Donostiarra Facebook eta Twitterren

 

Asko poztu naiz Donostiarra klubak bere komunikazio bitartekoak eguneratu eta Facebook eta Twitter kontuak ere ireki dituela ikusita.

Aspaldi sinetsia nago Donostiako arraunak nolabaiteko burrunba mediatikoagoa behar duela. Bagarela sozializatzeko, hemen egin eta egingo ditugunak ezagutarazteko, edo zer dakit nik, Twitter bidez esaten duten bezala, entrenamenduak non eta noiz izango diren jakinarazteko besterik ez bada ere, oso tresna interesgarria iruditzen zait. Entrenamendu bat ikustera doan ume bat etorkizuneko arraunlari bat izango da agian, batek daki.

Argazki sorta ederrak eskaintzen dituzte, baita estropadetako denbora eta informazioa ere. Eta kontu historikoren bat ere aipatu dute.

Zorionak, bada, erabakia hartu eta kontu horien ardura duenari.

2013ko egutegi berria eta abenduko balea

Aurten ere, urte berriko egutegia bidali digu Donostiarrak bazkideoi. Traineruaren irudiak dira nagusi hilabeteetako argazkietan, beti bezala; irudi ikusgarriak dira, nahiz eta, pertsonalki, kirolaz aparteko argazki gehiago nahiko nituzkeen (ondoko argazkian agertzen dena, adibidez, edo egutegian bertan hilabeteetatik kanpo dauden bestelako argazki batzuk). Baina alferrikakoa da gustu kontuetan sartzea, ez?

Klubaren ohiko esponsorrez gainera, taberna ugari ageri dira egutegian Donostiarrari bere babesa (ekonomikoa, alegia) eskaintzen. Diru kopuru handirik emateko prest ia inor agertzen ez den garai honetan, aukera interesgarria izan daiteke diru kopuru txikiak emango dituzten babesle masa handiak lortzeko bide hori.

Neronek behintzat atseginez hartzen dut urtero egutegia, eta leku estrategiko bat apaintzen jarriko dut aurtengoan ere, munduak jakin dezan hor donostiarrazale bat dagoela. Bueno, munduak edo nire inguruko lau katuk. Baina jakin bezate.

Argazkia: EFE

Bestalde, gogoan izango duzuenez, balea bat azaldu zen Donostiako uretan duela egun batzuk, eta Kontxako hondartzan hil zen azkenean. Ikusmin handia sortu zuen gertaera horrek, ikusmina sortu zuenez.

Albistearen hari horri tiraka eta Orioko balearen bertso-paper zaharra nolabait atzakia gisa erabilita, idazki hauxe idatzi zuen Unai Elizasuk Irutxuloko HITZAn.

Eta bertan Donostiako trainerua aipatzen duelako ekarri dut idazki hori hona gogora: niri behintzat kuriosoa iruditu zitzaidan Unaik traineruaru buruz esaten duena eta erabilitako metafora.

Mila esker eta gero arte Mendi, ongi etorri Bixkar

"Mendi"
(Argazkia: Irutxuloko Hitza-Mikel Goñi)

Donostiako arraunari egiten dion jarraipen ezin hobean beste pauso bat emanez, Irutxuloko HITZAk eman zuen primizia: J.R. Mendizabal “Mendi” handiak utzi egingo du Donostiarra traineruko entrenatzaile kargua.

Dirudienez, lau urte hauetako lanarekin nolabait kemenez agortua geratu da, eta pentsatu du arnas hartzeko tartetxo bat ere behar duela. Klubean beste zeregin batzuetan parte hartzen jarraituko du, baina egunez eguneko zama gainetik kentzeko garaia iritsi zaiola uste du. Espero bezain kirol emaitza onak lortu ez izanak ere (azken urte honetan bereziki) izan omen du bere eragina erabaki horretan. Eta zergatiak bilatzen hasita, Donostiako arraun egitura berezia aipatu du, beste hainbat gauzaren artean. Baina ez dut gai hori berriro jorratuko, gehiegi errepikatzen naizen irudipena baitut aspaldian.

