetatik atera dugun informazioa:

"Gaur, azaroaren 20ean, Antxon Beitiaren Omenezko I. Skiff jaitsiera ospatu da Urumea ibaian. Bi taldek hartu dute parte, Donosti-Arraun eta Ur-Kirolak, guztira 21 skiff lehiatu direlarik.

Gizonezkoen arteko garailea Iñaki Burutaran izan da, 19:06,21 denborarekin, bigarren sailkatuari ia 13 ateraz.

Emakumezkoen kategorian berriz parte hartzaile bakarra izan da, Ur-Kirolak-eko Izaskun Arroyo. Bere denbora 23:21,10-koa izan da.
Aurtengoa etorkizunean egingo diren hainbat ekitaldietan lehena izatea espero dugu, Antxon Beitia ezagutzeko zortea izan ez zutenak bere berri izan dezaten.

Datorren urterarte!!"

EDITATUA (2011-11-22): Gaur Irutxuloko HITZAn ematen da jaitsiera honen berri, eta elkarrizketa ere egiten zaio Iñaki Burutaran irabazleari).

(Argazkia: urkirolak.com)

Urumeako I. Skiff jaitsiera - Antxon Beitiaren Oroimenez

Datorren azaroaren 20an, igandean, goizeko 11:30etan Ur-Kirolak klubak "Urumeako I. Skiff jaitsiera - Antxon Beitiaren Oroimenez" antolatuko du Gipuzkoako Arraun Federakuntzaren laguntzarekin.

Irteera 27. Poligonoko zubian emango da eta helmuga 5 km beherago izango da, Maria Kristina zubiaren parean. Itsaso zakarra izanez gero, helmuga Burdinazko Zubiaren parean jarriko da, proba 4 km-ra murriztuz.

Proba kadete, junior, senior eta beteranoen kategorietara dago irekia.

Ur-Kirolaken webguneko albiste honetan duzue eskura jaitsieraren informazio xehea eskaintzen duen pdf fitxategia.

Ur-Kirolakeko bi jubenilek urrezko domina Austrian

Asteburu honetan, Arraunketako Gazteria Koparen 27. edizioa jokatu da Austrian (Linz/Ottesheim).

Igandeko jardunaldian, urrezko domina lortu zuten Ur-Kirolak talde donostarreko bi jubenilek. Jon Ander Diezek eta Imanol Iradik podiumeko postu gorena lortu zuten adin horretako 4- kategorian (JM 4- 2000 m), Jon Aizpeolea eta David Oliverrekin batera. (Eskuineko argazkian dituzue bi arraunlariok).

Hona hemen jardunaldi horretako denborak. Gure txapeldunek irabazitako estropada ikusteko, bilatu orri horretan Event 202: Junior Mens Coxless Four dioen atala.

GERORA EDITATUA: Abuztuaren 26an honako elkarrizketa hau egin zitzaien Mundo Deportivo egunkarian.

Zorionak biei eta animo!!!!

(Argazkia: diariovasco.com)

Donostiarrak aulki mugikorreko txapelketetan

Asteburu honetan jokatu da Legution aulki mugikorreko 8+ kategoriako Euskadiko Txapelketa. Joan den asteruan Gipuzkoako Txapelketa jokatu zen Orion. Aspaldiko partez modalitate horretako ontzia atera dute Arraun eta Urkik, eta, beraz, bi klubetako zortzikoak izan ditugu bi txapelketa horietan.

