Berriak Donostiarran

Albiste berriak ditugu Donostiarraren inguruan. Garrantzizkoena, edo zabalduena behintzat, atzo jakinarazi zen, hainbat egunetan zurrumurru gisa barreiatzen ari bazen ere: Juan Mari Lujanbio izango da aurten traineru donostiarreko patroi.

Antza, Asier Lopezek ezin ditu ondo uztartu kirol-jarduera eta arlo pertsonal eta laborala, eta nahiago izan du patroi nagusiaren postua beste baten esku utzi, nahiz eta errekameran geratuko den, bere beherra izanez gero. Hutsunea betetzeko patroi bila kanpora joan behar izan dute donostiarrek, etxeko patroien artetik ezezkoa eman ziotelako batzuek Mendiri eta besteren bat arazo fisikoekin omen dagoelako.

Juan Mari Lujanbio izan da azkenik hautatua, eta jadanik entrenatzen ari da Donostiako uretan. Patroi kontrastatua eta arrakastatsua izateaz gain, ez da ahaztu behar duela lau bat urte Donostian aritua dela Lujanbio, Arraun Lagunak taldean. Dena dela, txakur-kros txapelketetan aritzen denez, agian abuztuko estropadaren bat galdu lezake pasaitarrak.

Bestalde, aste honetan bilera izan dute udaletxeko eta Donostiarrako ordezkariek. Udaletxeak arraun-taldearekin duen hitzarmena birplanteatu egingo da, dirudienez. Ez da ezusteko albistea Donostiako udala zer-nolako zurrunbilo ekonomikoetan dabilen ikusita. Horretaz gainera, bazkideak zaintzeko hainbat neurri aztertu ziren: Internet bidezko komunikazioari arreta gehiago eskaintzea, bazkide txarelari etekin handiagoa ateratzeko neurriak, eta abar.

Datorren asteburuan Lekeition eta hurrengoan Mutrikun traineru-estropadak izango dira, Ligak hasi aurreko azkenetako probak. Gure traineruak eman dezakeenari neurria hartzeko aukera izango dugu behingoz.