Donostiarraren proiektuan zutarri nagusi izan da Mendi, eta badiogu zer eskertua arraunzale donostiarrok. Mila esker eta… agur ez, gero arte, bada, Mendi. Hutsune galanta utziko digu, baina, klubean beste zeregin batzuetara lotuta jarraitzen badu, gaitz erdi, horrelako giza kapitala ezin baitu alferrik galtzen utzi arraunketa donostiarrak. Maiz gertatzen da zerbaiten benetako balioa ez dela behar bezala estimatzen zerbait hori falta zaigun arte. Hala ere, sinetsita nago ez dela horrelakorik gertatuko gurean eta Mendiren hutsunea beteko duenak neurri egokia emango duela.

Xabier Zabala "Bixkar" 
(Argazkia: Irutxuloko Hitza-Mikel Goñi)

Izan ere, Mendiren ordezkoa izateko Xabier Zabala “Bixkar” hautatu du Donostiarrako zuzendaritzak. Arraunlari eta entrenatzaile ezaguna da Xabier Zabala loiolatarra, esperientzia eta ibilbide luzekoa (arraunlari ibili da Ur-Kirolak, Zumaia, Trintxerpe eta Pasai Donibanen, eta azken bi urteotan Donostiarran bertan; eta lehenago ere izana da entrenatzaile Ur-Kirolaken eta Hernaniko gaztetxoekin).

Dudarik ez dago guztiz prestatua dagoela ardura hori behar bezala aurrera eramateko. Alderdi deportibotik, beraz, inolako aitzakiarik ez hautuari. Gainera, etxekoa izateak ematen dio bestelako garantia bat, klubaren egitura eta funtzionamendua, arraunlariak berak, eta Donostiako arraunaren gorabehera bereziak ondo ezagutzen dituenez.

Datorren astean dira hastekoak entrenamenduak. Hortxe ikusiko dugu plantilla nola geratu den azkenean, zein diren joandakoak eta zein etorritakoak. Ea lanean behar bezala aritu eta denboraldi-aurrea tajuz prestatzeko modua duten, neguko lan gogorraren ondorioz uda ahalik eta onena izan dadin.

2012-11-14an EDITATUA: Irutxuloko HITZAn elkarrizketa egin diote entrenatzaile berriari: plantillaren gorabeherak, denboraldi-aurrerako asmoak eta denboraldirako esperantzak ditu mintzagai.

Zorterik onena arraunlari denei! Eta animo!

Zorte on Xabier Zabala! Aupa Donostiarra!

Ohiko Batzar Nagusia azaroaren 16an

Donostiarra klubak bazkideen Ohiko Batzar Nagusia egingo du azaroaren 16an, 20:00etan. Hona hemen webgunean argitaratu duten deialdia.

Garrantzizkoa da herritarrak, bazkideak, klubaren nondik norakoetara hurbiltzea. Klubaren sozializazioa ez da besterik gabe jendeak estropadetan animatzea eta klubaren garaipenak (edo porrotak) norberarenak balira bezala bizitzea. Hori ez litzateke gutxi, ez horixe, orain baino donostiar gehiagok egingo balute. Baina, hortik harago, bazkideek inplikatu egin behar dute, klubaren gestio arazoak ere bizi egin behar dituzte, klubak oinarri sendoak izango baditu.

Horregatik, ez da gauza hutsala batzarrean datuak eta bestelako kontuak bazkideei plazaratzea, horrela hobeto ulertuko eta neurtuko baititu jendeak klubaren zailtasunak eta ezintasunak, edo aukerak eta anbizioak. Ezin baita ezagutzen eta ulertzen ez den zerbaitekin inplikazioa eratu. Eta, hartara, balizko garaipenak ospatzeaz harago, bazkideak klubaren partaide direla sentituko dira.

Ni behintzat hantxe izango naiz, ea zertan den gure Donostiarra.