Hona hemen emaitzak:

EUSKADIKO TXAPELKETA
1. Hondarribia 5:45,50
2. Getxo 5:54
3. Santiagotarrak 5:58,20
4. Orio
5. Arraun Lagunak
6. Ur-Kirolak

GIPUZKOAKO TXAPELKETA
1. Hondarribia 4:54,92
2. Orio 4:59,72
3. Ur-Kirolak 5:02,52
4. Santiagotarrak 05:03,13
(Donostia Arraun Lagunak sailkapen-estropadak kanporatuta geratu zen).

estropa.net webguneak Gipuzkoako Txapelketako bideo hau eskaini digu:

Donostiarrak Head of the River-en

Azkeneko blog-sarreretan aipatu bezala, joan den larunbatean Head of the River Race estropada jokatu zen Londresen. Ehunka ontzi aritu ziren arraunketa olinpikoko estropadarik ospetsuena den honetan, eta horien artean, Ur-Kirolak eta Arraun Lagunak klubetako hainbat ontzi aritu ziren Tamesisko uretan.

Leander irabazlearen atzetik, Arraun Lagunak 61. postuan iritsi zen, eta Ur-Kirolak, berriz, 94.ean (bigarren talde bat izan zuen Urkik 218. postuan). Hona hemen estropadako emaitzak eta denborak. Beteranoen kategorian, berriz, urtengo edizioan Arrauneko beteranoek ezin izan zioten iaz lortutako txapelari eutsi, zazpigarren iritsi baitziren. Urkiko bi ontzi aritu ziren beteranoen kategorian, eta 24. eta 112. postuan heldu ziren.

Youtubeko bideo honetan, Arraun Lagunak agertzen da 3:35 minutuan eta Ur-Kirolak 6:50 mintuan.

Irutxuloko HITZAn, donostiarrek Tamesisen bizi izandako esperientzia zirraragarriaren berri ematen zaigu albiste honetan, Urkiko entrenatzaile Xabier Zabalari egindako elkarrizketa baten bidez. Donostiako ontziek lortutako postu eta denborak ere eskaintzen zaizkigu artikulu horretan:

Seniorrak (393 ontzi).

• 62. D. Arraun Lagunak: 18:10:39
• 94. Ur-Kirolak: 18:23:51.
• 218. Ur-Kirolak (jubenilak): 19:11:66.

Beteranoak (197 ontzi).

• 7. D. Arraun Lagunak: 19:41.62.
• 24. Ur-Kirolak I: 20:15:04.
• 112. Ur-Kirolak II: 22:09.09.
  

(Argazkia: Ur-Kirolak)

Arraun Lagunak Londresko txapela defendatzera

Aurreko sarrera batean esaten nizuen donostiarrak arituko direla, aurten ere, Londresko Head of the River Race estropada ospetsuan. Beteranoen kategorian, Donostia Arraun Lagunakeko zortzikoa izan zen txapelduna iaz Tamesisko uretan, eta txapela irabazteko asmoz joango dira aurten ere.

Horren berri ematen digu Diario Vascok gaurko alean kaleratu duen elkarrizketa honetan. Joseba Higos arraunlariak iazko esperientzia kontatzen du, eta aurten dituzten itxaropenen berri ere ematen digu. Eta, diruz laguntzen dituen esponsorrari ere eskerrak ematen dizkio, bide batez.

Beste gai bati helduz, KAE Ligako webgunean aurredenboraldiko plantillak erakusgai jarri dituzte, baina oraingoan arraunlari bakoitzari buruzko fitxa ere eskainiz (adina, klubetako historiala eta abar). Ikusi dut iaz egindako huts batzuk ez dituztela zuzendu, Donostiarrako arraunlari beterano bati 54 urte botatzen baitizkiote, eta, tira, beteranoa bada baina hainbeste ere, ba, ez.

(Argazkia: diariovasco.com)

HITZA: Donostiarrak Londresera begira

Aurreko blog-sarreran esan nizuen Ur-Kirolak eta Arraun Lagunak Londreseko Head of the River Race estropada ospetsura joango direla. Bi taldeek zortziko seniorra bidaliko dute, eta loiolatarren tripulazio jubenila ere arituko da Tamesisko uretan,

Horri buruzko erreportajea eskaini digu gaurko alean Irutxuloko HITZA egunkariak. Xabier Zabala "Bixkar" da Ur-Kirolakeko entrenatzailea, eta Ekain Iriarte, berriz, Arraunekoa. Bi taldeen esperantzak, helburuak eta zailtasunak izango dituzte mintzagai erreportajean; merezi du irakurtzea.