PD: nire lagun batek dio ez dela oso Ohikoa izango azken hiru urteetan egin ez den zerbait, baina ez kasurik egin, nire lagunak oso mihi gaiztoa du.

Donostiarrak 5 urte

Bost urte bete ditu gaur Donostiarrak (nahiz eta estatutarioki 2007ko abenduaren 20an sortu zen eta 2008ko urtarrilaren 14an inskribatu zen Kirol Erakundeen Erregistroan, gaurko data hautatu dut nik, egun horretan sinatu baitzuten klubek eta udalak Donostiarra sortzeko hitzarmena). Bost urte pasatu dira, beraz, Donostiako arraun-kemena traineru bateratu baterantz bideratzeko erabakia sinatu zenetik.

Izango du askok zer kritikatu, izango da noski zer hobetu, izango da mamia eta gaia hitz egiteko eta hausnartzeko... Izango da. Baina, akordioa sinatu zutenek, izan zuten beste zerbait gogoan: traineru bateratu baten beharra, Donostiako arraunarentzat duen garrantzi estrategikoa.

Traineru bateratuak hiru ardatz nagusiren arteko lotura katalizatzen ditu: hiri bat - traineru bat - zalego bat. Hiru erpineko identifikazio horrek berebiziko garrantzia du herrien osagai emozional hain handia duen kirol honetan. Errazagoa da donostiar zale bat hiria ordezkatzen duen traineru batekin identifikatzea, nahiz eta zuzenean arraunarekin harremanik ez izan, zale-nukleo partikularrak biltzen dituzten klubekin identifikatzea baino. Eta identifikazio indartu horrek inplikazioak eta laguntzak (are ekonomikoak) erakartzeko bidea zabaltzen du. Txalorik beroenak, hortaz, duela bost urte proiektu honen beharra ikusi eta martxan jarri zutenentzat, eta ordudanik egunez egun ekimenari arnas ematen aritu diren laguntzaile guztientzat.

Izango da, seguru asko, pauso nabarmenagoak emateko ordua. Izango da Donostiak arraunean bere lekua berreskuratzeko garaia. Izango da zer borrokatu, izango da zer animatu, zer lagundu, izango da zer ospatu, zer lortu, zergatik barre eta zergatik negar egin… Izango da. Baina, jadanik, bada zerbait Donostiarra. Eta ez dut dudarik: lehen bost urteotan izan den hori etorkizunaren oinarria da, eta… izango da.

Zorionak eta Aupa Donostiarra!!!!

Orfeoi Donostiarraren kontzertua abuztuaren 10ean

Donostiarrak kontzertua antolatu du aurten ere: Donostiako Orfeoia, abuztuaren 10ean, 22:30ean Trinitate Plazan.

Sarreren prezioa 18 eurokoa izango da, baina Donostiarrako bazkideek 15 euroan lortzeko aukera izango dute abuztuaren 8a baino lehen hartzen badituzte. Horretarako, bazkideek (bazkide txartelarekin) klubak Salamanka Pasealekuan duen lokaletik pasa beharko dute, 17:30etik 19:30era abuztuaren 1, 2, 3, 6, 7 eta 8an. Bakoitzak bi sarrera hartu ahal izango ditu.

2012 denboraldiko traineruaren aurkezpena

Gaur, eguerdian, Donostiarraren aurkezpena izan da Kaian. Ekitaldi xumea izan da, baina esanahi berezikoa arraunzale donostiarrontzat. Beno, Donostiako traineruaren aldekoontzat bai, behintzat.

Aurrena, aurtengo denboraldian gure bi traineruetan ibiliko diren arraunlariak aurkeztu dira hedabideetako argazkilarien eta zaleen aurrean. Harrobiko aspaldiko arraunlarien ondoan, aurpegi berriak ikusi ahal izan ditugu, Mendi entrenatzailearen zaintzapean betiere. Traineruan ere esponsor berriak erakusgai.

Ondoren, klubeko presidente Alberto Goitiak hartu du hitza: klubak urtez urte egiten dituen urratsak azpimarratu ditu, eta aurten dituzten aurreikuspenak zein diren azaldu ditu (ARC ligan goian ibiltzea eta, ahal bada, play-offean sartzea). Bazkideoi gure laguntasuna eskertu eta gero, bazkide kopurua handitzeko ahalegina egiteko eskatu digu berriro ere.

Presidenteak jasotako txaloen ondoren, bi bertsolarik bertso bana bota dute, zaleok lehorrean eta arraunlariek itsasoan dugun garrantzia aipatuz.

Azkenik, Juan Karlos Izagirre alkateak gogoan izan du alkate izendatu ondoren izan zuen lehen ekitaldi ofiziala Donostiarraren iazko aurkezpena izan zela, eta hitz goxoak izan ditu traineru eta arraunlarientzat (behean duzue bete hitzen bideoa, Irutxuloko HITZAk eskainia).

Eta, amaitzeko, mokadu gustagarri bat hartzera gonbidatu gaitu klubak bertaratu garen bazkide eta zale guztiak. Eskertzekoa.

Aurkezpena egina dago, bada.... orain egurra emateko sasoia hasi da. Bertsolariak esan bezala, zaleok lehorrean eta arraunlariak uretan. Ea bada. 

Aupa Donostiarra!!!

Motorrak berotzen, lehorrean eta uretan

Aurreko sarreran esan bezala, hastear dago 2012ko traineru-denboraldia, eta Donostiarrari iritsi zaio, entrenamendu eta prestaketako hilabete luze hauen ondoren, udarari begira motorra bete-betean jartzeko garaia.

Denboraldiari hasiera emateko bi ekitaldi izango ditu klubak asteburu honetan: bata deportiboa, uretan, eta bestea instituzionala, lehorrean.

• Denboraldi-aurreko lehen traineru estropada jokatuko da Lekeition, igandean, ekainaren 3an, 11:30ean. Lehen aukera izango du Donostiarrak, ligan bere arerio izango diren beste traineruei (Orio, Santurtzi, Lekittarra, Zarautz eta abarri) neurria hartzeko. Ekainaren 17an, beste estropada bat izango da, Nafarroako Alloz urtegian, Gipuzkoako traineru onenak bilduko dituena.
  Pentsatzen dut zaleok bezainbeste gogo izango dutela arraunlariek ere uretan egurra ematen hasteko.

• Traineruaren aurkezpena izango da, larunbatean, ekainak 2, 12:30ean, kaian (Portaletas aurrean). Horrekin batera, bazkideen kopurua handitzeko kanpaina egin da, berriro ere, orain gutxi gorabehera garen 1.000 bazkideak askoz gehiago izan gaitezen. Donostiarrak garelako, kontxo!! (Nik, behintzat, ezin izango dut arlo horretan lagundu, jadanik ondo zukutuak baititut nire familiak eta adiskide-taldeak eskaintzen zizkidan aukerak).
  Era berean, klubak jakinarazi du MerkaOn-ekin akordioa lortu duela, zerbitzu horrek eskaintzen dituen deskontuak eta bestelako abantailak eskura izan ditzagun Donostiarrako bazkideok. Bazkide-txartel berriak banatu ditu, horretarako.

Ollagorrako bazkaria

Aurreko sarreran esan bezala, Juantxo Aginaga saria eman zion Ollagorra soziedadeak atzo Donostiarrari, aurtengo Kontxan lehen traineru gipuzkoarra izan zelako. Mahai baten inguruan, bazkari eder baten aitzakian elkartu ziren Donostiarrako arraunlari batzuk, zuzendaritzakoak, eta Ollagorrako hainbat kide eta gonbidatu.