Hona hemen bi taldeetako arraunlariak:

UR-KIROLAK:		ARRAUN LAGUNAK:
-Xabier Zabala (Entrenatzailea).		-Ekain Iriarte (Entrenatzailea)
-Elias Arruebarrena.		-Xabier Agirre.
-Xabi de Diego.		-Aitor Aranegi.
-Julen Durandegi.		-Alberto Domingo.
-Aritz Etxeberria.		-Ander Paisan.
-Hibai Fuente.		-Ander Iñiguez
-Xabi Goienetxea.		-Ander Iriarte.
-Urko Indaberea.		-Jon Krutxaga.
-Jon Sardon.		-Alex Terrones.
-Mikel Sudupe		-Ander Urtasun.
		-Telmo Yurramendi.
		-Nikolas Yurramendi.
		-Eli Zaballa.

Aulki mugikorreko berriak

Aulki mugikorreko modalitatean badira albisteak Donostiako klubei dagokienez:

Londresen apirilaren hasieran jokatuko den Head of the River Race estropada ospetsuan Donostia Arraun Lagunak eta Ur-Kirolak taldeko ontziak izango dira, estropada horren webgunean ikus dezakegunez: Arraunek zortziko bat bidaliko du, eta bi zortziko Ur-Kirolakek.

Bestalde, aspaldiko partez 8+ seniorra atera du Loiolako klub gorri-berdeak, eta Gipuzkoako Ligan lehia interesgarria izaten ari da Oriorekin. Ehuneko eskaseko tartean ari dira bata zein bestea estropadak irabazten, emozio handiko estropadetan (hona hemen, adibide gisa azken bi jardunaldietako emaitzak: 5. jardunaldia eta 6. jardunaldia). Kategoria jubenileko zortzikoa ere maila txukuna ematen ari da. Ea bada, animo denei!

(Argazkia: CRO Orio AE)

Maialen Arrazolari elkarrizketa HITZAn

Gaurko Irutxuloko HITZAn, Maialen Arrazola arraunlari donostiarrari egindako elkarrizketa ageri da. Arraun Lagunak taldeko harrobian hasitako arraunlari hau Hondarribiako klubean dabil gaur egun, aulki mugikorrean bereziki, eta Espainiako selekzioarekin aritzeko ere hautatu dute. Munduko txapelketan aritua da duela gutxi.

Bere kirol-ibilbidearen hainbat alderdi komentatzen ditu elkarrizketan: nola hasi zen arraunean, nola joan zen Hondarribia aldera, selekzioan izan duen ibilbidea, Munduko Txapelketa, Joko Olinpikoak, eta abar. Aipagarria da emakumeak arraunaren elitean (Kontxan eta Eusko Tren ligan) hasteko moduari egiten dion kritika: "etxea teilatutik egiten hasi garela iruditzen zait".

Pena da horrelako arraunlari bikainak etxean mantentzeko adina baliabide ez izatea Donostian. Bitartean, bere hitzekin konformatu beharko dugu.

Maialen Arrazola donostiarra, 12. Munduko Txapelketan

Maialen Arrazola 12. sailkatu da, 2X kategorian, Zeelanda Berrian jokatzen ari den Munduko Arraun Txapelketan.

Orain arraunean Hondarribian ari bada ere, Donostia Arraun Lagunak taldeko harrobikoa dugu arraunlari donostiar hau.

Bejondeiola!

Banyoles: Arrauneko beteranoek beste urre bat

Asteburu honetan, aulki mugikorreko modalitateko Espainiako txapelketak jokatu dira Banyolesen. Eta, donostiarrei buruz esan behar da bai Arraunek bai Urkik hainbat kategoriatan parte hartu dutela.