Otorduaren amaieran, Juantxo Aginaga zena ekarri zuen gogora soziedadeko bazkide batek, Ollagorran (zuzendaritzako kide ere izan zen) eta Donostiako traineruan izan zuen ibilibideari buruzko datu batzuk aipatuta. Juantxok gobernatutako ontziaren eta Donostiarraren arteko hainbat kointzidentzia ere aipatu zituen: bien arteko lotura edo zubia iradoki nahi izan zuen horrekin (adibidez, traineru hark Luis Carril zuen izena, eta oraingoa Torrekua da; hau da, pertsona berari dedikatuta daude bi ontziak, Torrekua Luis Karrilen goitizena baitzen, hemen lehenago esana dugun moduan).

Jarraian, Carloto Garcíak, Ollagorrako presidenteak, memorial honen zergatia eta izaera laburbildu zituen, eta Donostiarrak irabazi izana behar bezala baloratu zuen. Eta gogorazi zuen Donostiak ez zuela 1950tik lortu lehen gipuzkoarra izatea.

Alberto Goitia Donostiarrako lehendakariak hartu zuen hitza azkenik: klubeko arraunlariek duten meritua azpimarratu zuen, eta zeinen baldintza gogorretan entrenatu behar duten. Saria eskertu zuen eta, Ollagorrak emandako ikurraren ordainetan, Torrekua traineruaren maketa bat eman zion soziedadeari (argazkian, hortxe dituzue une horretan Carloto Garcia ezkerrean, eta Alberto Goitia eskuinean). Amaitzeko, omenaldi xumea egin zitzaion Unai Luzuriaga "Txinpart" arraunlari beteranoari, aurten utzi baitu arrauna.

Donostiako traineruaren eta donostiar herritarren arteko lotura estutzen duen beste ekitaldi bat izan zen, eta ez dadila azkena izan.

Istingorra soziedadeko afaria

Duela egun batzuk Antiguoko Istingorra soziedadean afari-omenaldia egin zioten Donostiarrari. Horren berri ematen zaigu gaur Diario Vascon.

Datu batek harritu nau, ordea. Albistean esaten da 2.000 bazkide dituela Donostiarrak, eta nik uste nuen milara iritsi ezinik zebilela kontua; lepoa egingo nuke ekainean 800 ingurukoa zela kopurua. Baina tira, ondo edo gaizki, hortxe duzue datua... (Ni oker banago, askoz hobe, noski).

(Argazkia: diariovasco.com)

Donostiarra: bazkidearen eguna

Atzo eguerdian Bazkidearen Eguna ospatu zuen Donostiarrak.

Klubak mokadutxo bat hartzera gonbidatu zituen bazkideak, eta, bidebatez, A eta B taldeetako arraunlariak aurkeztu zituen.

Alkate izendatu berriak azpimarratu zuen udala traineruaru laguntza ematen jarraitzeko prest dagoela, eta Donostiarrako presidenteak, eskerrak ematearekin bat, beste kontu batzuetaz ere hitz egin behar zutela erantzun zion (zerbaiten eskean-edo), irribarre artean. Esponsor guztiei eskerrak eman zizkien, eta aurtengoan Urkatx arrandegiaren eta Martin Berasategiren diru-laguntza ere jasoko dutela adierazi zuen. Gero, Ekain Iriarte eta Jon Sardon arraunlariek eskerrak eman zizkieten bertaratutako bazkide eta zale guztiei, eta beren aldetik ahal duten guztia egiten saiatuko direla agindu zuten.

Azkenik, herritarrok taldeari ematen diogun arnasaren erakusgarri modura, Donostiarrako kamisetarekin jantzita joandako guztiak argazki batean atera ginen Torrekua traineruaren atzean, klubeko presidentearekin, entrenatzaile eta arraunlariekin eta Donostiako alkatearekin batera. Kosta zitzaion argazkilariari inolako esponteneorik gabeko argazkiren bat ateratzea, bai kostatu ere. Hona hemen atzoko ekitaldiaren argazki galeria bat.

Arraunlariak pozik ageri ziren, neguko zailtasunak alde batera utzi eta benetako estropadei ekiteko irrikaz; zaleak, berriz, itxaropentsu gaude, ekaineko estropada hauetan emaitza txukunak lortzen ari baita Donostiarra. Ea bada.

(Argazkia: diariovasco.com)

Angu-Liada, San Sebastian bezperan

Donostiarraren eta bere babesleen ekimena, San Sebastian bezperan, Sarriegi plazan. Festa eta arraunari laguntza uztartzeko beste aukera bat. Hona hemen argibideak:

http://www.kaiarribadonostiarra.com/Noticias_LeerMas_Eu.aspx?ID=66

Donostiarraren 2011 egutegia

Donostiarra taldeak, Radio San Sebastian irratiarekin eta Urkatx arrandegiekin lankidetzan, 2011 urteko egutegia kaleratu berri du.

Iazko estropadetako hainbat argazki ageri dira (A eta B traineruenak), irudi ikusgarri eta dotoreak denak ere, arraunzale donostiarron etxeko edo laneko edozein txoko apaintzeko modukoak. Uste dut detalle polita dela gure taldearen irudiak nonahi agertzea Donostiako etxe eta lantokietan. Eta, gainera, parrandazaleak bazarete, oso egutegi praktikoa irudituko zaizue, Donostiako auzo guztietako festen datak zehaztuta ageri baitira.

Nik txiripaz izan dut egutegi honen berri, eta eskerrik asko abisatu didan adiskideari. Radio San Sebastian irratiko egoitza nagusian (Portuetxe pasealekua, 51) edo Urkatx arrandegietan (Madril hiribidea, 9; Secundino Esnaola, 20; Easo, 63; eta Egia, 6) duzue eskura egutegi hau, musu truk.

Joan, eskatu eta hartu besterik ez duzue egin behar. Nik behintzat hartua dut neronena. Korri zuek, agortu baino lehen!!!

Eguberritan oparitu eta lagundu

Eguberritan, gogoarekin edo gogorik gabe opariak egin (eta jaso) beharra izan ohi dugu, ondotxo dakizuen bezala. Atseginez oparitzen (eta jasotzen) duzuenak, zorioneko zaudete; aparteko alderdi erakargarririk ikusten ez diogunok, ordea, horrenbestean konformatu beharko: kontra ezer gutxi egin liteke, eta bego beraz ohitura.

Hala ere, opari hauei nolabaiteko toke berezia emateko aukera dugu denok. Alferrikako kolonia, jostailu txepel edo ganora gabeko jantziez gainera, norberarentzat esanguratsua den zeozer oparitzeko aukera dugu (bakoitzak ikusiko du zer den hori). Eta noski, horrekin batera diruz laguntzatxo bat ematen bada, askoz hobeto.

Gure arraun taldeek edozein laguntza pozarren hartuko dute, dudarik gabe. Donostiarraren kasuan, hainbat diseinutako kamisetak, arraunerako "platanoak", estropuak, motxilak eta abar dituzue eskura. Gure-gurea den eta izan nahi duen talde baten opariak egitearekin batera, laguntzatxo bat emango diozue arraun-taldeari.
Horra hor nire proposamena.

PD: Donostiarrako arduradun adiskideak: hurrengo batean hobeto esplika itzazue loteria kontuak eskutitzean, nire familiako eta lagunarteko bazkideetatik bat bera ez baita guztiz aklaratu (ni ere ez). Eskerrak bat egoitzara joan eta han argibideak jaso zituen. ;)

Donostiarraren egoitza olatuek txikitua

Egun hauetan Euskal Herriko kosta gogor zigortzen ari den ekaitzak ondorio eta triskantza latzak eragin ditu Donostian. Horrelako ekaitzetan kaltetuta gertatzen diren lekuen artean Salamanka pasealekuko eraikinak izan ohi dira. Eta hortxe dago Donostiarrak inauguratu berri duen egoitza berria: Salamanka pasealekua, 13.

Beraz, eta ekaitzak eragindakoa ikusita, espero zitekeen egoitza horrek txikizioak izatea. Eta hala izan da, tamalez. Olatu erraldoiek kristalak eta ate-leihoak puskatu, ura barrura sartu eta barruan zegoena hondatuta geratu da. Webgunean bertan jakinarazi du klubak horren berri, eta hemen jarri ditudan argazki hauek eskaini ditu.