Aipamen berezia egin behar zaio Arraun Lagunakeko beteranoen 8+ ontziari. Urrezko domina lortu dute, eta, horrela, beste garaipen bat metatu du ibilbide ezin dotoreagoa daraman beterano talde honek.

Banyoleseko Espainiako txapelketen emaitzak aurkituko dituzue hemen, eta beteranoen emaitzak, berriz, hemen.

V. Kataluniako Nazioarteko Opena

Asteburu honetan, maiatzaren 15 eta 16an, V. Kataluniako Nazioarteko Opena jokatu da Banyoleseko uretan.

Aurten ere bertan izan dira Ur-Kirolak taldeko arraunlariak, gaztetxoen kategorietakoak bereziki. Askotan zertxobait alboratua geratzen da arraunketa olinpikoa, eta badu meritua klub donostiarrek modalitate honetan egiten duten ahaleginak.

Openaren webgunean ikus ditzakezue lehiaketa honen arautegia, programa, partaideen zerrenda, ordutegia eta, jakina, emaitzak.

Zorionak eta animo, beraz, Ur-Kirolakeko arduradunei eta, nola ez, uretan jo eta ke aritu diren Asier, Aitor Izagirre, Andoni Etxebeste, Ander Odriozola, Elias Arruabarrena, Eneko Larrañaga, Eneko Pinzolas, Jon Amilibia, Xabi Murua, Xabi De Diego, Alazne, Ane Arratibel, Josune Lizaso, Elene Lopetegi, Leire Etxebeste eta Larraitz Esnaolari.

Aulki mugikorreko 8+ Euskadiko Txapelketa

Gaur, Soustonseko uretan aulki mugikorreko Euskal Ligako beste jardunaldi bat jokatu da. Bertan izan dira Ur-Kirolak eta Donostia Arraun Lagunak klubetako hainbat ontzi, adin eta kategoria askotan. Guztira, dozena bat ontzi baino gehiago lehiatu dira donostiarren alde, ahaztu gabe beste hainbeste gertatzen dela Gipuzkoako Ligan ere. Uste dut eskertzekoa eta txalotzekoa dela talde donostiarrek modalitate erdi-baztertu honetan egiten duten ahalegina, gaztetxoekin bereziki.

Aspaldiko partez, kategoria "garrantzitsuenean", seniorren 8+ kategorian, ontzia uretaratu dute donostiarrek aurten: Donostia Arraun Lagunakena, hain zuzen. Ikusi genuen, besteak beste, martxoan Londresen aritu zirela.

Gaur, 8+ kategoria horretako Euskadiko Txapelketa jokatu da Soustonsen, eta azkenak geratu dira. Hona hemen denborak:

1. Hondarribia 6:13,95
2. Orio 6:21,74
3. Getxo 6:24,16
4. Santiagotarrak 6:24,73
5. Donostia Arraun Lagunak 6:51,76

Jardunaldiko beste kategorietako parte-hartze eta emaitzak ikusteko, egin klik hemen.

Donostiarren emaitzak Tamesisen

Aurreko sarreran esan bezala, Tamesiseko Head of the River Race estropada jokatu da asteburu honetan. Hemen dituzue lau 8+ ontzi donostiarren emaitzak (azpimarratzekoa Arrauneko beteranoek lortutakoa: 9.ak beteranoen sailkapen orokorrean, eta lehenak VC adin-kategorian).

SENIOR kategorian:
1. Molesey 17:21,76
4. Astillero 17:42,88
19. Orio 18:08,67
20. Hondarribia 18:08,94
106. Donostia Arraun Lagunak 18:49,34
134. Santiagotarrak 18:58,20

Hau da donostiar seniorren tripulazioa, ordezkoak barne: Ander Iriarte, Ekain Iriarte, Patxi Olabe, Telmo Yurramendi, Nikolas Yurramendi, Aitor Aranegi, Oier Yurramendi, Jon Krutxaga, Ander Iñiguez, Xabier Agirre eta Alberto Domingo; lemazaina, Xabier Cano.