Gertakari tristea izateaz gainera, esan behar da lokal hori handitzeko eta egokitzeko obretan zegoela, eta, horregatik, nolabait bikoitza dela eragindako txikizioa.

Laster konpondu daitezela puskatutakoak, eta animo, bada, klubeko denei.

(Argazkia:kaiarribadonostiarra.com)

Donostiarran estropuak salgai

Hango eta hemengo arraunzaleen artean ohitura hedatua da estropuak apaingarri edo oroigarri modura erabiltzea. Tipikoa da kotxeen barruko atzerako ispilutik zintzilik ezartzea, klubaren koloreko zintekin apaindua. Haiekin batera eskapularioak zintzilikatzen dituenik ere bada. Eta ez hor bakarrik, joan den astean kostatik kilometro askotara dagoen Nafarroako ostatu batean ikusi berri dut horrelako estropu bat, apaingarri.

Donostiarrak ere ohitura hori indartu nahi du Donostiako arraunzaleon artean, eta argazkian agertzen denaren moduko estropuak jarri ditu salgai. Kolore txuriurdinekoak dira eta bi muturrak elkartzen diren gunean klubaren ikurra du (argazkian ez da ikurra ikusten, buruz behera jarrita zegoelako estropua argazkia egin nuenean).

Kotxean zintzilikatzeko, etxean edo lanean gure traineruaren oroigarria izateko, besterik gabe klubari laguntza adierazteko, edo zer dakit, Gabonetako oparien apaingarri gisa erabiltzeko... nahi duzun bezala erabiltzeko, hortxe dituzu klubaren egoitzan (Salamanca pasealekua, 13, larunbat eguerditan) salgai.

Detalle polita iruditu zait niri behintzat.

HITZAri atxikimendua eta bazkaria Zubigainen

Hona hemen zer dioen Donostiarraren webgunean argitatutako ohar honek

"Hurrengo larunbatean 11:00etan, Kaiarriba Donostiarraren hainbat zuzendari eta arraunlari batzuk Paseo Berrian egongo dira, konkretuki Oteizaren eskulturaren alboan. Bertan Hitzarekin atxikimendua egin nahi duten guztiak egongo dira. Egunkari euskaldun honek proiektu berri bati ekingo dio, Berriarekin batera, horregatik, argazki bat atera nahi dute euren laguntzaile eta lagun guztiekin.

Hitzak beti eduki du Klubarekiko jokaera bikaina, horregatik Donostiarrak babes hori itzuli nahi dio, etapa garrantzitsu batean euren alboan egonez.

Bestalde, 14:15etan, Kaiarriba Donostiarra Klubak Zubigain soziedadean bazkari bat antolatu du Klubarekin kolaboratu duten pertsona guztientzat. Horrela, pertsona anonimo hauek muxutruk eman duten laguntza hori eskertu nahi da, beraiei esker Kluba hazten ari delako egunetik egunera."

Aspalditik esana dut Irutxuloko HITZAk arraunari, eta bereziki Donostiarrari, eskaintzen dion lekua eta estatusa oso eskertzekoak direla. Pozten naiz klubetik bertatik ere horrela ikusi badute.

Mendiren esaldi bat

Impulsofijo webgunean, KAE-1 buruzko hainbat komentario eta analisi egin ditu Mendik aurtengo denboraldian zehar. Amaierako ekarpen modura, konkretuki bere lanari buruzko gogoeta egin dezan eskatu diote, eta honako hau erantzun du Donostiarrako entrenatzaileak. Lehendik (aurreko sarreran adibidez) aipatutako ideia batzuk azaltzen dira, eta horiek ez ditut errepikatuko, hobe da Mendiren erantzunak zuzenean irakurtzea.