BETERANOEN kategorian (Vesta Veterans' Head of the River):
1. Taurus VA 13:28,41
9. Donostia Arraun Lagunak VC 13:55,01
66. Ur-Kirolak VB 14:44,12
85. Ur-Kirolak VD 15:00,24

Emaitza eta denbora guztiak hemen aurkituko dituzue: senior kategoriakoak hemen eta beteranoen kategoriakoak hemen. Argazkiak ikusi nahi gero, hona hemen Arraun Lagunak taldeko seniorrak, eta, beteranoetan berriz, hemen UrKirolak VB, hemen UrKirolak VD, eta hemen Arraun Lagunak VC.

Urki eta Arraun, Tamesisera

Asteburu honetan, martxoaren 27 eta 28an, Head of The River estropada ospetsua jokatuko da Londresen, Tamesis ibaiko uretan. Iaz Ur-Kirolak bakarrik aritu zen, donostiarren partetik, proba horretan, guztira hiru 8+ ontzi: emakumezkoen ontzi bat aurkeztu zuten, eta beteranoz osatutako beste bi ontzi. Aurtengo saioan, bina 8+ aurkeztuko dituzte bai Ur-Kirolak bai Donostia Arraun Lagunak taldeek.

Ur-Kirolakek, iaz bezala, beteranoen bi zortziko eramango ditu Londres aldera. Talde bat bestea baino beteranoagoa da; tripulazio batekoak 53 urte ingurukoak dira, eta bestekoek, berriz, 36 urteko batez bestekoa dute.

Donostia Arraun Lagunakek senior talde bat izango du Tamesiseko uretan. Ontzi gaztea da, 23 urte inguru dituzte, eta beren entrenamenduak tartekatu egin behar izaten dituzte Donostiarra traineruan egiten dituztenekin. Beste zortzikoa beteranoena da; garai batean Munduko Txapeldun izandako arraunlariak dituzte, eta iaz beterano kategoriako txapelketa ugari irabazi zituzten.

Honen guztiaren berri xeheagoa duzue Irutxuloko HITZAko albiste honetan. Zorte on Londresera doazen donostiar guztiei.

(Argazkia: irutxulo.info)

Beteranoak Londresera begira

Donostiako Arraun Lagunak klubeko beteranoen zortzikoak Londreseko Head of The River ospetsuan parte hartuko du martxoan.

Berrogeita hamar urte inguruko adinean dabiltza, arraunlari hauek, eta bertan dira, besteak beste, gaztetan hainbat Kontxa (ez tosta donostiarretan baina) irabazitako eta pisu arineko Munduko Txapeldun ere izandako Eulogio Genoba eta Benito Elizalde. Eta horiekin batera, Joseba Higos, Aitor Iriondo, Borja Pablos, eta abar. Guztira hamabost bat arraunlari biltzen ditu beterano talde honek.

Diario Vasco egunkariko albiste honetan kontatzen dira talde horren nondik norakoak: nola elkartu ziren, urte askoren buruan, eta berriro ere lehiatzeko erabakia hartu zuten, barruko "harra" lasaitzeko asmoz. Eta bai ondo egin ere: gogoratu nahi dizuet zortziko honek iazko ekainean Gipuzkoako, Euskadiko eta Espainiako txapelketak irabazi zituela, blog honetan bertan aipatu genuen moduan. Etorkizunean Munduko Txapelketan aritzeko asmoa ere badute. Aurtengoan, behintzat, Londreseko Head of The River proban saiatuko dira.

Aurreko edizioetan Ur-Kirolakeko beteranoak ere aritu izan dira han, eta pentsatzekoa da aurten ere bertaratuko direla; ea, beraz, donostiar arraunlari hauek denek, lehian gozatzeaz gain, beren helburuak betetzen dituzten.
Animo bada denoi.

(Argazkia: diariovasco.com)