Alabaina, bere arraunlariei zuzenduriko esaldi hau azpimarratu nahiko nuke, horixe baita, nire ustez, Donostiarrak lehen urte hauetan finkatu beharrekoa:

“Somos los encargados de echar a andar este proyecto con el sacrificio a todos los niveles que ello supone. Nuestra obligación es mejorar la situación heredada y que nuestro legado a generaciones venideras sea igual que con el que nos hubiese gustado iniciar esta andadura”.

Mendi: aurtengo plantilla, etorkizunaren oinarri

Zinez eskertzekoa da Donostiarrak webgune estatikoa egin ez izana. Alegia, eskertzen dela maiz berrikuntzak aurkitzea bertan, eta konturatzea klubarentzat garrantzitsua dela bazkide eta zale guztiei aldiro-aldiro albisteak eta bestelako informazioa ematea. Bi norabideko zirkuitua (zaleak, bazkideak <-> arraunlariak, kluba) izan ezean, batere bizirik eta etokizunik gabekoa izango baita talde sendo egiteko asmoa.

Joan den astean, presidentearen hitzak jasotzen ziren webgunean; gaurkoan, berriz, entrenatzailearen gogoeta ageri zaigu. Hainbat gauza interesgarri esaten dira bertan, eta hona hemen Mendiren ideia nagusiak:

• Proiektua heldutasunera iritsi da, ia atzera bueltarik gabeko egoera batera. Horretan, adierazgarria da donostiar herritarrek aurten taldearekin izan duten inplikazioa. Taldearen eta zaleen arteko lotura hau izango da etorkizuneko bermea, beste helburu handiago batzuk lortzeko. Udalaren eta alkatearen laguntasuna ere eskertzekoa da.
  
• Akats nagusia: neguko lana ondo egin ahal ez izana, hainbat arrazoirengatik. Eta ez da lehen aldia. Horregatik, hobetzeko bide nagusia aurten lan hori behar bezala egitea izango da.
• Taldea: Donostian azken 15 urteotan izan den arazorik handiena izan da urtero talde ia berriak zirela, eta horrela oso zaila da epe ertainera ezer eraikitzea. Taldeari jarraitasuna emanez gero, emaitzak etorriko dira. Aurtengo plantilla mantentzea izango da, beraz, etorkizunaren oinarri.
• Baja askorik ez da espero, eta, diru gutxi dagoenez eskura (ezin du Donostiarrak arlo horretan lehiatu beste hainbat talderekin, eta TKE liga sortzean Donostiako klubek olatu hori harrapatu ez izana da arrazoietako bat), ilusioa, giro ona eta proiektuaren erakargarritasuna izango dira argumentu nagusiak arraunlariak ekartzeko. Lanean ari gara aurtengo oinarria sendotzeko arraunlariren bat ekartzeko.
• B taldean sei edo zazpi arraunlari daude etorkizun ederrekoak, eta goiko taldera igotzea azkenean eratuko den plantillaren araberakoa izango da; alabaina, oro har, nahiago datorren denboraldian B traineruan bere formazioa biribiltzea.
  

Goitia presidentearen gogoeta

Donostiarraren webgunean argitaratu berri duten elkarrizketa honetan Alberto Goitiak, klubeko presidenteak, aurtengo denboraldiari eta etorkizunari buruzko gogoeta egiten du.

Taldeak aurten urrats bat eman duela dio, azpiegiturak sendotu direla, eta guztiz eskertzekoa eta garrantzitsua dela instituzionalki bakea lortzeko Donostiako klub historikoek egindako ahalegina, baita udalak emandako laguntza ere.

Horrekin batera, etorkizunari begira Mendi izango da proiektuaren euskarri nagusi; aurten ondo ibili den taldea mantentzea izango da oinarria, lanari jarraipena emateko, eta hortik aurrera proiektuaren erakarmenaz baliatuz (diru askorik ez baitago fitxaketeterako) taldera batu nahi dutenen ekarpena ongi etorria izango da betiere. Eta funtsezkoa, taldea lehenbailehen eratzea, denboraldi honetan udazken-neguetako lanak behar bezala egin ahal ditzan behingoz entrenatzaileak.